Saturday, December 3, 2022

ပင်လောင်းမြို့နယ် PNO တပ်ဖွဲ့ မူးယစ်ဆေးဝါး သုံးစွဲသူများဟု စွပ်စွဲပြီး ငွေတောင်းယူနေ

Must read

သျှမ်းပြည်တောင်ပိုင်း ပင်လောင်းမြို့နယ်ရှိ အရပ်သား (၃) ဦးကို ပြည်သူ့စစ် (PNO) တပ်ဖွဲ့က မူးယစ်ဆေးဝါးသုံးစွဲသူများဟု စွပ်စွဲကာ ပိုက်ဆံတောင်းယူနေကြောင်း စုံစမ်းသိရသည်။

ပင်လောင်းမြို့နယ် ဘီလူးချောင်း အရှေ့ဘက်ကမ်းရှိ ကျေးရွာမှ လင်မယား (၂) ဦး နှင့် အသက် (၃၀) အရွယ်ရှိ အမျိုးသားတစ်ဦးကို ပြည်သူ့စစ် (PNO) အဖွဲ့များက မူးယစ်ဆေးဝါး အကြောင်းပြပြီး ဖမ်းဆီးခေါ်ဆောင်ခဲ့သည်။

အဆိုပါ ဖမ်းဆီးခေါ်ဆောင်သော ရွာသား (၃) ဦးကို တစ်ဦးလျှင် မြန်မာကျပ်ငွေ သိန်း (၃၀) တောင်းယူခဲ့ပြီး ယမန်နေ့ သြဂုတ် ၂၄ ရက်တွင် အသက် (၃၀) ကျော် အမျိုးသားတစ်ဦးသည် ကျပ်ငွေ (၁၅) သိန်း ပေးဆောင်လိုက်သဖြင့် ပြန်လွှတ်ပေးခဲ့ကြောင်း ပင်လောင်းဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

ပင်လောင်းမြို့

“မနေ့က တစ်ယောက်ကို ပြန်လွှတ်လာပေးတယ်။ ပြန်လွှတ်လာပေးဖို့အတွက် (၁၅)သိန်း လောက်တော့ ကုန်တယ်။ အခုပြည်သူ့စစ်တွေက လုပ်စားနေတာပဲ။ မူးယစ်ဆေးဝါး ပတ်သက်တဲ့သူကို လိုက်ဖမ်းပြီး ပိုက်ဆံတောင်းနေတာ“ ဟု ၎င်းဒေသခံ တစ်ဦးက ပြောသည်။

လက်ရှိအချိန်ထိ ပိုက်ဆံမပေးရသေးသည့် လင်မယား (၂) ဦး သည် ပြန်လွှတ်မြောက်လာခဲ့ခြင်းမရှိသေးဘဲ ထီရီး စခန်းတွင် ဖမ်းဆီးချုပ်နှောင်ထားကြောင်း သိရသည်။

အလားတူ ပအိုဝ်းပြည်သူ့စစ် (PNO) တပ်ဖွဲ့များက မူးယစ်ဆေးဝါး ဖမ်းဆီးဆောင်ရွက်ရေးအတွက် အမှန်တကယ် ပြုလုပ်ခြင်းအပေါ်တွင် ပြည်သူများကို အကြောင်းပြချက်နည်းမျိုးစုံဖြင့် ဖမ်းဆီးခြင်း၊ ပိုက်ဆံတောင်းယူခြင်းများ မပြုလုပ်စေလိုကြောင်း လူမှုပရဟိတ ဆောင်ရွက်နေသည့် အမျိုးသားတစ်ဦး ပြောသည်။

“မူးယစ်ဆေးဝါး တိုက်ဖျက်တယ်ဆိုတာ ကောင်းတယ်။ မလုပ်နဲ့မဟုတ်ဘူး လုပ်ပါ။ မူးယစ်ဆေးဝါးကို တကယ် သုံးစွဲတဲ့သူတွေ လိုက်ဖမ်းပေါ့။ အခုက ရွာသားတွေ မူးယစ်ဆေးဝါး သုံးလို့လာဖမ်းသွားတယ်။ ပြီးရင် ပိုက်ဆံတောင်းပြီး ပြန်လွှတ်ပေးတယ်။ ဒါက ပြည်သူကို ပိုက်ဆံတောင်းယူနေတဲ့ နည်းလိုပဲ “ ဟု ၎င်းအမျိုးသား တစ်ဦးက ပြောသည်။

ထို့အပြင် ယခုလက်ရှိ ရွာသား (၃) ဦးကို ဖမ်းဆီးခေါ်ဆောင်သွားသော ပြည်သူ့စစ်များသည် ညောင်ရွှေမြို့နယ်၊ ထီရီကျေးရွာ အခြေစိုက် (PNO) တပ်ဖွဲ့များဖြစ်ကြောင်းလည်း သိရသည်။

Leave a Comments

- Advertisement -spot_img

Latest article