သျှမ်းပြည်တောင်ပိုင်း ဆီဆိုင်မြို့နယ် နောင်ထော်ကျေးရွာဘက်တွင် တိုက်ပွဲဖြစ်ပွားပြီးသည့် နောက်ပိုင်း ဖမ်းဆီးခံရသူသည် PNLO/PNLA တပ်သား မဟုတ်ကြောင်း သျှမ်းသံတော်ဆင့်ကို ပြောသည်။
ယမန်နေ့ (စက်တင်ဘာ ၁၂) ရက်တွင် ဆီဆိုင်မြို့နယ် နောင်ထော်အနီး စစ်ကောင်စီတပ်ဖွဲ့နှစ်ခုကို PDF တပ်ပေါင်းစုတစ်ခုမှ လာရောက်တိုက်ခိုက်သိမ်းပိုက်ခဲ့ပြီးနောက် ရှမ်းပြည်လူမျိုးပေါင်းစုံ ပြည်သူ့လွတ်မြောက် ရေး (ရလလဖ )အဖွဲ့ဝင်ဟောင်း ဖြစ်သော”ထွက်ကလေး” ဆိုသူ ဖမ်းဆီးခံရကြောင်း သိရသည်။
အဆိုပါ ဖမ်းဆီးခံရသူ ဦးထွက်ကလေးသည် PNLA တပ်သားဟု သတင်းများပျံ့နှံ့မှုသည် သတင်းမှားဖြစ်ကြောင်း ၎င်းတို့တပ်သား မဟုတ်ကြောင်း PNLO/PNLA ဒု ဥက္ကဌ ဦးခွန်ထွန်းတင်က သျှမ်းသံတော်ဆင့်ကို ပြောသည်။
“သူတို့ ဖမ်းတဲ့သူက ရလလဖ ရဲ့ ရဲဘော်ဟောင်းဖြစ်တယ်။ တိုက်ပွဲဖြစ်ပြီးနောက်မှာတော့ စကစတွေ ရွာထဲ လိုက် စစ်ဆေးပြီး သူ့အိမ်မှာ စစ်အသုံးအဆောင် ပစ္စည်းတချို့တွေ့လိုက်လို့ သူ့ကိုဖမ်းလိုက်တာ။ ကြည့်ရတာ သူများ ဆီက လက်ဆောင် ရတာနဲ့တူတယ်၊ ကျနော်တို့ တပ်သားတော့ မဟုတ်ဘူး” ဟု ဦးခွန်ထွန်းတင် က သျှမ်းသံတော်ဆင့် ကို ပြောသည်။
ထိုအပြင် နောင်ထော်အတွင်း တိုက်ပွဲဖြစ်ပွားပြီးနောက်ပိုင်း စစ်ကောင်စီတပ်ဖွဲ့မှ ဒေသခံ ရွာသားတချို့ ဖမ်းဆီးခံထား ရမှုလည်းရှိနေကြောင်းလည်း သိရသည်။
“ဖမ်းဆီးခံထားရတဲ့ ရွာသားတွေဟာ PDF တွေမဟုတ်တဲ့အကြောင်းကို တာဝန်ရှိသူတွေက ပြောပေးထားတယ်၊ ပြန်လွတ်ပေးဖို့ပေါ့နော် ဒီလိုမျိုး တိုက်ပွဲဖြစ်တော့ ပြည်သူလူထုရဲ့ သွားရေးလာရေးက ပိုမိုခက်လဲလာနိုင်တယ်၊ ဒီပတ်ဝန်းကျင်မှာ စစ်ရှောင်လည်း များနေတော့ စားသုံးကုန်ပစ္စည်းတွေ ပိုမိုခက်ခဲလာမှုကို စိုးရိမ်ရတယ်” ဟု ဦးခွန်ထွန်းတင် က ဆက်လက်ပြောဆိုထားသည်။
လက်ရှိ နောင်ထော်ကျေးရွာအတွင်း တိုက်ပွဲများ ငြိမ်သက်သွားသော်လည်း စစ်ကောင်စီ နှင့် PNA တို့မှ စစ်အင်အား ဆက်လက်ဖြည့်တင်းနေသည့်အတွက် ဒေသခံတချို့က ရပ်ရွာထဲပြန်မဝင်သေးပဲ ဘုန်းကြီးကျောင်းတွင်ပင် ခိုလှုံနေဆဲဖြစ်ကြောင်း သိရသည်။
Leave a Comments