ဒုတိယအကြိမ် ငြိမ်းချမ်းရေး ကိစ္စရပ် တွေ့ဆုံဆွေးနွေးရန် တိုင်းရင်းသားအဖွဲ့အစည်းတချို့နှင့် အာဏာသိမ်းခေါင်းဆောင် မင်းအောင်လှိုင်တို့ နေပြည်တော်တွင် တွေ့ဆုံဆွေးနွေးနေကြောင်း စုံစမ်းသိရသည်။

ယနေ့ (သြဂုတ် ၂၂) ရက်တွင် အာဏာသိမ်းခေါင်းဆောင် မင်းအောင်လှိုင်နှင့်တွေ့ဆုံသည့်အဖွဲ့များမှာ ကျာဆော်လမွန် ဦးဆောင်သော လားဟူဒီမိုကရက်တစ်ပါတီ (LDU)၊ ဥက္ကဌခွန်သူရိန် ဦးဆောင်သည့် ပအိုဝ်းအမျိုးသားလွတ်မြောက်ရေး အဖွဲ့ချုပ် (PNLO) နှင့် ဒုတိယ ဥက္ကဋ္ဌ စောမြရာဇာလင်း ဦးဆောင်သည့် ရခိုင်ပြည်လွတ်မြောက်ရေးပါတီ (ALP) အဖွဲ့တို့ ဖြစ်သည်။

ယခု တွေ့ဆုံမှုသည် ဒုတိယအကြမ် တွေ့ဆုံမှုဖြစ်ပြီး ယနေ့ သြဂုတ် ၂၂ ရက်နေ့မှ ၂၆ ရက်နေ့အထိ ငါးရက်တိုင် ငြိမ်းချမ်းရေးကိစ္စရပ်များ၊ ၂၀၀၈ အခြေခံဥပဒေ အခန်း(၁) နှင့် (၂)၊ ပြည်ထောင်စု ဆွေးနွေးမှု အပိုင်း (၁) (၂) (၃)၊ JICM ဆုံးဖြတ်ချက်များနှင့် ပြီးခဲ့သည့်တွေ့ဆုံမှုများ မပြီးသေးသည့် ကိစ္စရပ်များကို ဆွေးနွေးကြမည်ဖြစ်ကြောင်းလည်း သိရသည်။

တွေ့ဆုံဆွေးနွေးမှုအပြီးတွင် အခြေခံသဘောတူညီချက်ရရှိရေးအတွက် ကြိုးစားနေမှုကြောင့် ဒီမိုကရေစီ အုပ်ချုပ်ရေး နှင့် ဖက်ဒရယ်အာဏာကို ရည်မှန်းပြီး ငြိမ်းချမ်းရေး ရရှိအောင် ကြိုးပမ်းနေသည့် အတွက် ငြိမ်းချမ်းရေး မရနိုင်စရာမရှိကြောင်းလည်း အာဏာသိမ်း ခေါင်းဆောင်က သြဂုတ်လ ၁၆ ရက်တွင် ထုတ်ပြန် ပြောဆိုထားသည်။

စစ်ကောင်စီ နှင့် သွားရောက်တွေ့ဆုံသည့် ကျာဆော်လမွန် ဦးဆောင်သောအဖွဲ့သည် LDU၏ အမည်နာမအား အသုံးပြုပြီး စစ်ကောင်စီမှ ခေါ်ယူကျင်းပသော ဒုတိယအကြိမ် ငြိမ်းချမ်းရေးဆွေးနွေးပွဲသို့ တက်ရောက်ခြင်းသည် တရားမဝင်ကြောင်း လားဟူဒီမိုကရက်တစ် အစည်းအရုံး LDU ဥက္ကဌ လက်မှတ်ဖြင့် ထုတ်ပြန်ထားသည်။

ဥက္ကဌ ကိုယ်တိုင် ဦးဆောင်ပြီး ဆွေးနွေးပွဲတက်ရောက်သည့် PNLO အနေဖြင့် ဒီမိုကရေစီ နဲ့ ဖက်ဒရယ်စနစ်ကို အခြေခံပြီး ပြည်ထောင်စုစနစ် တည်ဆောက်ရေး၊ ပါတီစုံဒီမိုကရေစီစနစ်ကျင့်သုံးရေး၊ ပြည်နယ်များမှ ပြည်နယ် ဖွဲ့စည်းပုံ ဥပဒေရေးဆွဲပြဌာန်းကျင့်သုံးနိုင်ခွင့် ထားရှိရေးနဲ့ ပြည်နယ်သစ်များ ပေါ်ထွန်းခွင့်မူကို ပြဌာန်းထားရှိရေး စသည့် အချက်လေးချက်ဖြင့် ဆွေးနွေးမည်ဖြစ်ကြောင်း သိရသည်။

စစ်ကောင်စီ၏ ဒုတိယအကြိမ် ငြိမ်းချမ်းရေး ဆွေးနွေးမှုတွင် အုပ်စုလိုက်တွေ့ဆုံဆွေးနွေးမည်ဟု စစ်ကောင်စီမှ ထုတ်ပြန်ကြေညာထားရာ LDU ၊ PNLO ၊ ALP တို့မှ အုပ်စုတစ်ခု၊ SSPP/SSA၊ UWSA၊ NDAA တို့မှ တစ်အုပ်စု နှင့် RCSS/SSA အဖွဲ့သည် သီးသန့်တွေ့ဆုံဆွေးနွေးသွားမည်ဖြစ်ကြောင်း နီးစပ် သူထံမှ သိရသည်။

ပြီးခဲ့သည့် စစ်ကောစ်စီ ငြိမ်းချမ်းရေး ဆွေးနွေးပွဲတွင် ရခိုင်ပြည်လွတ်မြောက်ရေးပါတီ (ALP)၊ ‘ဝ’ ပြည် သွေးစည်း ညီညွတ်ရေး တပ်မတော် (UWSA)၊ အမျိုးသား ဒီမိုကရေစီမဟာမိတ် တပ်မတော် (NDAA-မိုင်းလား အဖွဲ့)၊ မွန်ပြည်သစ်ပါတီ (MNSP)၊ သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)၊ ဒီမိုကရေစီ အကျိုးပြု ကရင်တပ်မတော် (DKBA)၊ ကရင်အမျိုးသားအစည်းအရုံး/ ကရင်အမျိုးသား လွတ်မြောက်ရေး တပ်မတော်- ငြိမ်းချမ်းရေးကောင်စီ (KNU/ KNLA-PC)၊ ပအိုဝ်းအမျိုးသား လွတ်မြောက် ရေးအဖွဲ့ချုပ် (PNLO)၊ လားဟူဒီမိုကရက်တစ်အစည်းအရုံး(LDU) နဲ့ ရှမ်းပြည်တိုးတက်ရေးပါတီ (SSPP/SSA) အဖွဲ့တို့ တက်ရောက်ခဲ့ကြသည်။