သျှမ်းပြည်မြောက်ပိုင်း နောင်ချိုမြို့နယ် နှင့် မန္တလေးမြို့ နယ်စပ်တွင် စစ်ကောင်စီ နှင့် မန္တလေး PDF တို့ တိုက်ပွဲဖြစ်ပွားခဲ့ကြောင်း စုံစမ်းသိရှိရသည်။
ယမန်နေ့ ဩဂုတ် ၂၄ ရက် နောင်ချိုမြို့နယ် ကြံခင်း၊ လုံခင်းကျေးရွာဘက်တွင် စစ်ကောင်စီ နှင့် မန္တလေး PDF တို့ တိုက်ပွဲဖြစ်ပွားခဲ့ပြီး ကျေးရွာဒေသခံများက ထွက်ပြေးတိမ်းရှောင်ခဲ့ရကြောင်းသိရသည်။
“တိုက်ပွဲဖြစ်ပွားခဲ့တာဟုတ်ပါတယ်။ ကျနော်တို့ တိုက်ပွဲဖြစ်တဲ့နေရာက မန္တလေးမြို့ နဲ့ နောင်ချိုမြို့ ကြားက နယ်စပ်ပေါ့။ တိုက်ပွဲဖြစ်တော့ ပြည်သူတွေ ထွက်ပြေးတိမ်းရှောင်ရတာရှိတယ်။ စစ်ကောင်စီက ရဟတ်ယာဉ်တွေနဲ့ ကူပစ်ပေး နေတာရှိတယ်” ဟု မန္တလေးမြို့ PDF တပ်ဖွဲ့မှ တာဝန်ရှိသူ ရဲဘော်မိုးကြိုးက က သျှမ်းသံတော်ဆင့် ကို ပြောသည်။
ယမန်နေ့ တိုက်ပွဲဖြစ်ပွားသည့် တိုက်ပွဲသည် တစ်နေကုန်ဖြစ်ပွားခဲ့ပြီး စစ်ကောင်စီက ရဟတ်ယာဉ်အသုံးပြုလာတာကြောင့် တပ်ဆုတ်ခဲ့ရကြောင်း သိရသည်။ ထိုအပြင် စစ်ကောင်စီဘက်က အကျဆုံးများပြီး PDF ဘက်မှ ထိခိုက်ဒဏ်ရာရရှိခဲ့ကြောင်း သိရသည်။
“တိုက်ပွဲကတော့ တစ်နေကုန် နီးပါးဖြစ်ခဲ့တယ်လို့ပြောလို့ရတယ်။ ကျနော်တို့ဘက်တော့ ဒဏ်ရာ အနည်းငယ်စီ ရရှိခဲ့ကြတယ်။ စစ်ကောင်စီဘက်ကတော့ အကျဆုံးရှိတယ်လို့ပြောတယ်။ ကျနော်နား စာရင်းတွေမတက်လာသေးတော့ အကျအဆုံး ဘယ်လောက်ရှိလဲဆိုတာ အတည်မပြုနိုင်သေးဘူး” ဟု ရဲဘော်မိုးကြိုးက ဆိုသည်။
အဆိုပါ တိုက်ပွဲကြောင့် လုံခံကျေးရွာ၊ ကြံခင်း၊ ရတနာသိင်္ဂီ ကျေးရွာ တို့ ဒေသခံများက ထွက်ပြေးတိမ်းရှောင်ရကြောင်း သိရသည်။
နောင်ချိုမြို့နယ်တွင် မန္တလေး PDF နှင့် စစ်ကောင်စီတို့က ဩဂုတ်လ အတွင်းမှစပြီး တိုက်ပွဲဖြစ်ပွားခဲ့ကြောင်းသိရသည်။
Leave a Comments