သျှမ်းပြည်မြောက်ပိုင်း နောင်ချိုမြို့နယ် နှင့် ပြင်ဦးလွင်မြို့နယ်ကြားရှိ ကုန်းတစ်မော့ ကျေးရွာတွင် စစ်ကောင်စီ နှင့် မန္တလေး PDF တို့ တိုက်ပွဲဖြစ်ပွားခဲ့ကြောင်း သတင်းရရှိသည်။
အဆိုပါ တိုက်ပွဲသည် ယမန်နေ့ ဩဂုတ် ၂၉ ရက် ည ၅ နာရီတွင်တစ်ကြိမ်၊ ယနေ့ နေ့လည် ၁ နာရီဝန်းကျင်တွင် တစ်ကြိမ်တိုက်ပွဲ ဖြစ်ပွားခဲ့ကြောင်း မန္တလေး PDF တပ်ဖွဲ့မှ ရဲဘော် မိုးကြိုး က သျှမ်းသံတော်ဆင့် ကို ပြောသည်။
“ ၂၉ ရက် ညနေ ၅ နာရီကျော်လောက်က တစ်နာရီကြာ တိုက်ပွဲဖြစ်တယ်။ ပြင်ဦးလွင်မြို့နယ် နဲ့ နောင်ချိုမြို့နယ်ကြားက ကုန်းတစ်မော့ဆိုတဲ့ ရွာနားမှာဖြစ်နေတာ။ ဒီနေ့မနက်လည်း ဖြစ်နေဆဲပဲ” ဟု မန္တလေး PDF မှ ရဲဘော်မိုးကြိုး က ပြောသည်။
ယနေ့ သြဂုတ် (၃၀) ရက် တိုက်ပွဲသည် စစ်ကောင်စီတပ်ဘက်မှ PDF ထောင်ထားသည့် မိုင်းများကို နင်းမိကာ ဒဏ်ရာအများပြားရရှိခဲ့ကြောင်း သိရသည်။
“ သူတို့ဘက်က အင်အား ၅၀၀ လောက်ရှိမယ်။ ကျနော်တို့ မိုင်းထောင်ထားတဲ့နေရာမှာ သူတို့ဝင်လာခဲ့တာ။ မိုင်း ၃ လုံးလောက်ပေါက်ကွဲသွားတယ်။ ကျနော်တို့ဘက်တော့ ထိခိုက်ဒဏ်ရာရတာတော့ မရှိဘူး။ စစ်ကောင်စီဘက်တော့ ၄၀ အထက် ဒဏ်ရာရတယ်လို့ကြားတယ်။ အဲ့ထဲမှာ ပစ်ခတ်မှုကြောင့် ဒဏ်ရာရတဲ့သူတွေလည်း ပါတယ်” ဟု မန္တလေး PDF က ပြောသည်။
စစ်ကောင်စီ နှင့် မန္တလေး PDF တို့သည် ပြီးခဲ့သည့် ဩဂုတ် ၂၄ ရက်နေ့မှ စပြီး နောင်ချိုမြို့နယ် ဒိုးပင်ကျေးရွာ အုပ်စုထဲတွင် တိုက်ပွဲစတင်ဖြစ်ပွားခဲ့ကြောင်း သိရသည်။
လက်ရှိမှာလည်း တိုက်ပွဲကြောင့် ပြည်သူ (၁,၀၀၀) နီးပါးက စစ်ဘေးရှောင်နေရကြောင်း သိရသည်။
