သျှမ်းပြည်မြောက်ပိုင်း ကွတ်ခိုင်မြို့နယ်ရှိ ဇွပ်အောင်ကျေးရွာမှ ပြည်သူတစ်ဦးနှင့် တခြားရွာသား တစ်ဦးကို ကိုးကန့်တပ်မတော် (MNDAA) တပ်သားများ ရိုက်နှက်ပြီး လက်ရှိအချိန်ထိ တာဝန်ယူဖြေရှင်းပေးခြင်းမရှိကြောင်း သတင်း သိရသည်။

ဩဂုတ် ၁၇ ရက် ည ၁၀ နာရီဝန်းကျင်တွင် MNDAA တပ်သား ၁၀ ဦးခန့်သည် ဇွပ်အောင် စစ်ရှောင်မှ ရွားသားတစ်ဦး နှင့် ဒေါင်လုံရွာကော်မတီ ဒုဥက္ကဋ္ဌတစ်ဦးကို ဖမ်းဆီးရိုက်နှက်ပြီးနောက် သက်ဆိုင်ရာ တာဝန်ရှိသူများထံ တိုင်တန်းပြောဆိုထားသော်လည်း ယနေ့အချိန်ထိ ဖြေရှင်းပေးခြင်း မရှိကြောင်း ဒေသခံများက ပြောသည်။

“MNDAA တပ်သားတွေက သူတို့နှစ်ယောက်ကို လာဖမ်းပြီး ရိုက်နှက်တာ၊ သေနတ်ဒင် နဲ့ ပြောင်းနဲ့ ထိုးပြီး ရိုက်ကြတာ၊ မနက်ရောက်လို့ ရွာသားတွေသွားကယ်ထုတ်နိုင်ခဲ့ချိန် သူတို့နှစ်ဦးဒဏ်ရာ တော်တော် များတယ်၊ ဒီအကြောင်းကို MNDAA သက်ဆိုင်သူနဲ့ ပြောထားပေမယ့် ဒီနေ့အထိ ဘာမှအကြောင်းမပြန်သေးဘူး” ဟု ဇွပ်အောင်စခန်းမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

ယင်းဖမ်းဆီးရိုက်နှက်မှုဖြစ်ပွားပြီးနောက် သြဂုတ်လ ၂၀ ရက်တွင် ရွာခံလူကြီးများ နှင့် စစ်ရှောင် ကော်မတီများ စုပေါင်းကာ ကွတ်ခိုင်မြို့နယ်ရှိ MNDAA တာဝန်ရှိသူများနှင့် ဆွေးနွေးတိုင်ကြားမှုများရှိသော်လည်း မည်သည့်တုန့်ပြန် ချက်မှ မပေးခဲ့ကြောင်း ဇွပ်အောင်စခန်းမှ တာဝန်ရှိသူက ပြောသည်။

ထို့အပြင် စစ်ရှောင်များ ရှိနေသည့် ကျေးရွာဒေသအတွင်း၌ လက်နက်ကိုင်တပ်ဖွဲ့ဝင်များ အနေဖြင့် လာရောက်နေရာယူခြင်းနှင့် ပတ်သက်ပြီး ရုတ်သိမ်းပေးရန် တောင်းဆိုချက်လည်း MNDAA မှ တုန့်ပြန်ခြင်း မရှိကြောင်း ၎င်းက ဆက်ပြောသည်။

“ကျနော်တို့ ရွာသားနှစ်ဦး MNDAA ရိုက်နှက်ခံရမှုကြောင့် တာဝန်ယူပေးဖို့ တောင်းဆိုချက်အပါအဝင် ဇွပ်အောင်စစ်ရှောင်စခန်းကနေ MNDAA တပ်ဖွဲ့တွေ ပြန်ရုပ်သိမ်းပေးဖို့ တောင်းဆိုချက်လည်း ပြောင်းလဲတာ မရှိသေးဘူး၊ ဘာမှလည်းမတုန့်ပြန်ဘူး၊ ကျနော်တို့ရွာသားတွေကဘာမှ မတတ်နိုင်ခဲ့ဘူး” ဟု တာဝန်ရှိသူ ထပ်လောင်းပြောသည်။

လက်ရှိတွင် ဇွပ်အောင်ရွာခံများ၊ ဒေါင်လုံကျေးရွာ၊ ကာလျန်ကျေးရွာ၊ နားခန်ကျေးရွာ စသည့် ကျေးရွာများမှ ပြည်သူများသည် MNDAA တပ်ဖွဲ့ကို တောင်းဆိုချက် ၃ ချက်ပါတဲ့ သဘောထား ထုတ်ပြန်ချက် ထုတ်ပြန်ခဲ့ပေမဲ့ တုန့်ပြန်မှုမရှိသည့်အတွက် ပြည်သူ့အင်အားပြသသည့်အနေဖြင့် ဆက်လက်ဆောင်ရွက်သွားမည်ဟု သိရသည်။