ထိုင်း – မြန်မာငွေလဲလှယ်သူများ လိုင်စင်ရှိ တရားဝင်လုပ်ဆောင်သူများကို စစ်ကောင်စီက ဖမ်းဆီးလာသဖြင့် ထိုင်း – မြန်မာနယ်စပ် တာချီလိတ်မြို့ ငွေလဲလှယ် သူများလည်း စိုးရိမ်နေကြောင်း စုံစမ်းသိရှိရသည်။

မြန်မာငွေစျေး ကျဆင်းလာပြီး တည်မြဲမှုမရှိမှုကြောင့် ထိုင်း ဘတ်ငွေ ၁၂၀၀ လျှင် မြန်မာငွေကာလပေါက်စျေး ကျပ် ၁ သိန်း သာ ရရှိကြောင်း သိရသည်။

ဩဂုတ်လ ၁၃ ရက်က ကရင်ပြည်နယ် မြဝတီမြို့တွင် ငွေလဲ လိုင်စင်ရှိသူများကို စစ်ကောင်စီက ငွေဈေးနှုန်းကစား မှုဟုဆိုပြီး ငွေလဲလှယ်သူများကို (၅) ဦး ဖမ်းဆီးသွားသဖြင့် သျှမ်းရှေ့ တာချီလိတ် ငွေလဲလှယ်မှု ပြုပ်လုပ်သူများလည်း စိုးရိမ်ထိတ်လန့် နေကြောင်း တာချီလိတ် ငွေလဲလှယ် ဝန်ဆောင်မှုပြုလုပ်နေသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ဟုတ်တယ်။ မြဝတီဘက်မှာ ဖမ်းတာတော့ကြားပါတယ်။ အခုတော့ စိုးရိမ်စိတ်တော့ရှိတာပေါ့။ အခုချိန်ထိတော့ ဘာမှလာပြောတာမရှိသေးဘူး ။ ထုတ်ပြန်ခြိမ်းခြောက်တာတော့ မရှိသေးဘူး။ တစ်ဖက်လည်း ရေကြီးမှု နဲ့ ရှုပ်နေတာဆိုတော့ ဘာမှမလာသေးဘူး။ နောက်ကျရင်တော့ လာမယ်ထင်တယ်” ဟု တာချီလိတ်မြို့က ငွေလဲလှယ် ဝန်ဆောင်မှုပေးသည့် အမျိုသမီးတစ်ဦးက ပြောသည်။

အဆိုပါ ငွေဈေးနှုန်းကျဆင်းခြင်းသည် စစ်ကောင်စီ၏ နိုင်ငံရေးအုပ်ချုပ်မှုပေါ်မူတည်ကြောင်း၊ ငွေလဲလှယ်သူများထံတွင် အပြစ်မရှိကြောင်း ငွေလွှဲဝန်ဆောင်မှု ပေးနေသည့် သူများက ပြောသည်။

စစ်ကောင်စီက အာဏာသိမ်းပြီးနောက်ပိုင်း စီးပွားရေးကျဆင်းလာပြီး ငွေဈေးနှုန်းမတည်ငြိမ်ပဲ ကုန်ဈေးနှုန်းမြင့်တက် လာကြောင်း သိရသည်။

“ တကယ်တော့ သူတို့နိုင်ငံအုပ်ချုပ်တဲ့ပေါ်မူတည်တယ်။ ငွေလွှဲတဲ့သူတွေမှာအပြစ်မရှိဘူး။ သူတို့က သူများကို အပြစ်တင်ချင်နေတာ။ စစ်တပ်က အာဏာသိမ်းပြီးတော့ စီးပွားရေး ကျဆင်းသွားတယ်လေ။ သူတို့လည်း မထိန်းချုပ်နိုင်လို့ ငွေဈေးလည်းကျဆင်းသွားတာ” ဟု အွန်လိုင်းပေါ်တွင် ငွေလဲလှယ်မှုဝန်ဆောင်မှုပေးနေသည့် အမျိုးသမီးတစ်ဦးက ပြောသည်။

ယနေ့ (ဩဂုတ် ၁၅) ရက်တွင် ထိုင်း- မြန်မာငွေလဲလှယ်မှုနှုန်း ၁၃၄၀ ဘတ်ကို မြန်မာငွေ ၁ သိန်းရရှိသည်ဟု ငွေအရောင်းအဝယ်လုပ်သူထံ တစ်ချို့က သိရသည်။

စစ်တပ်က အာဏာသိမ်းပြီးနောက် စီးပွားရေးကျဆင်းလာပြီး ကုန်ဈေးနှုန်းများလည်း အဆမတန်မြင့်တက် လာကြောင်းသိရသည်။