သျှမ်းပြည်တောင်ပိုင်း ဆီဆိုင်မြို့နယ် ဘန်းယဉ်ကျေးရွာအုပ်စုတွင် ယခုရာသီ ပြောင်းထွက်ချိန်မှာ မကြာခဏ ပြောင်းများ ခိုးခံနေရကြောင်း စုံစမ်းသိရှိရသည်။
ဘန်းယဉ်ကျေးရွာအုပ်စု နောင်ခွန်ကျေးရွာတွင် ယခုရက်ပိုင်းအတွင်း ပြောင်းအိတ် (၄)အိတ် ကျပ်ငွေတန်ဖိုး (၇၀,၀၀၀)ကျော် ခိုးခံရပြီး၊ လွန်ခဲ့သည့် လပိုင်းတွင်လည်း ဟိုတင့်ကျေးရွာရှိ ပြောင်းအိတ်များလည်း အခိုးခံရကြောင်း ဘန်းယဉ် ပြောင်း စိုက်ပျိုးသူ အမျိုးသားတစ်ဦးထံမှ သိရသည်။
“ အခုတလော ပြောင်းတွေခဏခဏ ခိုးခံရတယ်။ တစ်နေရာပြီး တစ်နေရာ ကွက်ပြီးခိုးတာ။ လွန်ခဲ့တဲ့ ၄ ရက်လောက်က ကျနော်ပြောင်းတွေ ခိုးခံရတယ်။ အခု ခိုးသွားတဲ့ ပြောင်းတွေလည်း အကောင်းတွေကို ရွေးပြီးခိုးသွားတာ။ ခြံထဲမှာ ဝင်ပြီးခိုးတာဗျ။ စာလာအိတ် (၂၅) ပိသာဆန့်တဲ့အိတ်ကြီးနဲ့ လာခိုးတာ။ (၄) အိတ်လောက်တော့ ပါသွားတယ် “ ဟု ၎င်း အမျိုးသားတစ်ဦးက ပြောသည်။
ယခုစိုက်ပျိုးထားသော ပြောင်းအမျိုးအစားသည် (C.P) ပြောင်းမျိုးဖြစ်ပြီး လက်ရှိပြောင်း၏ ဈေးကွက်မှာ တစ်ပိသာလျှင် (၇၀၀) ကျပ်သာရှိကြောင်းလည်း ၎င်းကဆက်ပြောသည်။
လက်ရှိကာလတွင် စားဝတ်နေရေး ကြပ်တည်းနေချိန်ဖြစ်ပြီး သူခိုးများက ကြံရာမရှိ ဈေးတွင်းရှိ ဆိုင်ကယ်များ ခိုးယူသည့် အပြင် ခြံထဲရှိပြောင်းများလည်း ခိုးယူနေသဖြင့် လက်ရှိကာလတွင် စပါးဈေးနှုန်းများ ရှိလာရင်လည်း စပါးများပါ ခိုးယူမည့် အလားလာ ရှိနေကြောင်းလည်း ဆီဆိုင်ဒေသခံတစ်ဦးက ပြောသည်။
“ ဘန်းယဉ်ဈေး နဲ့ နောင်မွန်ဈေးမှာလည်း ဆိုင်ကယ်တွေ တစ်ပတ်တစ်စီးလောက် ပျောက်တယ်။ အခုတော့ အခိုးခံရတာ သိပ်မကြားမိတော့ဘူး။ ဈေးနှုန်းတွေ ရှိလာရင် သူခိုးတွေက လိုက်ခိုးတော့တာပဲ။ နောက်ဆိုစပါးဈေးနှုန်း ရှိလာရင်လည်း လိုက်ခိုးမဲ့အလားလာ ရှိနေတယ် “ ဟု ၎င်းကဆိုသည်။
ထို့အပြင် စစ်ကောင်စီ အာဏာသိမ်းပြီး (၁) နှစ်ကျော်ကာလအတွင်း နိုင်ငံရေး မတည်ငြိမ်မှုများ ဖြစ်ပွားလာခဲ့ပြီးနောက် သူခိုး၊ ဓားပြများလည်း ပေါများလာခြင်း၊ ပြည်သူများအတွက် လုံခြုံရေး မရှိခြင်း၊ အိမ်တွင်းဖောက်ခံရခြင်းများ မကြာခဏ ကြုံတွေ့နေရသည်။
Leave a Comments