သျှမ်းပြည်တောင်ပိုင်း ဟိုပုံးမြို့နယ် ပန်လုံကျေးရွာသစ်မှ စစ်ရှောင်များ (၅၀၀) ကျော်သည် ယခုကာလတွင် မိုးရွာသွန်းမှုကြောင့် အခက်အခဲမျိုးစုံဖြင့် ကြုံတွေ့နေရကြောင်း စုံစမ်းသိရှိရသည်။
အဆိုပါ စစ်ရှောင် (၅၀၀) ကျော်သည် ကျောက်မဲမြို့နယ် ဟူးဆွန်ကျေးရွာအုပ်စုမှ စစ်ရှောင်လာသည့်သူများဖြစ်ပြီး နေရပ်သို့ မပြန်နိုင်သေးသဖြင့် ယခု မိုးတွင်းကာလတွင်လည်း အလှူရှင်များနည်းပါးလာမှုကြောင့် အခက်အခဲ မျိုးစုံ ကြုံတွေ့နေရကြောင်း အသက် (၂၇ ) နှစ်အရွယ် စစ်ရှောင်အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“ကျမတို့က တောထဲမှာဆိုတော့ အလှူရှင်တွေ လာဖို့ခက်တယ်။ တဲတွေဆောက်တာလည်း မပြီးသေးဘူး။ အမိုးအကာတွေကလည်း မရှိသေးဘူး။ အခု အလှူရှင်တွေကလည်း နည်းတော့ မိုးကာတွေ၊ စားနပ်ရိက္ခာတွေက မလုံမလောက်ဘူး။ သံဃာတော်တွေပဲ အားကိုးနေတယ်။ မိုးကလည်းရွာတော့ အခက်အခဲမျိုးစုံနဲ့ ကြုံနေရတယ်“ ဟု ၎င်း စစ်ရှောင် အမျိုးသမီးတစ်ဦး က ပြောသည်။
အဆိုပါ စစ်ရှောင်များ နေရပ်သို့ပြန်ရန်အတွက် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) မှ ပြန်ခွင့်မပြုသည့်အပြင် နေရပ်သို့ပြန်နေချင်သူများကို တစ်ဦးလျှင် (၆) သိန်းကျပ် ပေးဆောင်ရမည်ဟု ပြောဆို ထားကြောင်း သိရသည်။
“တချို့ လူတွေက ပြန်သွားကြည့်တယ်။ စစ်သား (TNLA) က ရွာထဲပေးမဝင်ဘူး။ သူတို့စကား မတတ်လို့ ပေးမဝင်ဘူးလို့ပြောတယ်။ ပြီးတော့ လာနေချင်ရင်တော့ တစ်ယောက်ကို (၆) သိန်း ပေးရမယ်လို့ ခြိမ်းခြောက်ထားတယ် “ ဟု ၎င်းအမျိုးသမီးက ပြောသည်။
အဆိုပါ ကိစ္စနှင့် ပတ်သက်ပြီး သျှမ်းသံတော်ဆင့်မှ TNLA ပြောရေးဆိုခွင့်ရှိသူကို ဖုန်းဖြင့် အကြိမ်ကြိမ် ဆက်သွယ်ပေမယ့် ဖုန်းလက်ခံဖြေကြားခြင်း မရှိခဲ့ပေ။
ကျောက်မဲ ဟူးဆွန်စစ်ရှောင်များသည် တိုင်းရင်းသားလက်နက်ကိုင်တပ်ဖွဲ့ အချင်းချင်း တိုက်ပွဲဖြစ်ပွားမှုကြောင့် စစ်ရှောင်ခဲ့ရသူများဖြစ်သည်။
ထိုစစ်ရှောင်များသည် စစ်ရှောင်စခန်း ၈ နေရာ ပြောင်းရွှေ့နေထိုင်ခဲ့ရသူများဖြစ်သည်။