သျှမ်းပြည်မြောက်ပိုင်း သိန္နီ -ကွတ်ခိုင်တွင် ဖြစ်ပွားသည့် တိုက်ပွဲကြောင့် ကလေးငယ် အပါအဝင် အရပ်သား ၃ ဦး ကျည်ထိ မှန်ပြီး လူနေအိမ်များလည်း ထိခိုက်ပျက်စီးရကြောင်း သတင်းသိရသည်။

ယမန်နေ့ (စက်တင်ဘာ ၆ ) ရက် နံနက် ၄ နာရီဝန်းကျင်မှ ၁၀ နာရီခွဲဝန်းကျင်အထိ တိုက်ပွဲပြင်းထန်စွာ ဖြစ်ပွားခဲ့ပြီး နောက် ည ၈ နာရီဝန်းကျင်တွင် လက်နက်ကြီး လက်နက်ငယ်များဖြင့် တိုက်ပွဲ ထပ်မံဖြစ်ပွားသည့်အတွက် ပြည်သူများ ထိခိုက်ဒဏ်ရာရသည့်အပြင် နေအိမ်များလည်း ထိခိုက်ပျက်စီးရကြောင်း ဒေသခံများက ပြောသည်။

“မနက်မှာ တိုက်ပွဲက တော်တော်ပြင်းထန်ဖြစ်ခဲ့ပြီးတဲ့နောက်မှာ ည ၇ နာရီဝန်းကျင်မှာ တိုက်ပွဲနောက်တစ်ခေါက် ဖြစ်တယ်၊ နာရီဝက်လောက် ထပ်ကြာတော့ ည ၈ နာရီလောက်မှာ လေယာဥ် နဲ့ လက်နက်ကြီး လက်နက်ငယ်တွေ နဲ့ တိုက်ပွဲပြန်ဖြစ်တယ်၊ မော်ဟစ်ကျေးရွာတွေဘက်ကို လက်နက်ကြီးတွေနဲ့ လှမ်းပစ်လို့ ကလေး ၂ ယောက်နဲ့ အသက် ၃၃ နှစ်အရွယ် အမျိုးသားကို လက်နက်ကြီး ကျည်ထိမှန်တယ်” ဟု အမည်မဖော်လိုသူ ဒေသခံ တစ်ဦးက သျှမ်းသံတောင်ဆင့်ကို ပြောသည်။

အဆိုပါ ပစ်ခတ်မှုသည် အာဏာသိမ်း စစ်ကောင်စီ နှင့် ကချင်လွတ်မြောက်ရေးတပ်မတော် (KIA) ပူးပေါင်းတပ်ဖွဲ့ PDF တို့က တိုက်ပွဲ ဖြစ်ပွားခဲ့ခြင်း ဖြစ်ပြီး လက်နက်ကြီး ကျည်ဆံများကြောင့် ပြည်သူ့နေအိမ် ၅ လုံးခန့် ထိခိုက်ပျက်စီးရသည့် အပြင် ပြည်သူ ၃ ဦးလည်း ထိခိုက်ဒဏ်ရာပြင်းထန်ပြီး ဆေးရုံတင်ထားရကြောင်း သိရသည်။

တိုက်ပွဲကြောင့် လမ်းသွားလမ်းလာများနှင့် ခရီးသည်များ၊ ဈေးသည်များသည် လိုရာခရီးမရောက် နောက်ကြောင်း ပြန်ဆုတ်ရသည့် အပြင် ဒေသခံ ပြည်သူများက စိုးရိမ်ထိတ်လန့် နေခဲ့ရကြောင်းလည်း ဒေသခံများက ပြောသည်။

“တိုက်ပွဲက တော်တော်ပြင်းထန်ခဲ့ပါတယ်၊ မြေကြီးတောင် တုန်သွားတယ်၊ မနက်က နေ့တစ်ပိုင်း လုံးတိုက်ပွဲဖြစ်ခဲ့ ပြီး၊ ညရောက်လည်း တိုက်ပွဲက ထပ်ဖြစ်တယ်ဆိုတော့ ကြောက်ကြတယ်၊ အခု တိုက်ပွဲငြိမ်သွားပေမဲ့လည်း စိုးရိမ်မှုကတော့ ထပ်ရှိနေဆဲပဲ” ဟု အထက်ပါ အမျိုးသမီးက ဆက်လက်ပြောဆိုထားသည်။

စက်တင်ဘာလ ၆ ရက်နေ့ တစ်ရက်တည်းတွင်ပင် အာဏာသိမ်း စစ်ကောင်စီနှင့် KIA ပူးပေါင်းတပ်ဖွဲ့တို့သည် သိန္နီ နှင့် ကွတ်ခိုင်ကြားတွင် မနက်ခင်း တစ်ကြိမ်၊ နမ့်ဖတ်ကာ ဟန်ကိုင်ကျေးရွာ အနီးတွင် ညနေခင်းပိုင်းတစ်ကြိမ် နှင့် ည ၈ နာရီဝန်းကျင်တွင် တစ်ကြိမ် စုစုပေါင်း ၃ ကြိမ် တိုက်ပွဲဖြစ်ပွားခဲ့ကြောင်း သတင်းသိရသည်။

လက်ရှိတွင် တိုက်ပွဲကြား ထိခိုက်ဒဏ်ရာရသည့် ပြည်သူများ နှင့် နေအိမ်ပျက်စီးဆုံးရှုံးရသည့် နေအိမ်များကို မည်သည့်လက်နက်ကိုင်တပ်ဖွဲ့၊ အဖွဲ့အစည်းမှ လာရောက်ကူညီ တာဝန်ယူပေးခြင်း မရှိကြောင်းလည်း သိရသည်။