သျှမ်းပြည်တောင်ပိုင်း မိုးနဲမြို့ နောင်ကျော့ရပ်ကွက်တွင် ယနေ့ ဩဂုတ် ၂၄ ရက် နံနက်အစောပိုင်း ၄ နာရီ ဝန်းကျင်တွင် လျှပ်စစ်ဝါယာကြိုးရှော့မှုကြောင့် မီးလောင်မှုဖြစ်ပွားခဲ့ကြောင်း သတင်းရရှိသည်။

အဆိုပါ မီးလောင်သွားသည့် နေအိမ်သည် လျှပ်စစ်ဝါယာရှော့မှ တစ်ဆင့် မီးလောင်မှု ဖြစ်ကာ နေအိမ်အပေါ်ထပ်တွင် မီးထဲပါသွားကြောင်း သိရသည်။

“ မနက်အစောကြီး ၄ နာရီလောက်မှ မီးလောင်သွားတာ။ နာရီဝက်လောက်မီးသတ်လိုက်ရတယ်။ လျှပ်စစ်ဝါယာကြိုးရှော့တိုက်လို့ မီးလောင်သွားတာ။ အိမ်အပေါ်ထပ်မီးထဲပါသွားတာ” ဟု မိုးနဲမြို့ ဒေသခံအမျိုသားက ပြောသည်။

ထိုမီးလောင်မှုကြောင့် အိမ်အပေါ်ထပ်ပေါ်တွင်ရှိသည့် ပစ္စည်းများ ဆုံးရှုံးသွားရပြီး လူထိခိုက်မှု မရှိကြောင်းသိရသည်။

“ မီးလောင်တဲ့ချိန်တော့ မီးလာတဲ့ချိန်ပါပဲ။ အခုတော့မီးပျက်သွားပြီ။ မီးကခနခန ပျက်တယ်။ ပျက်လိုက်လာလိုက်တော့ မီတာက မနိုင်ဘူးထင်တယ်။ အဲ့ကြောင့် မီးထလောင်တာဖြစ်တယ်” ဟု မိုးနဲမြို့ တက်ကြွသည့် အမျိုးသားတစ်ဦးကပြောသည်။

ထိုသို့ လျှပ်စစ်မီးမှ တစ်ဆင့် မီးလောင်မှုမဖြစ်အောင် ပြည်သူများအနေဖြင့် ဝါယာကြိုးများ လဲလှယ် သင့်ကြောင်း မီးကို သတိထားအသုံးပြုသင့်ကြောင်း တာချီလိတ်မှ လျှပ်စစ်ဝါယာကြိုးအကြောင်းသိသူတစ်ဦးက ပြောသည်။

“အခုတလော မီးတွေက လာလိုက်ပျက်လိုက်ဖြစ်တယ်လေ။ လာလိုက်ပျက်လိုက်ဖြစ်တော့ လျှပ်စစ်မီးကနေ မီးတောက်ဖို့လည်းလွယ်တယ်။ အဲ့တာကြောင့် ပြည်သူတွေအနေနဲ့လည်း အိမ်က ဝါယာကြိုးတွေကို လှဲသင့် ရင်လှဲပြီး အသုံးပြုသင့်တယ်။ ပြီးတော့ ညဆိုရင် ဖုန်းအားတွေ၊ ရေနွေးအိုးတွေ၊ ပလပ်ပေါက်မှာသွင်းတာရှိရင် ဖြုတ်ပြီးအိပ်သင့်တယ်” ဟု ၎င်းကဆိုသည်။

သို့သော် လျှပ်စစ်မီးမှ မီးလောင်မှုသည် ပြည်သူများအနေဖြင့် မိမိကိုယ့်ကိုယ်သာ ဂရုစိုက်အသုံးပြုသင့်ကြောင်း သျှမ်းရှေ့ လျှပ်စစ်ဌာနမှ တာဝန်ရှိသူတစ်ဦးက ပြောသည်။

“ကျနော်တို့ကတော့ လျှပ်စစ်တွေကိုပဲ ထုတ်ရောင်းပေးတာ။ အနီးနားရှိတဲ့ ဓာတ်တိုင်ထိပဲ ကျနော်တို့ တာဝန်ယူတာ။ အိမ်ထဲထိမကြည့်ဘူး။ သူတို့ လျှပ်စစ်မီးလာတောင်းတုန်းက အိမ်ကလည်း ပညာရှင်တွေနဲ့ပဲ လျှပ်စစ်မီးထည့်ပေးတာ” ဟု ၎င်းက သျှမ်းသံတော်ဆင့်ကို ပြောသည်။

စစ်ကောင်စီက အာဏာသိမ်းပြီးနောက်ပိုင်း လျှပ်စစ်မီး ပုံမှန်မရရှိတာကြောင့် သျှမ်းပြည်အတွင်း မကြာခဏ လျှပ်စစ်မီးမှတစ်ဆင့် မီးလောင်မှုဖြစ်ပွားနေလျက်ရှိကြောင်း သိရသည်။

ပြီးခဲ့သည့် သျှမ်းရှေ့ ကျိုင်းတုံမြို့တွင်လည်း ဩဂုတ် ၄ ရက်တွင် လျှပ်စစ်အိုးတည်ရာမှ မီးလောင်မှုဖြစ်ပွားပြီး အမျိုးသားတစ်ဦး သေဆုံးသွားခဲ့ကြောင်းသိရသည်။