Monday, July 22, 2024

မန်တုံမြို့နယ်အတွင်း တိုက်ပွဲဖြစ်ပွား

Must read

သျှမ်းပြည်မြောက်ပိုင်း မန်တုံမြို့နယ်အတွင်းတွင် အာဏာသိမ်းစစ်ကောင်စီ နှင့် တိုင်းရင်းသားလက်နက်ကိုင် ပူးပေါင်းတပ်ဖွဲ့တို့က ထိတွေ့တိုက်ပွဲ ဖြစ်ပွားနေကြောင်း သတင်းသိရသည်။

ယနေ့ (သြဂုတ် ၂၅) ရက် နံနက် ၈ နာရီ ၄၀ မိနစ်ဝန်းကျင်မှ စတင်ကာ နားလေကျေးရွာ နှင့် ပန်ဝါကျေးရွာ အကြားတွင် ထိတွေ့တိုက်ပွဲဖြစ်ပွားခြင်းဖြစ်ပြီး စစ်ကောင်စီတပ် အမှတ် ၃၂၇ တပ်ကုန်းမှ လက်နက်ကြီးဖြင့် ပစ်ကူနေကြောင်း ဒေသခံများက ပြောသည်။

“လက်နက်အသံစကြားရတာက ၈ နာရီ ၄၀ မိနစ် လောက်မှာပါ၊ စစ်ကောင်စီတပ်က KIA နဲ့ PDF တို့နဲ့ တိုက်ပွဲဖြစ် နေတာလို့သတင်း သိရတယ်၊ အခုတော့ စကစ က ၃၂၄ တပ်ကုန်းကနေ လက်နက်ကြီးနဲ့ ပန်ဝါရွာဖက် ပစ်ကူတာ ၁၀ လုံး ကျော်နေပြီ” ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

မန်တုံမြို့နယ်ထဲ KIA တပ်တို့ ဝင်ရောက်လှုပ်ရှားပုံ

ကချင်လွတ်မြောက်ရေး တပ်မတော် KIA နှင့် ပူးပေါင်းတပ်ဖွဲ့ PDF တို့ နမ္မတူမြို့နယ်နှင့် မန်တုံမြို့နယ်အစပ် ပန်ဝါကျေးရွာအနီးသို့ ရောက်လာခဲ့ ခြင်းဖြစ်ကြောင်း ဒေသခံများ ပြောကြားချက်အရသိရသည်။

“ဒီဘက်ကို ရောက်လာတဲ့ KIA + PDF တွေက ရောက်လာတယ်။ စုပေါင်းအင်အား ၁၀၀ ကျော်လောက်ရှိတယ်၊ အရင်ကလည်း ထိတွေ့တိုက်ပွဲတွေ ဖြစ်ခဲ့ပါတယ်၊ ဒီနေ့အထိဆိုပါတော့၊ စကစ ဘက်က ထိခိုက်ကျဆုံးမှုတွေလည်းရှိတယ်ကြားရတယ်” ဟု အထက်ပါ အမျိုးသားက ဆက်ပြောသည်။

လက်ရှိတွင် စစ်ရှောင်ပြည်သူများ မရှိသေးကြောင်း နှင့် နှစ်ဖက်တပ်သားများ၏ ထိခိုက်သေဆုံးမှု အရေအတွက် များလည်း မသိရသေးကြောင်း သတင်းသိရသည်။

အဆိုပါ ထိတွေ့တိုက်ပွဲဖြစ်ပွားမှုများကြောင့် နှစ်ဖက်တပ်သားများ ထိခိုက်သေဆုံးမှု ရှိနေပြီး စစ်ကောင်စီမှ ဒဏ်ရာရ ၎င်းတို့တပ်သားများကို ၃၂၄ တပ်အတွင်းသို့ ပို့ဆောင်ကုသကြောင်း ဒေသခံများက ပြောကြားသော်လည်း သျှမ်းသံတော်ဆင့်အနေဖြင့် သီးခြားအတည်ပြုနိုင်ခြင်း မရှိပေ။

ယနေ့ တိုက်ပွဲဖြစ်ပွားသည့် နေရာသည် စစ်ကောင်စီတပ် ၊ တအာင်း (ပလောင်) အမျိုးသားလွတ်မြောက်ရေး တပ်မတော်၊ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့နှင့် တိုက်ပွဲမကြာခဏ ဖြစ်ပွားလေ့ရှိသည့်အပြင် ယခုလ ၂၁ ရက်နေ့တွင် ရောက်လာသည့် KIA ပူးပေါင်းတပ်ဖွဲ့တို့နှင့်လည်း တိုက်ပွဲဖြစ်ကြောင်းသိရသည်။

Leave a Comments

- Advertisement -spot_img

Latest article