မြန်မာ – တရုတ်နယ်စပ်ဒေသတွင် တရုတ်ယွမ်ငွေဈေးများ မြင့်တက်လာသဖြင့် နယ်စပ်ကုန်သည်များက ငွေလဲလှယ်မှု အခက်ခဲများ ကြုံတွေ့နေကြောင်း သတင်းရရှိသည်။
သျှမ်းပြည်မြောက်ပိုင်း မူဆယ်မြို့တွင် တရုတ်ယွမ် (၁၀၀) ကို မြန်မာကျပ်ငွေ (၄၀,၀၀၀) ကျပ်အထိ မြင့်တက် နေသဖြင့် ကုန်သည်များမှ ငွေလဲလှယ်မှု အခက်ခဲကြုံတွေ့နေရပြီး တချို့ကုန်သည်များမှာ တရုတ်ယွမ်များကို ပိုမိုအသုံးပြုလျက်ရှိနေကြောင်း မူဆယ်ကုန်သည် အမျိုးသားတစ်ဦး ထံမှ သိရသည်။
“ အရင်က တရုတ်ယွမ်ငွေ (၁၀၀) မှာ မြန်မာငွေ (၃၀,၀၀၀) ကျပ် ထိရှိတယ် ၊ အခုက (၄၀,၀၀၀) ကျပ် ထိ မြင့်တက်လာတယ်။ မြန်မာငွေဈေးနှုန်းက ဖောင်းပွတာရယ်၊ ကုန်ပစ္စည်းတွေက တရုတ်ပြည်ကို တင်ပို့လို့မရတာ၊ တရုတ်ငွေတွေက တက်ပြီးရင် ပြန်ကျဖို့တော့ ကြာတယ်။ ဘယ်တော့မှလည်း မကျဘူး “ ဟု ၎င်း အမျိုးသားတစ်ဦးက ပြောသည်။
စစ်အာဏာသိမ်းပြီး (၂) နှစ် နီးပါးအချိန်တွင် မြန်မာနိုင်ငံရှိ သစ်သီးကုန်သည်များမှာ (၉၅) ရာခိုင်နှုန်း အထိ ရပ်ဆိုင်းသွားခဲ့ရပြီး ကျန်ရှိသော (၅) ရာခိုင်နှုန်းမှာ တရုတ်ပြည်မှ ကုန်သည်များဖြစ်ကြသည်ဟု ၎င်းက ထပ်လောင်းပြောသည်။
အလာတူး ဟိုပန်မြို့တွင် တရုတ်ယွမ်ငွေ မြင့်တက်နေခြင်းကြောင့် ကုန်သည်များမှာလည်း တရုတ်ယွမ်ငွေများကိုသာ ပိုမိုအသုံးပြုများလာကြောင်း ကုန်သည်အမျိုးသား တစ်ဦးက သျှမ်းသံတော်ဆင့်ကို ပြောသည်။
“ အခုတော့ တရုတ်ယွမ်ငွေကိုဘဲ အားကိုးရတယ်ပေါ့ဗျာ။ ယွမ်ငွေတွေ ကိုင်ထားရင် ပိုပြီးစိတ်အေးရတယ်။ တစ်ခါတစ်လေ မြန်မာကျပ်ငွေတွေက ရုတ်တရက်ကြီး ဈေးတွေတအားကျသွားရင် ကျနော်တို့မှာ ပိုပြီးနစ်နာတယ်၊ တရုတ်ယွမ်ငွေ ကိုင်ထားရင်တော့ အမြဲတမ်းစိတ်ချရတယ်“ ဟု ၎င်း အမျိုးသားတစ်ဦးက ပြောသည်။
ထို့အပြင် ကုန်ပစ္စည်းများမှာလည်း အဆမတန် မြင့်တက်နေသဖြင့် ဆိုင်တွင်းသို့ ကုန်ပစ္စည်းတင်သွင်းရန် တွက်ချေမကိုက်သောကြောင့် အရောင်းအဝယ်များ ရပ်ထားရသည်ဟု ဟိုပန်ဈေးသည် အမျိုးသမီးတစ်ဦးက ပြောသည်။
“ဈေးကြီးကြီး နဲ့ ပေးဝယ်လာရတယ်၊ လယ်လုပ်တဲ့ သူတွေကို ပြန်ရောင်းပေးတယ်။ အခုက ဘာမှအရောင်းဝယ် မလုပ်တော့ဘူး၊ အရောင်းအဝယ် မလုပ်တော့လည်း အဆင်ပြေလားဆိုရင်လည်း မပြေဘူး။ အခုနေရာတိုင်းမှာ ကုန်ဈေးနှုန်းတွေက တအားတက်နေတယ်။ ရှေ့ဆက် အတွက်လည်း အခက်ခဲအများကြီး ရှိနေတယ်။ အခုကာလတွေမှာ ဒီလိုဘဲ အခက်ခဲတော့ ရှိနေတယ် “ ဟု ဈေးသည် အမျိုးသမီးက ပြောသည်။
အဆိုပါ စစ်အာဏာသိမ်းပြီး (၂) နှစ်နီးပါးတွင် စစ်အာဏာရှင်စနစ်၏ မှုဝါဒ ပြောင်းလဲမှုနှင့် မြန်မာပြည် ထွက်ကုန်ပစ္စည်းမရှိသည့်အတွက် အမေရိကန် ဒေါ်လာ ဈေးနှင့် အတူ တရုတ်ယွမ်ငွေ ၊ ထိုင်းဘတ်ငွေ များလည်း မြင့်တက်လာကာ ပြည်သူများ ပိုမိုကြပ်တည်းလာကြသည်။
