သျှမ်းပြည်တောင်ပိုင်း နမ့်စန်မြို့တွင် မဟာဂျာဦးဆောင်သည့် ပြည်သူ့စစ် တပ်ဖွဲ့ ဖွင့်လှစ်ထားသော လောင်းကစားဝိုင်းသည် (၄) လကြာ ဖွင့်လှစ်နေဆဲ ဟု နမ့်စန်ဒေသခံများက သတင်းပေးလာသည်။
ပြီးခဲ့သည့် မေလပိုင်းစတွင် လောင်းကစားဝိုင်းများကို နမ့်စန်မြို့ပြင်ဘက် မိုးနဲမြို့သို့ သွားသည့်လမ်းတွင် ပြောင်းရွှေ့ ဖွင့်လှစ်ထားရာ ယခုကာလတွင် (၄) လကြာ ဖွင့်လှစ်လာကြောင်း၊ ည ၁၀ နာရီအချိန် နောက်ပိုင်းတွင် ဂီတတီးဝိုင်း အဆိုတော်များဖြင့် ညစဉ်ညတိုင်း ဖွင့်လှစ်နေဆဲ ဟု နမ့်စန်ဒေသခံ အမျိုးသားတစ်ဦးထံ မှသိရသည်။
“ လောင်းကစားက ဖွင့်ထားတာ (၄) လကြာပြီ။ နေရာလည်းမပြောင်းသေးဘူး၊ အခုထိ ဖွင့်ထားနေသေးတယ်။ လောင်းကစားဝိုင်းက မိုးရွာတဲ့ညကလွှဲလို့ ကျန်တဲ့ညတွေမှာ အမြဲဖွင့်ထားတယ်။ ည ၁၀ နာရီ နောက်ပိုင်းဆို သီချင်းတွေ ဆိုတယ်။ ညတိုင်းပါပဲ အခုထိလူတွေ စည်နေတုန်းပဲ “ ဟု ၎င်းဒေသခံတစ်ဦးက ပြောသည်။
အဆိုပါ လောင်းကစားဝိုင်း ဖွင့်လှစ်ထားခြင်းကြောင့် ပြည်သူများ စားဝတ်နေရေးအတွက် ကြပ်တည်းခြင်း၊ မိသားစုဝင်များ မကြာခဏ စကားများ ရန်ဖြစ်ငြင်းပွားကြရာ အိမ်ထောင်များ ပြိုကွဲခြင်းများ၊ နေ့စားအလုပ် လုပ်သောလူငယ်များလည်း ထိုလောင်းကစားဝိုင်းတွင် ညစဉ်တိုင်းလောင်းကစားပြုလုပ်နေဆဲဖြစ်ကြောင်း သိရသည်။
“ လောင်းကစားကြောင့် အိမ်ထောင်ကွဲတာ၊ ရှိသမျှ ကား၊ ဆိုင်ကယ် တွေပေါင်ထားတာတွေ မနည်းတော့ဘူး။ သူတို့အတွက် နေသားကျနေပြီ။ အခုကုန်ပစ္စည်းတွေ တက်နေတဲ့ချိန်မှာ စားသောက်ဖို့အတွက် လောင်းကစား ဝိုင်းမှာ လောင်းကြ၊ ရှိသမျှ ပေါင်ကြတော့ ဘာမှမကျန်ဘူး။ နေ့စားအလုပ်လုပ်တဲ့ လူငယ်တွေလည်း အဲ့နေရာမှာ ညတိုင်းလောင်းကစား လုပ်နေတုန်းပဲ “ ဟု အထက်ပါ ပုဂ္ဂိုလ်တစ်ဦးက ထပ်လောင်းပြောသည်။
အာဏာသိမ်းပြီးနောက်ပိုင်း သျှမ်းပြည်အတွင်းမှာ လောင်းကစားရုံများကို ဌာနေပြည်သူ့စစ်၊ စစ်ကောင်စီ အုပ်စုပူးပေါင်းပြီး ကျယ်ကျယ်ပြန့်ပြန့်ဖွင့်လှစ်လာသည်။ ထိုကဲ့သို့ လောင်းကစားရုံများကို နေရာတိုင်း လွတ်လပ်စွာ ဖွင့်လှစ်လာသည့်နောက်ပိုင်း ပြည်သူများ၏ လုံခြုံရေးလည်း ယိုယွင်း ပျက်စီး လာကြောင်း သိရသည်။
