သျှမ်းပြည်တောင်ပိုင်း ပင်လောင်းမြို့နယ် နှင့် ညောင်ရွှေမြို့နယ်ရှိ ကျေးရွာများတွင် ပအိုဝ်းပြည်သူ့စစ် (PNA) တပ်ဖွဲ့က ကြံ့ခိုင်ရေးပါတီကို မဲပေးရန် ဖိအားပေးပြီး စာရင်းများလည်း ကောက်ခံနေကြောင်း စုံစမ်းသိရှိရသည်။
လာမည့် ၂၀၂၃ ခုနှစ် အာဏာသိမ်းစစ်ကောင်စီ ဦးစီး ကျင်းပမည့် ရွေးကောက်ပွဲအတွက် ပင်လောင်းမြို့နယ် ပအိုဝ်းပြည်သူ့စစ် (PNA) တပ်ဖွဲ့ စိုးမိုးထားသော ကျေးရွာများတွင် စက်တင်ဘာ ၆ ရက်မှစတင်ပြီး မဲစာရင်းကောက်ခံနေကြောင်း ၊ ကြံ့ခိုင်ရေးပါတီကို မဲပေးရန်လည်း ဖိအားပေးနေကြောင်း ပင်လောင်းမြို့ဒေသခံ အသက် (၃၀) ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။
“လွန်ခဲ့တဲ့ (၆) ရက်က ကျနော်တို့ဒေသမှာ ရွေးကောက်ပွဲအတွက် မဲပေးသူစာရင်းကို ဖိအားပေးပြီး ကောက်နေတာ။ ကြံ့ခိုင်ရေးကို မဲပေးဖို့ ဖိအားပေးပြောတယ်။ ပအိုဝ်းပြည်သူ့စစ် (PNA) တပ်ဖွဲ့က ကောက်တာဗျ။ ကျေးရွာ အုပ်ချုပ်ရေးမှူးလည်း မပါဘူး။ သူတို့စစ်သားအဖွဲ့တွေက လာကောက်တာ” ဟု ၎င်း အမျိုးသားတစ်ဦးက ပြောသည်။
အဆိုပါ မဲစာရင်းကောက်ခံခြင်းကို ပြည်သူများ၏ စိတ်ဆန္ဒသဘောထားမှုများ မပါဘဲ အိမ်ထောင်စုစာရင်းထဲမှ ပါရှိသူအမည်အတိုင်း မဲစာရင်းကောက်ယူသွားကြောင်း ၎င်းက ဆက်ပြောသည်။
“မဲစာရင်းလာကောက်တာက အသက် (၁၈) နှစ်ပြည့်ပြီး သူတိုင်းကိုကောက်တယ်။ မဖြစ်မနေ သူတို့က ဖိအားပေးပြီး ကောက်တာကို၊ တချို့သိတဲ့သူတွေက မထည့်ပေးချင်ဘူး။ သူတို့လည်း လက်နက်တွေနဲ့ ခြိမ်းခြောက်တာတွေ လည်းရှိတယ်။ ပြီးတော့ သူတို့နယ်မြေ ဆီဆိုင်မြို့နယ်၊ ဟိုပုံးမြို့နယ် တွေမှာလည်း သူတို့ထပ်ကောက်မယ့် အလားလာ ရှိနေတယ် “ ဟု ၎င်းဒေသခံတစ်ဦးက ပြောသည်။
အလားတူ ပြီးခဲ့သည့် ၂၀၁၀ ခုနှစ်တွင် ကျင်းပသည့် ရွေးကောက်ပွဲ အချိန်တွင် ယခုလို ဖိအားပေးပြီး ကောက်ခံမှုများလည်း ရှိခဲ့ဖူးကြောင်း ဒေသခံများ၏ ပြောပြချက်အရသိရသည်။
