သျှမ်းပြည်တောင်ပိုင်း လွိုင်လင်ခရိုင် လဲချားမြို့တွင် ယခုရက်ပိုင်းအတွင်း သူခိုး၊ ဓားပြများ ပိုမိုသောင်းကျန်း လာသဖြင့် ပြည်သူများက လုံခြုံရေးအတွက် စိုးရိမ်နေကြကြောင်း စုံစမ်းသိရှိရသည်။
လဲချားမြို့ရှိ နောင်ပန်ကျေးရွာတွင် ယခု ရက်ပိုင်းအတွင်း ပြည်သူနေအိမ်များ မကြာခဏ ဖောက်ထွင်းခိုးခံနေရကြောင်း သူခိုး၊ ဓားပြသည် အဖွဲ့လိုက်ဖြင့် လိုက်လံခိုးယူနေသဖြင့် ပြည်သူများက လုံခြုံရေးအတွက် စိုးရိမ်နေသည်ဟု နောင်ပန်ဒေသခံ တစ်ဦးက ပြောသည်။
“လွန်ခဲ့တဲ့ (၄-၅) ရက်လောက်ကပဲ ရွာထဲကနေအိမ်မှာ ပစ္စည်းတွေ ခဏခဏခိုးခံရတယ်။ နေ့ကော၊ ညကော အခိုးခံနေရတယ်။ စျေးသွားတာပဲ ဖြစ်ဖြစ်၊ ခြံသွားတာ ဖြစ်ဖြစ်၊ အိမ်ကိုခဏပစ်ပြီး သွားလို့မရတဲ့ ကာလဖြစ်လာပြီ။ ကျနော်တို့ကော ရွာကလူတွေကော လုံခြုံရေးအတွက် စိုးရိမ်နေကြတယ် “ ဟု ဒေသခံတစ်ဦးက ပြောသည်။
အဆိုပါ သူခိုး၊ ဓားပြ များလာပြီး သောင်းကျန်းနေချိန် ယခုရက်ပိုင်းတွင် မည်သည့် သက်ဆိုင်ရာ ရဲတပ်ဖွဲ့များက ဖမ်းဆီး ဆောင်ရွက်မှုများ မပြုလုပ်ပေးကြောင်း သိရသည်။
အလားတူ လက်ရှိကာလမှာ ဆန်ဈေးနှုန်း၊ ကုန်ဈေးနှုန်းများ အဆမတန် မြင့်တက်နေပြီး ဆန် (၁၀) တင်း ကို (၃၂၀,၀၀၀) ကျပ် ၊ ဆန် (၈) ပြည်လျှင် (၁၅,၀၀၀) ကျပ်အထိ မြင့်တက်နေသောကြောင့် ဒေသခံများက ပိုမိုကြပ်တည်း လာနေကြောင်း သိရသည်။
“ကုန်ဈေးနှုန်း၊ ဆန်ဈေးနှုန်း တွေက တအားတက်နေတယ်။ စားဖို့သောက်ဖို့အတွက် အလုပ်လုပ်ဖို့ကလည်း အလုပ်ကလည်း မရှိဘူး။ တစ်ဖက်ကလည်း သူခိုးတွေက များလာတယ်။ ရှာစားနေရတဲ့ကြားထဲ သူခိုးကြောင့် ပါသွားကြတယ်။ သူခိုး တင်မကဘူး မူးယစ်ဆေး ကြောင်တဲ့သူတွေလည်း များလာတယ် “ ဟု ၎င်းဒေသခံတစ်ဦး ကပြောသည်။
စစ်အာဏာသိမ်းပြီး (၁) နှစ်ကျော် ကာလအတွင်း သူခိုး၊ ဓားပြသည် ပြည်သူများကို လိုက်လံဒုက္ခပေးနေသော်လည်း သက်ဆိုင်ရာ ရဲများက ဖမ်းဆီးမှုမပြုလုပ်ခြင်း၊ မူယစ်ဆေးဝါးများ ရောင်းချနေသော လောင်းကစားဝိုင်း နေရာတွင် စစ်ကောင်စီ ရဲများကပါ လောင်းကစားဝိုင်းများကို ဦးဆောင်ဖွင့်လှစ်လာနေကြောင်း သိရသည်။
Leave a Comments