သျှမ်းပြည်မြောက်ပိုင်း မိုးမိတ်မြို့နယ် အတွင်းရှိ အခြေခံပညာ စာသင်ကျောင်းများ အချို့ကို အာဏာသိမ်း စစ်ကောင်စီ တပ်ဖွဲ့မှ ပိတ်ရန် ညွှန်ကြားကြောင်း သတင်းသိရသည်။
မိုးမိတ်မြို့နယ်အတွင်း SSPP/SSA နှင့် တိုက်ပွဲဖြစ်ပွားခဲ့သည့် စက်တင်ဘာ ၁၇ ရက်နေ့ကတည်းက ဝမ်ဘုံကန် (မိုးဘုံကျေးရွာ) မှ အလယ်တန်းကျောင်း နှင့် ဝမ်အုမ်ကျေးရွာမှ မူလတန်းကျောင်းတို့ကို စစ်ကောင်စီတပ်ဖွဲ့မှ ပိတ်ခိုင်းကြောင်း ဒေသခံများက သျှမ်းသံတော်ဆင့်ကို ပြောသည်။
“စာသင်ကျောင်းနှစ်ကျောင်းကို ပိတ်ခိုင်းလို့ ပိတ်လိုက်ရတယ်၊ သူတို့ (စစ်ကောင်စီတပ်ဖွဲ့) ဟွေခမ်းတောင်ဘက် သွားတဲ့ ၁၇ ရက်နေ့ ညနေပိုင်းကတည်းက ကျောင်းသားတွေကို ကျောင်းဆင်းခိုင်းတာ၊ အခုချိန်ထိ စာသင်ကျောင်း ပြန်မဖွင့်ခိုင်း သေးဘူး” ဟု အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ဝမ်ဘုံကန် ကျေးရွာ နှင့် ဝမ်အုံကျေးရွာတို့သည် ဟွေခမ်းတောင်ခြေ အနီးတွင် တည်ရှိသည့်အတွက် စစ်ကောင်စီ တပ်သားတို့က ပိတ်ခိုင်းကြောင်း ဒေသခံများက ပြောသည်။
ဟွေခမ်းတောင်ကြောဘက် တိုက်ပွဲဖြစ်ပွားခဲ့ပြီးသည့်နောက်တွင် အာဏာသိမ်း စစ်ကောင်စီတပ်ဖွဲ့တို့သည် အဆိုပါ နေရာအနီးတစ်ဝိုက်တွင် စစ်အင်အား ထပ်မံဖြည့်တင်းပြီး SSPP/SSA နှင့် စစ်ရေးတင်းမာမှုများ ရှိနေကြောင်း သတင်းသိရသည်။
“မနေ့က သူတို့ စစ်အင်အား ကားနှစ်စီးက အဲ့တောဘက် ထပ်သွားတာတွေ့ရတယ်၊ SSPP/SSA က အဲ့တောထဲမှာ နေရာယူထားတာ၊ အခုမြေပြင် အနေအထားတော့ နှစ်ဘက်စလုံး စစ်ရေးတွေ တင်းမာနေဆဲပဲ” ဟု အထက်ပါ ပုဂ္ဂိုလ်ကဆက်ပြောသည်။
ယင်းကဲ့သို့ ဖြစ်ပေါ်နေသည့် အခြေအနေများနှင့် ပတ်သက်ပြီး စစ်ကောင်စီဘက်မှ နယ်ကျွံခြင်းပြုပါက တိုက်ပွဲ ထပ်မံဖြစ်ပွားနိုင်ကြောင်းလည်း မိုးမိတ်မြို့နယ်အတွင်း လှုပ်ရှားနေသည့် ရှမ်းပြည်တိုးတက်ရေးပါတီ၊ ရှမ်းပြည် တပ်မတော် (SSPP/SSA) မှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“ကျနော်တို့က ဒီနေရာမှာ ရှိတယ်ဆိုတာ ဒေသခံ ပြည်သူတွေရော ၊ သူတို့(စကစ)တွေရောသိတယ်၊ ရွာသားတွေက ဒီဘက်ကို မလာကြဘူး၊ အခု စစ်ကောင်စီတွေဘက်က စစ်အင်အား ထပ်ဖြည့်နေတယ်လို့ သတင်းသိရတယ်၊ သူတို့ဘက်က ကျနော်တို့ ဆီကို ထပ်တိုးလာမယ် ကျနော်တို့ နယ်ထဲ ရောက်လာမယ်ဆိုရင်တော့ ပစ်ရမှာပဲ” ဟု SSPP/SSA မြေပြင်အရာရှိက ပြောသည်။
စက်တင်ဘာ ၁၆ ရက်တွင် စစ်ကောင်စီဘက်မှ မိုးမိတ်မြို့နယ်အတွင်း အခြေချ လှုပ်ရှားနေသည့် SSPP/SSA တပ်ဖွဲ့များ နုတ်ထွက်ရန် ရပ်ကွက်အုပ်ချုပ်ရေးမှူး မှ တစ်ဆင့် SSPP/SSA တာဝန်ခံများထံ အကြောင်းကြား သော်လည်း SSPP/SSA ဘက်မှ နုတ်ထွက်ခြင်းမပြုသည့်အတွက် စက်တင်ဘာ ၁၇ ရက်နေ့တွင် စစ်ကောင်စီ ဘက်က ထိုးစစ်ဆင်လာခြင်း ဖြစ်ကြောင်း SSPP ပြန်ကြားရေး ထုတ်ပြန်ချက်အရ သိရသည်။
ပြီးခဲ့သည့် ဇူလိုင်လ ၁ ရက်တွင်လည်း မိုးမိတ်မြို့နယ် မိုးဘုံကျေးရွာ နှင့် ဝမ်အုံကျေးရွာကြားမှာ (SSPP/SSA) နှင့် စစ်ကောင်စီတပ်တို့ ထိတွေ့တိုက်ပွဲတစ်ကြိမ် ဖြစ်ပွားခဲ့ဖူးပါသည်။
Leave a Comments