သျှမ်းပြည်တောင်ပိုင်း ပင်းတယမြို့နယ်တွင် စစ်ကောင်စီ လက်အောက်ခံ ဌာနဆိုင်ရာများက ရွေးကောက်ပွဲတွင် စစ်ကောင်စီဘက်ကို ထောက်ခံပေးရန် တစ်ရွာဝင်တစ်ရွာထွက် ဟောပြောပွဲလုပ်နေကြောင်း သတင်းရရှိသည်။
စစ်ကောင်စီ လက်အောက်ခံ ဌာနဆိုင်ရာများက လုံခြုံရေး၊ တရားဉပေဒေ စိုးမိုးရေးနှင့် ရပ်ရွာအေးချမ်း သာယာရေး၊ ဒေသဖွံ့ဖြိုးရေးလုပ်ငန်းများ ဆောင်ရွက်ရန်အတွက် မြို့နယ်အဆင့် ဌာနဆိုင်များပါဝင်သော စစ်ကြောင်းကြီး (၅) ကြောင်း နှင့် ဒေသခံပြည်သူများ တွေ့ဆုံပွဲဟု တစ်ရွာဝင်တစ်ရွာထွက် လိုက်လံဟောကြား နေကြောင်း ပင်းတယမြို့နယ် ဒေသခံတစ်ဦးက သျှမ်းသံတော်ဆင့်ကို ပြောသည်။
“လက်ရှိ သူတို့ရဲ့ လုပ်ဆောင်ချက်တွေကို လာရှင်းပြတာပေါ့။ တစ်ရွာဝင် တစ်ရွာထွက် ဟောပြောပွဲလုပ်နေပါတယ်။ ရွာသားတွေ လာနားထောင်ဖို့အတွက် ဘုန်းကြီးကျောင်းဆီကို သွားရတယ်။ တချို့ရွာတွေလည်း စာသင်ကျောင်း မှာလုပ်ကြတယ်။ ပြီးတော့ ရွေးကောက်ပွဲ ပြုလုပ်မှာမို့ စစ်ကောင်စီဖက်ကို ထောက်ခံပေးဖို့ ပြောတယ် “ ဟု ၎င်း ဒေသခံတစ်ဦးက ပြောသည်။
ဌာနဆိုင်ရာများက ပင်းတယမြို့နယ်ရှိ တောင်ပိုင်းကျေးရွာ နှင့် အနောက်ပိုင်း ကျေးရွာများတွင် လိုက်လံ ဟောကြားပြီး မြို့နယ်ထွေအုပ်က ဦးဆောင်ထားကြောင်း သိရသည်။
