သျှမ်းပြည်တောင်ပိုင်း မိုးနဲမြို့တွင် ၂ နှစ် အရွယ် ကလေးငယ် အပါအဝင် မိသားစုဝင် (၃) ဦးကို ဆွေမျိုးတော်စပ်သည့် အမျိုးသားတစ်ဦးက ဓားဖြင့် ခုတ်သတ်လိုက်ကြောင်း စုံစမ်းသိရသည်။
စက်တင်ဘာ (၂) ရက် မနက်ပိုင်းတွင် မိုးနဲမြို့ လွိုင်မြေရပ်ကွက်တွင် နေထိုင်သည့် အသက် (၅၀) ကျော် အမျိုးသားတစ်ဦးသည် အသက် (၇၅) နှစ်အရွယ်ရှိ အမျိုးသမီးတစ်ဦး၊ အသက် (၂) နှစ် အရွယ် ကလေးငယ်တစ်ဦး နှင့် အသက် (၃၀) အရွယ်ရှိ အမျိုးသမီးတစ်ဦးကို ဓားဖြင့် လာခုတ်သတ်သွားကြောင်း မိုးနဲမြို့နေ ဒေသခံအမျိုးသမီး တစ်ဦးက သျှမ်းသံတော်ဆင့်ကိုပြောသည်။
“လာသတ်တဲ့သူက အသက် (၇၅) နှစ်အရွယ် အဘွားရဲ့ သမက်ပါ။ ကလေးငယ်ရဲ့ ဦးလေးတော်မယ်။ အမျိုးသမီးရဲ့ ခဲအိုပေါ့။ ဆေးကြောင်ပြီး သူ့ယောက္ခထီးကို အရင် ဓားနဲ့ ခုတ်လိုက်တာ။ နောက် မီဖိုးထဲမှာနေတဲ့ အမျိုးသမီးက ကလေးငယ်ယူပြီး ထွက်ပြေးချိန် သူတို့ (၂) ယောက်ကိုလည်း ဓားနဲ့ခုတ်သတ်လိုက်တာ “ ဟု ၎င်းအမျိုးသမီးက ပြောသည်။
အဆိုပါ မှုခင်းဖြစ်ပွားပြီးလျှင် သတ်ဖြတ်ခတ်ခံရသူ မိသားစု (၃) ဦးကို ရင်ခွဲဆေးရုံသို့ ပို့ဆောင်ခဲ့ရပြီး ယမန်နေ့တွင် မီးသင်္ဂြိုလ်လိုက်ခဲ့ကြောင်း သိရသည်။
အပြစ်ကျူးလွန်သူ အမျိုးသားတစ်ဦးကို သက်ဆိုင်ရာအရာရှိရဲများက ဖမ်းဆီးခေါ်သွားပြီး မိုးနဲမြို့ရဲစခန်းတွင် ချုပ်နှောင်ထားခဲ့ကာ မည်သည့် ဉပဒေဖြင့် အရေးယူမည်ဖြစ်ကြောင်း မသိရသေးပေ။
“အခု မူးယစ်ဆေးဝါးက နေရာတိုင်းမှာရောင်းတယ်။ ဈေးနှုန်းလည်း ပေါတယ်။ အခုလူငယ်တွေလည်း မူးယစ်ဆေးဝါး သုံးစွဲကြတာ များလာတယ်။ ဆေးသမားတွေများလာတော့ အရမ်းကို စိုးရိမ်နေတယ်။ သက်ဆိုင်ရာက ရဲတွေ၊ လက်နက်ကိုင်တပ်ဖွဲ့တွေ ဖမ်းဆီးအရေးယူပေးဖို့ လိုတယ် “ ဟု ၎င်းဒေသခံ တစ်ဦးက ပြောသည်။
အလားတူ မိုးနဲမြို့တွင် သက်ဆိုင်ရာ ရဲတပ်ဖွဲ့များက ဖမ်းဆီးထားသော သူခိုး၊ ဓားမြ များသည် (၂) ရက်အတွင်းမှာ ပြန်လွှတ်ပေးသောကြောင့် ဒေသခံများ၏ လုံခြုံရေးသည် ပိုဆိုးဝါးလာနိုင်ကြောင်း ဒေသခံများ ပြောချက်အရ သိရသည်။
Leave a Comments