သျှမ်းပြည်မြောက်ပိုင်း နောင်ချိုမြို့နယ် ဒိုးပင်ကျေးရွာ အမျိုးသားတစ်ဦး၏ ကားကို စစ်ကောင်စီမှ ချောဆွဲခေါ်သွားချိန် မန္တလေး PDF ဘက်က တစ်ဖက်သတ်ပစ်ခတ်မှုကြောင့် ၎င်းအမျိုးသား ကျည်ထိမှန်ကာ ဆေးကုသရန် ခက်ခဲနေကြောင်း စုံစမ်းသိရသည်။
ဖြစ်စဉ်မှာ ဇူလိုင်လ ၂၈ ရက် နေ့လည် ၁ နာရီက စစ်ကောင်စီမှ ဒိုးပင်ကျေးရွာသား၏ ကားကိုချောဆွဲသွားစဥ် လမ်းတွင် မန္တလေး PDF မှ တဖက်သတ်ပစ်ခတ်ခဲ့ပြီး အသက် (၄၅) နှစ်အရွယ်ရှိ ဦးတေဇ ၏ ဗိုက်ကို ကျည်ထိမှန်ခဲ့သည်။
“သူ့ကို စစ်ကောင်စီတွေကို သွားပို့ဖို့ ဆိုပြီးတော့ ချောပို့ခေါ်သွားတာ။ နားကျိုင်းရွာအကျော်မှာ တိုက်ပွဲဖြစ်တော့ သူ့ကို သေနတ်ပစ်မိသွားတာ။ ဗိုက်ကိုထိပြီး နောက်ကျောထိပေါက်သွားတာ။ လက်ရှိမှာ အစာအိမ်ကို ထုတ်ထားရတယ်။ သူအခုတော့ စစ်ဘေးရှောင်စခန်းမှာ ရောက်နေတာ။ သူဆေးကုသဖို့ ခက်ခဲနေတယ်” ဟု စစ်ဘေးရှောင်ကို ကူညီပေးနေသည့် အမျိုးသမီးတစ်ဦးက ပြောသည်။
အဆိုပါ ဦးတေဇ သည် လက်ရှိမှာ ဆေးကုသရန် ခက်ခဲနေပြီး အလှူရှင်မရှိသောကြောင့် အိမ်တွင်းပစ္စည်းများကို ရောင်းချနေရသည်။
“ သူတို့ ဆေးကုသဖို့ ခက်ခဲနေတာ။ သူတို့ အလှူရှင်က မရှိဘူးလေ။ အရင်က ကျေးရွာအတွင်းမှာ အလှူငွေ ကောက်ပေးတာ။ အခုထိမရသေးဘူး။ သူတို့ အခုရှိတာကို ရောင်းပြီးတော့ ဆေးကုသနေရတာ။ ကျွဲ၊နွားတွေ လယ်ကွက်တွေ ရောင်းပြီးတော့ စားဝတ်နေရေးအတွက်နဲ့ ဆေးကုဖို့လုပ်နေကြရတာ” ဟု ၎င်းကပြောသည်။
နောင်ချိုမြို့နယ်တွင် စစ်ကောင်စီ နှင့် မန္တလေး PDF တို့ ဩဂုတ် ၂၄ ရက် က တိုက်ပွဲဖြစ်ပြီး ပြည်သူ (၁၀၀၀) ဝန်းကျင် ထွက်ပြေးတိမ်းရှောင်နေကြရကြောင်းသိရသည်။
Leave a Comments