သျှမ်းပြည်တောင်ပိုင်း ပင်းတယမြို့နယ်အတွင်း သူခိုးများသောင်းကျန်းနေပြီး ပြည်သူ့နေအိမ် ၈ လုံး ဖောက်ထွင်း ခံနေရသော်လည်း စစ်ကောင်စီတို့မှ အရေးယူ ဖြေရှင်းခြင်း မရှိကြောင်း သတင်းသိရသည်။
ယခု သြဂုတ် ၁၉ ရက် တစ်ရက်တည်းပင် ပင်းတယမြို့မှ ဖောက်ထွင်းခံရသည့် ပြည်သူ့ နေအိမ် ၈ လုံးအနက် သစ်အယ်ပင်ကျေးရွာမှ နေအိမ် ၂ လုံး၊ ထယ်သွန်းကျေးရွာမှ နေအိမ် ၆ လုံး ဖြစ်ကြောင်း ဒေသခံ အမျိုးသားတစ်ဦးက သျှမ်းသံတောင့်ကို ပြောသည်။
“သစ်အယ်ပင်ကျေးရွာက ဖောက်ထွင်းခံတဲ့ ပထမအိမ်မှာ မောင်းကွင်း ရွှေလက်စွပ် တစ်ကွင်းပါသွားခဲ့တယ်၊ ဒုတိယ အိမ်ကတော့ ငွေသား (၁၃) သိန်းကျော်၊ တစ်ကျပ်သားရွှေဆွဲကြိုးနဲ့ နားကပ်တစ်ရံပါသွားတယ်။ အိမ်ရှင်တွေက ခြံသွားနေတုန်း ဖောက်ခံရတာပါ” ဟု သစ်အယ်ပင်ကျေးရွာမှ အမည်မဖော်လိုသူ အမျိုးသားတစ်ဦးက ပြောသည်။
ထယ်သွန်းကျေးရွာမှာ ဖောက်ထွန်းခံရသည့် ပြည်သူ့နေအိမ်များ ၆ လုံးတွင် လက်ကိုင်ဖုန်းများ၊ မီးကြိုးများနှင့် ငွေသားများ ဖောက်ထွင်းခိုးယူခံရကြောင်း သိရပြီး စာရင်းအတိအကျမသိရှိရသေးကြောင်း ဒေသခံများက သျှမ်းသံတော်ဆင့်ကို ပြောသည်။
ဒေသအတွင်းတွင် ယင်းကဲ့သို့ သူခိုးများ သောင်းကျန်းနေသော်လည်း သက်ဆိုင်ရာ တာဝန်ရှိ စစ်ကောင်စီ လုံခြုံရေးသမားများက တာဝန်ယူ ဖြေရှင်းအရေးယူပေးခြင်းမရှိကြသည့်အတွက် ပြည်သူများက အားကိုးရာမဲ့ နေကြောင်းလည်း အထက်ပါ အမျိုးသားက ပြောသည်။
“ရဲတွေ စစ်သားတွေက ရွာထဲရှိနေတောင် ဒီလို သူခိုးတွေ သောင်းကျန်းနေမှတော့ ကျနော်တို့ကို သူတို့ ဘယ်လိုကာကွယ်ပေး မလဲဆိုတာ မပြောတတ်တော့ဘူး၊ PDF နှိမ်နင်းရေးမှာသာ သူတို့လှုပ်ရှားတာ ဒေသထဲမှာ အခုလိုဖြစ်နေတာ သူတို့ဘက်ကလာပြီး စစ်ဆေးပေးတာ၊ အရေးယူပေးတာမျိုးတွေ တခါမှ မရှိဖူးဘူး” ဟု ၎င်းက ပြောသည်။
စစ်အာဏာသိမ်းပြီးနောက်ပိုင်း သျှမ်းပြည်အပါအဝင် နိုင်ငံတစ်ဝှမ်းလုံး၌ တရားဥပဒေ စိုးမိုးမှုကင်းမဲ့နေပြီး ခိုးယူလုယက်မှုများ ပေါများနေသော်လည်း စစ်ကောင်စီတို့မှ အရေးယူ ဆောင်ရွက်ခြင်းများ မရှိခဲ့ကြောင်း သိရသည်။
PDF နှိမ်နင်းရေး အကြောင်းပြပြီး စစ်ကောင်စီတို့မှ နေရာယူထားသည့် ပင်းတယမြို့သည် စိုက်ပျိုးရေးကို အဓိကထား လုပ်ကိုင်ကြပြီး လက်ရှိကာလ ဓာတ်မြေဩဇာ နှင့် တခြားကုန်စျေးနှုန်းတက်မှု၊ သီးနှံစျေးနှိမ်ခံရပြီး အရှုံးပေါ်နေမှု တို့ကြောင့် စားဝတ်နေရေးကြပ်တည်းလာမှု စသည့် အခက်အခဲများအပြင် သူခိုးများ၏ ဖောက်ထွင်းခိုးမှု အန္တရာယ်များလည်း ကြုံတွေ့နေရသည့်အတွက် ဒေသခံများက စိုးရိမ်ပူပန်နေရကြောင်း သိရသည်။
Leave a Comments