သျှမ်းပြည်တောင်ပိုင်း ဆီဆိုင်မြို့နယ် ပုံးအင်းဒေသအတွင်း မူးယစ်ဆေးဝါး သုံးစွဲသူများ ပေါများလာသဖြင့် လယ်၊ ခြံ ထဲရှိ မော်တာ – ရေစုပ်စက်များ မကြာခဏ ခိုးခံ နေရကြောင်း စုံစမ်း သိရှိရသည်။
သြဂုတ်လပိုင်း မှစတင်ပြီး ယခုလထိ ပုံးအင်းဒေသ နောင်စန့်ကျေးရွာမှာ လယ်၊ ခြံ ထဲရှိ မော်တာ – ရေစုပ်စက် (၃) ခု၊ ဆိုင်ကယ် (၂) စီး ခိုးခံနေရပြီး များသောအားဖြင့် သူခိုးမှာ ပုံးအင်းထဲမှ ငါးလာမျှားသူများ ဖြစ်ကြကြောင်း နောင်စန့်ဒေသခံ တစ်ဦးက သျှမ်းသံတော်ဆင့်ကို ပြောသည်။
“တချို့က ငါးလာမျှားတာ မဟုတ်ဘူး။ ချောင်းဘေးမှာရှိတဲ့ မော်တာ – ရေစုပ်စက်တွေ ခိုးသွားတာ။ မော်တာ – ရေစုပ်စက် တစ်လုံးကို (၂) သိန်း လောက်တန်ဖိုးရှိတယ်။ လယ်၊ ခြံထဲမှ ာဘာမှ ထားလို့မရတော့ဘူး။ ဆိုင်ကယ်ကတော့ ပွဲတွေမှာသွားရင် ခိုးခံရတာပေါ့ “ ဟု ၎င်း ဒေသခံ တစ်ဦးက ပြောသည်။
ယခင်တွင် လယ်၊ ခြံ ထဲရှိ မော်တာ – ရေစုပ်စက်များသည် ခိုးခံရခြင်းမရှိသော်လည်း စစ်အာဏာ သိမ်းပြီး (၁) နှစ်ခွဲကျော်ကာလမှာ ပုံးအင်းတွင် သူခိုး၊ ဓားပြများ ပေါများလာသဖြင့် မကြာခဏ ခိုးခံနေရ ခြင်းဖြစ်သည်။
ပုံးအင်းဒေသတွင် မူးယစ်ဆေးဝါး ပေါများလာသဖြင့် မူးယစ်သုံးစွဲသူလည်း ယခင်ထက် ပိုများလာကာ စပါးဈေးတက်လာသော ယခုကာလတွင် စပါးများ ခိုးခံရမည်ကို စိုးရိမ်နေကြောင်း ပုံးအင်းဒေသခံ အသက် (၄၀) ကျော်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။
“အခု စပါးဈေးတွေရှိလာတော့ စပါးတွေ ခိုးခံရမှာကို စိုးရိမ်ရတယ်။ ကြက်သွန်ဖြူ စိုက်တဲ့အချိန်ဆိုရင်လည်း ကြက်သွန်တွေ ခိုးခံရတယ်။ အခုက ပိုဆိုးလာတယ်၊ မူးယစ်ဆေးသမားတွေက ပေါလာတော့ ဘာမှစိတ်မချရတေ့ာဘူး “ ဟု ၎င်း အမျိုးသားတစ်ဦးက ပြောသည်။
စစ်အာဏာသိမ်းပြီး (၁) နှစ်ခွဲကျော်ကာလတွင် သျှမ်းပြည်တပြည်လုံး သူခိုး၊ ဓားပြ များက ပြည်သူများ၏ နေအိမ်အတွင်း ဖောက်ခံထိသော်လည်း သက်ဆိုင်ရာ ရဲ နှင့် စစ်ကောင်စီများက ဖမ်းဆီးပေးခြင်း မရှိကြောင်း သိရသည်။
Leave a Comments