သျှမ်းပြည်အရှေ့ပိုင်း တာချီလိတ်မြို့ ဆန်ဆိုင်း (ခ) ရပ်ကွက်တွင် လင်မယား (၂) ဦး စကားများ ရန်ဖြစ်ရာမှ အမျိုးသားဖြစ်သူ က ၎င်း၏ အမျိုးသမီးကို ရိုက်နက်ကာ သေဆုံးသွားခဲ့ကြောင်း စုံစမ်းသိရှိရသည်။
ပြီးခဲ့သည့် သြဂုတ် ၁၈ ရက် ည (၁၀) နာရီခွဲ ဝန်းကျင်တွင် လင်မယား (၂) ဦး အချင်းချင်း စကားများ ရန်ဖြစ်ပွားခဲ့ပြီး ဇနီးဖြစ်သူ၏ ဦးခေါင်းကို ရိုက်နက်လိုက်သဖြင့် အသက်ဆုံးရှုံးခဲ့ရသည်ဟု တာချီလိတ် ကိုလှမိုး ပရဟိတအသင်း မှ တာဝန်ခံ တစ်ဦးက သျှမ်းသံတော်ဆင့် ကိုပြောသည်။
“ သူ့ယောက်ျားက အရက်မူးလွန်ပြီး သူ့မိန်းမကို ရိုက်နက်မိတာ။ သူ့ယောက်ျားကလည်း အရက်သောက် နေတာကြာပြီ။ အရက်ကြောင်ပြီး ၊ မိန်းမဖြစ်သူကို ဝင်ရိုက်မိသွားတာ။ ဘယ်သူမှ မသိဘူး။ အသင်းက သွားတော့ သေနေပြီ “ ဟု ၎င်း တာဝန်ခံ တစ်ဦးက ပြောသည်။
ခင်ပွန်းဖြစ်သူကို သက်ဆိုင်ရာ ရဲတပ်ဖွဲ့များက ဖမ်းဆီးခေါ်ဆောင်သွားပြီး အရေးယူဆောင်ရွက်လျက် ရှိကြောင်း သိရသည်။
၎င်း လင်မယား (၂) ဦးသည် အသက် (၅၀) ဝန်းကျင်ရှိပြီး မကြာခဏ အချင်းချင်း စကားများ ရန်ဖြစ်တတ်လေ့ရှိပြီး ထိုညတွင် ကိုယ်ထိလက်ရောက် ကျူးလွန် ရိုက်နက် သွားကြောင်း သိရသည်။
Leave a Comments