သျှမ်းပြည်မြောက်ပိုင်း ကျောက်မဲမြို့နယ်အတွင်း တိုက်ပွဲမရှိသော်လည်း စစ်ရှောင် (၁၈၅) ဦးကျော်က နေရပ်မပြန်နိုင်သေးကြောင်း စုံစမ်းသိရှိရသည်။
တစ်နှစ်နီးပါး စစ်ဘေးရှောင်လာသည့် ကျောက်မဲမြို့နယ် ဟူးကွက်ကျေးရွာဒေသခံများသည် ဒေသတွင်း တိုက်ပွဲမရှိသော်လည်း မြေမြှုပ်မိုင်းနှင့် မြောက်ပိုင်းမဟာမိတ် TNLA နှင့် SSPP တို့က ဝင်ရောက်လှုပ်ရှားလာသဖြင့် ပြည်သူများ လုံခြုံမှုမရှိသောကြောင့် နေရပ် မပြန်နိုင်သေးကြောင်း သိရသည်။
“မပြန်နိုင်သေးတဲ့ အကြောင်းရင်းက အခု မြောက်ပိုင်းမဟာမိတ်တွေ ရှိနေလို့ပါ။ အရင်ကတော့ RCSS တပ်ဖွဲ့နေတာလေ။ ပြီးတော့ပြန်ဖို့ သူတို့ကို ညှိတော့ အဲ့တပ်ဖွဲ့တွေက မိုင်းရှင်းလင်းရေးလုပ်နေတယ်လို့ ပြောတယ်” ဟု စစ်ဘေးရှောင်နေသည့် အမျိုးသားတစ်ဦးက ပြောသည်။
လက်ရှိစစ်ရှောင်များသည် မြေမြှုပ်မိုင်းကြောင့် နေရပ်ကို ပြန်ချင်သော်လည်း အခက်အခဲများရှိနေကာ မပြန်ရဲကြသေးကြောင်း စစ်ရှောင်များက ပြောသည်။
ကျောက်မဲမြို့နယ် ဟူးကွက် စစ်ရှောင်များသည် သျှမ်းစာပေ နှင့် ယဉ်ကျေးမှုစခန်း နှင့် မြို့ပေါ်ရှိ ဆွေမျိုးနေအိမ်တွင်နေထိုင်နေသည်။
“ စစ်ရှောင်စခန်းမှာနေကြတဲ့သူတွေအားလုံးကတော့ ပြန်ချင်ကြတာပဲ။ လက်နက်ကိုင်တွေ ပြဿနာနဲ့ မိုင်းတွေကြောင့် မပြန်နိုင်ကြသေးဘူး” ဟု စစ်ဘေးရှောင်နေသည့် အမျိုးသားက ပြောသည်။
အဆိုပါ စစ်ဘေးရှောင်များကို နေရပ်ပြန်နိုင်ရန်အတွက်လည်း ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ပြောခွင့်ရ ဗိုလ်မှူးစိုင်းဖုန်းဟန်က “သူတို့နေရပ် ပြန်နိုင်ဖို့အတွက် ဆိုတာက ကျနော်တို့တွေလည်း လုပ်ပေးခဲ့ပါတယ်။ နားလည်ပါတယ်။ ကျနော်တို့ ထိန်းချုပ်တဲ့ နယ်မြေထဲမှာရှိတယ် ဆိုရင်တော့ ချိတ်ဆက်မှုတွေ ရှိရမယ်။ ဆက်သွယ်ပြီး ကူညီကြတာ။ ပြည်သူတွေရဲ့ အခက်ခဲဟာ ကျနော်တို့ရဲ့ အခက်ခဲပဲ။ ကျနော်တို့ရဲ့ အခက်ခဲကလည်း ပြည်သူတွေရဲ့ အခက်ခဲပဲ။ ဒါပေမယ့် တချို့နေရာမှာက ပြင်ပ ပရောဂတွေ ရှိနေလား ဆိုတာတော့ ကျနော်လည်း မပြောတတ်ဘူး” ဟု သျှမ်းသံတော်ဆင့်ကို ဖြေကြားခဲ့ဖူးသည်။
ကျောက်မဲမြို့နယ် တိုင်းရင်းသားလက်နက်ကိုင်တပ်ဖွဲ့အချင်းချင်းသည် ၂၀၂၁ နိုဝင်ဘာလမှစပြီး တိုက်ပွဲဖြစ်ပွားခဲ့သဖြင့် ပြည်သူများက ကျောက်မဲမြို့ပေါ်နှင့် တခြားဒေသသို့ ထွက်ပြေးတိမ်းရှောင်လာရသည်။
ထို့ကြောင့် လက်ရှိ ဟူးကွက်ကျေးရွာသည် တနှစ်နီးပါး လူနေထိုင်မှုမရှိသဖြင့် ရွာပျက်ဖြစ်နေကြောင်း သိရသည်။
