သျှမ်းပြည်မြောက်ပိုင်း မိုးမိတ်မြို့နယ် ဝမ်အုံကျေးရွာရှိ ဟွေခမ်းတောင်ကြောတွင် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) နှင့် စစ်ကောင်စီတို့ တိုက်ပွဲဖြစ်ပွားခဲ့ကြပြီး စစ်ကောင်စီဘက်က ၃ ဦး သေဆုံးကာ ၅ ဦး ဒဏ်ရာရခဲ့သည်ဟု သိရှိရပါသည်။

ယမန်နေ့ (စက်တင်ဘာ ၁၇) ရက် နံနက် ၇ နာရီခန့်တွင် စစ်ကောင်စီတပ် ခမရ (၃၄၈) ၊ ခလရ (၂၇၆) တို့ ပူးပေါင်းစစ်ကြောင်း အင်အား ၆၀ ဝန်းကျင်ခန့်က မိုးမိတ်မြို့ထဲမှ ဝမ်အုံကျေးရွာအုပ်စုအတွင်းသို့ ရောက်ရှိလာပြီး SSPP/SSA တပ်ဖွဲ့တို့ အခြေချ လှုပ်ရှားနေသည့် ဟွေခမ်းတောင်ကြောဘက်ကို ချီတက်လာရာ ညနေ ၃ နာရီ ၃၈ မိနစ် မှ ၄ နာရီ ၈ မိနစ်အထိ နှစ်ဖက် ထိတွေ့တိုက်ပွဲ ဖြစ်ပွားခဲ့ကြသည်။

စက်တင်ဘာ ၁၆ ရက်နေ့မှာလည်း စစ်ကောင်စီဖက်ကနေ မိုးမိတ်မြို့နယ်အတွင်း အခြေချ လှုပ်ရှားနေသည့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တပ်ဖွဲ့တွေကို မိုးမိတ်ထဲကနေ နုတ်ထွက်ပေးရန် ရပ်ကွက် အုပ်ချုပ်ရေးမှူးကနေ တစ်ဆင့် မိုးမိတ်အတွင်းရှိ SSPP/SSA တာဝန်ခံများထံ အကြောင်းကြားခိုင်းလိုက်ပြီး SSPP/SSA ဘက်က နုတ်ထွက်မသွားပဲ ဆက်လက် အခြေချ လှုပ်ရှားရာကနေ စစ်ကောင်စီဘက်က ထိုးစစ်ဆင်လာသည်ဟု SSPP ပြန်ကြားရေး ထုတ်ပြန်ချက်အရ သိရသည်။

ပြီးခဲ့သည့် ဇူလိုင်လ ၁ ရက်နေ့တွင်လည်း မိုးမိတ်မြို့နယ် မိုးဘုံကျေးရွာ နှင့် ဝမ်အုံကျေးရွာကြားတွင် (SSPP/SSA) နှင့် စစ်ကောင်စီတပ်တို့ ထိတွေ့တိုက်ပွဲတစ်ကြိမ် ဖြစ်ပွားခဲ့ဖူးပါသည်။

ယနေ့ စက်တင်ဘာ ၁၈ ရက် ယခုချိန်ထိ ထိတွေ့တိုက်ပွဲမဖြစ်သေးပေမယ့် စစ်ကောက်စီဘက်က စစ်အင်အား ထပ်ဖြည့်ထားသဖြင့် နှစ်ဖက်စစ်ရေးတင်းမာ နေရခြင်းဖြစ်ပါသည်။

လက်ရှိမှာ SSPP ထိပ်ပိုင်းခေါင်းဆောင်များသည် “ဝ” ဒေသ ပန်ဆန်း ဒေသကို စက်တင်ဘာ ၁၆ ရက်တွင် သွားရောက် တွေ့ဆုံခဲ့ကြောင်း သိရသည်။