သျှမ်းပြည်မြောက်ပိုင်း မူဆယ်မြို့တွင် အာဏာသိမ်း စစ်ကောင်စီလက်အောက်ခံ မြို့နယ်အကောက်ခွန်အရာရှိ တစ်ဦး ကို လက်နက်ကိုင်တပ်ဖွဲ့က ဖမ်းဆီးသွားပြီး၊ နှစ်ဦးပျောက်ဆုံးနေကြောင်း သတင်းသိရသည်။
ပြီးခဲ့သည့် သြဂုတ်လ ၈ ရက် (နံနက် ၉) နာရီဝန်းကျင်တွင် မူဆယ်မြို့ ဟိုမွန်ရပ်ကွက် ပီတိလဖ္ဘက်ရည်ဆိုင်၌ မနက်စာ လာစားသည့် စစ်ကောင်စီ အခွန်ဦးစီးဌာနမှ အရာရှိတစ်ဦးကို အမည်မသိ လက်နက်ကိုင် လူ ၃ ဦးက သေနတ်ပြ ဖမ်းဆီးခေါ်ဆောင်သွားကြောင်း သတင်းသိရသည်။
“သူက ဒီဆိုင်မှာ မနက်စာ လာစားနေကျဖြစ်တယ်၊ အဲ့နေ့က သူဆိုင်ကို ရောက်လာပြီး မကြာဘူး။ ကားတစ်စီး မျက်နှာဖုံးစွပ် လူ ၃ ဦးက သူ့ကို သေနတ်ပြ ဖမ်းခေါ်သွားတယ်၊ အစက သူ့ကားကိုလည်းယူသွားဖို့ လုပ်ကြပေမဲ့ စက်နှိုးမရလို့ ကားကိုထားပြီး လူကိုပဲ ဖမ်းခေါ်သွားတယ်” ဟု ပီတိလဖ္ဘက်ရည်ဆိုင် ရောက်နေသည့် အမည်မဖော်လိုသူ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ဖမ်းဆီးခေါ်ဆောင်သွားခြင်းခံရသူသည် အခွန်ကောက်ဌာနမှ ဦးစီးအရာရှိ ဦးစိုးမိုးအေး ဟု အမည်ရှိပြီး လက်ရှိတွင် ၎င်း၏ မိသားစုဝင်များက လိုက်လံရှာဖွေ စုံစမ်းနေသော်လည်း သတင်း အစအနမရှိသေးကြောင်း သတင်းသိရသည်။
အလားတူပင် အဆိုပါ သြဂုတ်လ ၈ ရက်နေ့မှာလည်း စစ်ကောင်စီ အကောက်ခွန်ဌာန မှ တခြား ဝန်ထမ်းနှစ်ဦး လည်း ပျောက်ဆုံးသွားပြီး လက်ရှိအချိန်အထိ အဆက်အသွယ်မရရှိသေးကြောင်း နီးစပ်သူများက သျှမ်းသံတော်ဆင့်ကို ပြောသည်။
“မနက်ပိုင်းမှာ ရုံးသွားမယ်ဆိုပြီးတော့ အိမ်ကနေထွက်သွားကြတာ၊ ညဘက်အထိ အိမ်ပြန်မလာကြတော့ မိသားစုဝင်တွေက ရုံးကို မေးကြပေမဲ့ ရုံးကို မရောက်ဘူးတဲ့၊ အခုထိ အဆက်အသွယ်မရကြသေးဘူး၊ ဘယ်ကို ရောက်သွားမှန်းလည်း မသိရဘူး” ဟု ပျောက်ဆုံးနေသည့် ဝန်ထမ်းများ၏ မိသားစု နှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
လက်ရှိအချိန်တွင် ဖမ်းဆီးခံရသည့် ဦးစီးအရာရှိ နှင့် ပျောက်ဆုံးသူများ၏ မိသားစုဝင်များသည် စိုးရိမ်မှုမြင့်တက်နေပြီး ဖမ်းဆီးခေါ်ဆောင်ထားသည့် အဖွဲ့အစည်းအနေဖြင့် မိသားစုဝင်များထံ အကြောင်းကြား ပေးရန် တောင်းဆိုလိုကြောင်းလည်း သတင်းသိရသည်။
ထို့အပြင် ပြီးခဲ့သည် လပိုင်းတွင်လည်း မူဆယ်မြို့မှ ရဲတပ်သား ၅ ဦးပျောက်ဆုံးခဲ့ပြီး နောက်ပိုင်း ရဲတပ်သား ၃ ဦး၏ ရုပ်အလောင်းကို ပြန်လည်တွေ့ခဲ့ရပြီး၊ ကျန်ရှိသည့် ရဲ ၂ ဦးကမူ ဒီကနေ့အထိ ပျောက်ဆုံးနေသည့် ဖြစ်စဥ် ဖြစ်ပွားခဲ့သည်။
မူဆယ်မြို့နယ်သည် တရုတ် – မြန်မာ နယ်စပ် မြို့တစ်မြို့ဖြစ်ပြီး တိုင်းရင်းသား လက်နက်ကိုင် ပေါင်းစုံ လှုပ်ရှားရာ နယ်မြေဖြစ်ပြီး မကြာခဏ လုယက်မှုများ၊ ဓါးပြတိုက်မှုများ နှင့် လက်သည်မပေါ်သည့် လူသတ်မှုများ ရှိခဲ့ကြောင်း သိရသည်။
