သျှမ်းပြည်တောင်ပိုင်း ဟိုပုံးမြို့တွင် စစ်ကောင်စီ လက်အောက်ခံ ပြည်သူ့စစ် PNO တပ်ဖွဲ့က သျှမ်းသံတော်ဆင့် သတင်းဌာန (SHAN News) အပါအဝင် သျှမ်းပြည်အခြေစိုက် သတင်းမီဒီယာများကို အကြမ်းဖက်ဟု စွပ်စွဲကာ လိုက်လံ ဝါဒဖြန့်နေကြောင်း စုံစမ်းသိရှိရသည်။
ပြီးခဲ့သည့် သြဂုတ် ၁၉ ရက်တွင် ပြည်သူ့စစ် PNO တပ်ဖွဲ့များက ဟိုပုံးမြို့ရှိ ကျေးရွာတွင် တစ်အိမ်တက် တစ်အိမ်ဆင်းပြီး သျှမ်းပြည်အခြေစိုက် သတင်းမီဒီယာများကို အကြမ်းဖက်မီဒီယာများနှင့် တော်လှန်ရေး အင်အားစု၏ ကွန်ရက်စာမျက်နှာများကို (PDF) အားပေးသူများ ဖြစ်ကြောင်း၊ ထိုသို့ မကြည့်ရှု့ရန်အတွက် လိုက်လံဝါဒဖြန့်ပြီး ပြောဆိုနေကြောင်း ဟိုပုံးမြို့ရှိ အမည်မဖော်လိုသူ ဒေသခံလူငယ်တစ်ဦးက ပြောသည်။
“ ရွာတွေမှာ PNO ကလိုက်ပြီး ပြောဆိုနေတာ။ ရွာသားတွေကို လိုက်ပြောနေတယ်။ သျှမ်းပြည်က သတင်းမီဒီယာတွေ အကြမ်းဖက်အားပေးတွေ၊ သူတို့သတင်းမီဒီယာတွေ လိမ်နေတာ လိုက်ပြောနေတယ်။ ပြီးတော့ မယုံကြည်ဖို့၊ မကြည့်ဖို့ ပြောတယ် “ ဟု ၎င်းဒေသခံက ဆိုသည်။
ထိုအကြမ်းဖက် မီဒီယာဟု စွပ်စွဲခံရသည့် သျှမ်းပြည်အခြေစိုက် သတင်းမီဒီယာများမှ သျှမ်းသံတော်ဆင့် (SHAN News )၊ Tachileik News Agency , Shwe Phee Myay News Agency, Kanbawza Tai News နှင့် တော်လှန်ရေး အင်အားစုများ၏ လူမှုကွန်ရက်ဖြစ်သော Taunggyi Nway Oo Channel , Channel Taunggyi , TGI Support Revolution , Road of Taunggyi များဖြစ်ကြောင်း သိရသည်။
အဆိုပါ သျှမ်းပြည်အခြေစိုက် သတင်းမီဒီယာများသည် တော်လှန်ရေးအတွက် အားကြိုးမာန်တက် လုပ်ဆောင်နေသော မီဒီယာများဖြစ်သည်ဟု ဟိုပုံးမြို့ လူငယ်တစ်ဦးက သျှမ်းသံတော်ဆင့်ကို ပြောသည်။
“ ရွာသားတွေနိုင်လို့ရတဲ့ အသုံးချလို့ရတဲ့ သူတွေကိုပဲ လုပ်ရဲတာပါ။ တချို့သတင်းမီဒီယာက အဖမ်းအစီးခံထားရ တော့သူလည်း သိပ်ပြီးအားကြိုးမာန်တက်ရှိမနေတော့ဘူး ။ ဒါပေမဲ့ သျှမ်းပြည်အခြေစိုက် သတင်းမီဒီယာတွေက တော်လှန်ရေးအတွက် အားကြိုးမာန်တက် တင်ပေးတယ် “ဟု ၎င်းလူငယ်တစ်ဦးက ပြောသည်။
ထို့အပြင် ဟိုပုံးမြို့နယ်အတွင်းရှိ စားသောက်ဆိုင်များနှင့် လမ်းများတွင်လည်း ၎င်း သျှမ်းပြည်မီဒီယာများကို စတေကာများဖြင့် ကပ်ထားကြောင်းလည်း သိရသည်။
