မြန်မာ – တရုတ် နယ်စပ်ဖြစ်သည့် သျှမ်းပြည်မြောက်ပိုင်း မူဆယ်မြို့တွင် ယနေ့ငွေလဲလှယ် ဈေးနှုန်းသည် တရုတ်ယွမ်ငွေ ၁၀၀ ယွမ်ကို မြန်မာကျပ်ငွေ (၄၆,၉၅၀) ကျပ်အထိ မြင့်တက်နေကြောင်း စုံစမ်းသိရှိရသည်။

ယခုလ သြဂုတ် ၁၄ ရက်တွင် တရုတ်ယွမ်ငွေ (၁၀၀) ယွမ်ကို မြန်မာကျပ်ငွေ (၄၀,၀၀၀) ကျပ်အထိ မြင့်တက်ခဲ့ရာ (၁၅) ရက်အတွင်း မြန်မာကျပ်ငွေကို ခြောက်ထောင် (၆,၀၀၀) ကျော်အထိ မြင့်တက်လာကြောင်း မူဆယ်မြို့ ငွေလဲလှယ်သူ အမျိုးသမီးတစ်ဦးထံမှ သိရသည်။

“ဒေါ်လာ ဈေးနှုန်းတက်လာကတည်းက မြန်မာကျပ်ငွေက တန်ဖိုးကျသွားတယ်။ မြန်မာကျပ်ငွေက ဈေးနှုန်းမရှိတော့ တရုတ်ယွမ်ငွေဈေးနှုန်းလည်း တစ်နေ့တခြားမြင့်တက်လာတာပဲ။ အခုဈေးနှုန်းတက်နေတာ နေ့တိုင်းပုံမှန် တက်တာမဟုတ်ဘူး။ တစ်ခါမှ တစ်ကြိမ်အများကြီး တက်သွားတာ။ တချို့နေရာတွေမှာ ၁၀၀ ယွမ်ကို (၅၀,၀၀၀) ကျပ်အထိ တက်သွားတာရှိနေတယ် “ ဟု ၎င်းအမျိုးသမီးတစ်ဦးက ပြောသည်။

ယွမ်ငွေများ မြင့်တက်လာခြင်းကြောင့် ငွေလဲလှယ်သူများ နှင့် ကုန်သည်များသည် အခက်ခဲများစွာ ကြုံတွေ့နေရပြီး ကုန်သည်များသည် ယခင်ထက် တရုတ်ယွမ်ငွေကိုသာ ပိုမိုကိုင်ဆောင်ထားသူ များလာကြောင်း ၎င်းကဆက်ပြောသည်။

အလားတူ တရုတ်ယွမ်ငွေ အဆမတန် မြင့်တက်လာခြင်းနှင့်အတူ ကုန်ပစ္စည်းများလည်း တစ်နေ့တခြား ဈေးနှုန်းတက်လာသဖြင့် ပြည်သူများ စားဝတ်နေရေးအတွက် ပိုမိုခက်ခဲလာကြောင်း မူဆယ်မြို့ဒေသခံ တစ်ဦးက သျှမ်းသံတော်ဆင့်ကို ပြောသည်။

“ကုန်ပစ္စည်းတွေလည်း မနေ့ကသွားဝယ်လို့ရတဲ့ ဈေးနှုန်းက ဒီနေ့သွားဝယ်မယ်ဆိုရင် အဲ့ဈေးနှုန်းနဲ့ မရဘူး။ တစ်နေ့ထက်တစ်နေ့ ကုန်ပစ္စည်းဈေးနှုန်းတွေက အဆမတန်မြင့်တက်လာတယ်။ ပြည်သူတွေက ပိုကြပ်တည်း လာတယ်။ သာမာန်နေ့စား အလုပ်သမားတွေလည်း ပိုပြီးခက်ခဲသွားတာပေါ့ “ ဟု ၎င်းဒေသခံ တစ်ဦးကပြောသည်။

အဆိုပါ စစ်အာဏာသိမ်းပြီး (၁) နှစ်ကျော်ကာလအတွင်း စစ်အာဏာရှင်စနစ်၏ မှုဝါဒ ပြောင်းလဲမှုနှင့် မြန်မာပြည် ထွက်ကုန်ပစ္စည်းမရှိသည့်အတွက် အမေရိကန် ဒေါ်လာ ဈေးနှင့်အတူ တရုတ်ယွမ်ငွေ ၊ ထိုင်းဘတ်ငွေ များလည်း မြင့်တက်လာခဲ့ရကြောင်း သိရသည်။