သျှမ်းပြည်တောင်ပိုင်း ပင်လောင်းမြို့ အနောက်ရပ်ကွက်နေ လူငယ်အမျိုးသမီးတစ်ဦးသည် (၂) ပတ်ကျော်ကြာ အဆက်အသွယ်ပြတ်နေသဖြင့် မိသားစုဝင်များ စိုးရိမ်နေကြောင်း သတင်းရရှိသည်။
အဆိုပါ ပျောက်ဆုံးနေသည့် အမျိုးသမီးသည် သြဂုတ် ၃၀ ရက်၊နံနက် ၆ နာရီခွဲတွင် ပန်းချယ်ရီလိုင်ကားဖြင့် ပင်လောင်းမြို့မှ တောင်ကြီးမြို့သို့ အလုပ်ကိစ္စဖြင့် ထွက်သွားရာ ယနေ့အချိန်ထိ ဖုန်းအဆက်အသွယ် ပြန်မရသေးသဖြင့် မိသားစုဝင်များက စိုးရိမ်နေကြောင်း ၎င်း၏မိခင်ဖြစ်သူ နန်းခင်ညွှန့်က သျှမ်းသံတော်ဆင့်ကို ပြောသည်။
“သမီးက သူ့အလုပ်ကိစ္စနဲ့ ထွက်သွားမယ်လို့ပြောတယ်။ (၂) ပတ်ကြာမယ်လို့လည်း ပြောသွားတယ်။ သူသွားတဲ့ နေ့က ဖုန်းမဆက်လိုက်ရဘူး။ နောက်တစ်နေ့ ၃၁ ရက်နေ့မှာ ဖုန်းဆက်ကြည့်တော့ အဆက်သွယ် ပြတ်နေတယ်။ သူခါတိုင်း ညအိပ် ခရီးထွက်ရင်လည်း ဖုန်းအမြဲတမ်းဆက်တယ်။ အခုက ဖုန်းလည်းမဆက်တော့ သမီးကို စိတ်ပူနေတယ် “ ဟု ၎င်း မိဘဖြစ်သူ နန်းခင်ညွှန့်ကပြောသည်။
အဆိုပါ နန်းခင်ညွှန့် သမီးဖြစ်သူမှာ နန်းအိသန္တာ ဟု အမည်ရပြီး အေးသာယာမြို့မှ နည်းပညာတက္ကကျောင်းတွင် နောက်ဆုံးနှစ် တက်ရောက်နေသူဖြစ်သဖြင့် ယခုအချိန်မှာ ကျောင်းဆက်မတက်တော့ဘဲ ပင်လောင်းမြို့မှ (Civil) သင်တန်း တက်နေပြီး ဆောက်လုပ်ရေး အလုပ်လုပ်နေကြောင်း ၎င်း မိဘဖြစ်သူက ဆက်ပြောသည်။
အလားတူ နန်းအိသန္တာသည် ကျန်းမာရေး အခြေအနေမကောင်းခြင်း၊ အစာအိမ်ရောဂါ ဖြစ်ပွားခဲ့ဖူးပြီး ပင်လောင်းမြို့မှ ဆေးရုံတွင် ဆေးဝါးကုသ ခံယူခဲ့ဖူးသူဖြစ်ပြီး ယခုလို အဆက်သွယ်မရသဖြင့် မိသားစုဝင်များက ကျန်းမာရေးအတွက် စိုးရိမ်နေကြောင်း ပြောသည်။
“သူက ကျန်းမာရေး အခြေနေမကောင်းဘူး။ သူ့မှာ အစာအိမ်ရောဂါ ဖြစ်နေတယ်။ ဒီလိုမျိုး (၂) ပတ်လောက်ကြာပြီး အဆက်သွယ်မရတော့ စိုးရိမ်တယ်။ အခုချိန်မှာ သမီးနဲ့တော့ အဆက်သွယ်ပြန်ရချင်တယ် “ ဟု ၎င်းမိဘဖြစ်သူက ထပ်လောင်းပြောသည်။
ထို့အပြင် နန်းအိသန္တာ မှာ (၂) ပတ်ကြာ အဆက်သွယ် ပြတ်တောက်နေသဖြင့် မိသားစုများနှင့် ဆွေးမျိုးများက စိုးရိမ်နေကြောင်း နန်းအိသန္တာ နှင့် အဆက်အသွယ်ရသူများ ရှိလျှင် ၎င်းမိသားစု ဝင်များထံသို့ အကြောင်းကြား ပေးပါရန် ၎င်း မိဘဖြစ်သူက တောင်းဆိုသည်။
Leave a Comments