သျှမ်းပြည်မြောက်ပိုင်း နောင်ချိုမြို့နယ် စစ်ဘေးရှောင်များအတွက် ကျန်းမာရေးအတွက် ဆေးဝါး လိုအပ်နေကြောင်း စုံစမ်းသိရှိရသည်။
လက်ရှိ မိုးရာသီဖြစ်သည့်အတွက်ကြောင့် မိခင်နှင့်အမျိုးသမီး၊ ကလေးသူငယ်များအတွက် ဆေးဝါး လိုအပ်နေကြောင်း သိရသည်။
“အခုက ဆေးဝါးတွေ ပိုလိုအပ်တယ်။ စားဝတ်နေရေးလည်း ခက်ခဲတာပေါ့။ အမျိုးသမီးတွေအတွက်ဆို လစဉ်သုံးတွေက လိုတယ်။ ကိုယ်ဝန်ဆောင် မိခင် နဲ့ ကလေးတွေ အတွက်က ဆေးတွေလိုနေတယ်။ အခုက ရာသီတုပ်ကွေးလည်း ဖြစ်တယ်လေ။ ကလေးတွေလည်း နေသိပ်မကောင်းကြဘူး” ဟု စစ်ဘေးရှောင်များကို ကူညီပေးနေသည့် အမျိုးသမီးက ပြောသည်။
အဆိုပါ ဒိုးပင်ကျေးရွာမှာ ရောက်နေသည့် စစ်ရှောင်ထဲတွင် ကိုယ်ဝန်ဆောင် အမျိုးသမီး ၉ ဦးရှိနေပြီး ယခုလအတွင်း (၃) ဦး မွေးဖွားရန်ရှိသဖြင့် မွေးဖွားစားရိတ်လိုအပ်နေသည်။
ထိုအပြင် ဟိုခိုကျေးရွာတွင် ရောက်နေသည့် စစ်ရှောင်များတွက်က သောက်ရေသန့်တွေလိုအပ်နေကြောင်း သိရသည်။
“ ဒီဒိုးပင်မှာက ကိုယ်ဝန်ဆောင် (၉) ယောက်ထဲမှာ ဒီလ ၃ ယောက်မွေးမှာ။ သူတို့အတွက် မွေးစားရိတ်တွေ လိုအပ်နေတယ်။ ဟိုခိုကျေးရွာမှာဆိုရင်လည်း သောက်ရေသန့်တွေကို ဝယ်သောက်နေရတယ်။ မိုးရွာတော့ ချောင်းရေတွေလည်း သောက်လို့ အဆင်မပြေဘူးလေ” ဟု စစ်ဘေးရှောင်များကို ကူညီပေးနေသည့် သူက ပြောသည်။
နောင်ချိုမြို့နယ်တွင် စစ်ဘေးရှောင်စုစုပေါင်း (၂၅၀) အိမ်ထောင်စုရှိပြီး လူဦးရေ (၁၀၀၀) ဝန်းကျင်ရှိနေပြီ ဖြစ်ကြောင်း သိရသည်။
လက်ရှိ ဒိုးပင်ကျေးရွာဘုန်းကြီးကျောင်းမှာ ၆၀၀ နီးပါးရှိပြီး၊ ဟိုခိုကျောင်းတိုက်တွင် ၁၁၀ ဦး နှင့် ကလားကွဲဘုန်းကြီးကျောင်းတွင် ၁၅၀ ကျော်ရှိကြောင်း သိရသည်။
Leave a Comments