သျှမ်းပြည်မြောက်ပိုင်း ကွတ်ခိုင်မြို့နယ် လွိုင်ဆမ်ဆစ်တောင်ခြေအနီးတွင် ဗုံးတစ်လုံး ပေါက်ကွဲပြီး အမျိုးသား တစ်ဦး ထိခိုက် သေဆုံးရကြောင်း သတင်းသိရသည်။
စက်တင်ဘာလ ၁၅ ရက်နေ့ ညနေ ၄ နာရီဝန်းကျင်တွင် လွိုင်ဆမ်ဆစ်တောင်ခြေဘက် ဦးတည်မောင်းနှင်လာသည့် အမျိုးသားတစ်ဦး ဗုံးပေါက်ကွဲမှုကြောင့် သေဆုံးသွားရကြောင်း ဖြစ်စဥ်ကို သိသည့် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
“(လွိုင်ဆမ်ဆစ်) တောင်ခြေဘက် မောင်းလာတဲ့ ဆိုင်ကယ်လမ်းဘေးရပ်ပြီး အမျိုးသားက တောင်ခြေဘက်ကို လမ်းလျှောက်သွားပြီး ခနအကြာမှာ ဗုံးပေါက်ကွဲတာ၊ ဗုံးက သူ့ကိုယ်ကနေပဲ ပေါက်တယ်လို့ပဲ ထင်တယ်၊ အဲ့နေရာမှာ ပွဲချင်းပြီး သေသွားတယ်” ဟု အထက်ပါ အမျိုးသားက ပြောသည်။
ဗုံးပေါက်ကွဲမှုကြောင့် သေဆုံးသွားရသည့် အဆိုပါ အမျိုးသားသည် အမည် နေရပ်လိပ်စာ မသိရှိရကြောင်း ဒေသခံများက ပြောသည်။
“ကျနော်တို့ ထင်တာက ဒီတောင်ခြေဘက်ကို မိုင်းထောင်ဖို့လာတဲ့ KIA တပ်သားများ ဖြစ်မလားပေါ့၊ ဘာဖြစ်လို့လဲဆို အဲ့အနားမှာသူတို့ (KIA) တပ်ဖွဲ့ရော ဗမာစစ်တပ်ရော လှုပ်ရှားတဲ့နေရာဖြစ်တယ်၊ သေသွားတဲ့သူကို ကြည့်ရတာ ဗမာစစ်သားတော့ မဟုတ်လောက်ဘူး” ဟု အထက်ပါ ပုဂ္ဂိုလ်က ဆက်လက်ပြောဆိုထားသည်။
လွိုင်ဆမ်ဆစ်တောင်ခြေအနီးတစ်ဝိုက်တွင် မိုင်းထောင်ထားရန်အတွက် လက်နက်ကိုင်တပ်ဖွဲ့မှ အဖွဲ့ဝင်တစ်ဦး ဖြစ်နိုင်ကြောင်း ဒေသခံများပြောဆိုသော်လည်း သျှမ်းသံတော်ဆင့်မှ သီးခြား အတည်ပြုနိုင်ခြင်း မရှိပေ။
ပြီးခဲ့သည့် စက်တင်ဘာလ ပထမအတွင်းမှ စတင်ကာ ကွတ်ခိုင်မြို့နယ်အတွင်း အာဏာသိမ်း စစ်ကောင်စီ တပ်ဖွဲ့နှင့် ကချင်လွတ်လပ်ရေးတပ်မတော် (KIA) တို့ စစ်ဆင်ရေးများ စတင်ပြင်းထန်လာခဲ့ခြင်း ဖြစ်ကြောင်း သိရသည်။
Leave a Comments