သျှမ်းပြည်တောင်ပိုင်း လွိုင်လင်မြို့နယ် ပင်လုံမြို့ နောင်လိုင်ကျေးရွာအုပ်စု ဝမ်ကုန်းကျေးရွာရှိ ဒေသခံတွေကို SSPP က ဖမ်းဆီးသွားတဲ့အတွက် ဖြေရှင်းပေးဖို့ နိုင်ငံရေးပါတီ တခုကနေ ဖြေရှင်းပေးဖို့ တောင်းဆိုထားတယ်လို့ ဒေသခံတွေက ပြောပါတယ်။

ကျေးလက်ဒေသခံ ၂၈ ဦးကို ဩဂုတ် ၁ ရက်က စစ်ဆေးဖို့ ဆိုပြီး ဖမ်းဆီးသွားပြီးတယ်လို့ဆိုပါတယ်။ အဲ့ဒီ့နေ့ ညပိုင်းမှာ ၁၅ ဦးကို ပြန်လွှတ်ပေးခဲ့ပေမယ့် ကျန် ၁၃ ဦးကိုတော့ ဖမ်းဆီးထားဆဲဖြစ်တဲ့အတွက် ဝိုင်းဝန်းဖြေရှင်းပေးဖို့ သျှမ်းနိုင်ငံရေးပါတီ တခုထံ စာတင်ပြီး တောင်းဆိုထားတယ်လို့ လဲပြောပါတယ်။

အဲ့ဒီ့ကိစ္စ နဲ့ ပတ်သက်ပြီး ပင်လုံမြို့က SNLD (ကျားခေါင်းပါတီ) အတွင်းရေးမှူး စိုင်းဆု က “အခုချိန်ထိတော့ ၁၃ ယောက်ကို ဖမ်းဆီးထားဆဲဖြစ်တယ်။ စုစုပေါင်းဖမ်းသွားတာကတော့ ၂၈ ဦးဖမ်းသွားတာပေါ့။ ၁၅ ယောက်ကိုတော့ ပြန်လွှတ်လာပေးတာ။ လုံခြုံရေးအတွက် စစ်ဆေးဖို့ဆိုပြီးတော့ သူတို့လာခေါ်သွားတာ။ ဒေသခံတွေ ကျနော်ကိုပြောတာကတော့ SSPP က လာခေါ်သွားတာတဲ့၊ ကျနော်တို့အနေနဲ့တော့ သတင်းအချက်အလက် စုံစမ်းနေပါတယ်၊ အမှန်တကယ်ဘယ်လိုဖြစ်နေလဲပေါ့ ” ပြောပါတယ်။

ဖမ်းဆီးခံထားရတဲ့ အရပ်သား ၁၃ ဦးဟာ ဘယ်အဖွဲ့အစည်းနဲ့မှ ပတ်သက်မှုမရှိတဲ့အပြင် လက်ရှိ ဘယ်နေရာမှာ ထိန်းသိမ်းခံထားရတယ်ဆိုတာလဲမသိရဘူးလို့လဲပြောပါတယ်။

“ ဒေသခံတွေ ပြောပြချက်အရဆိုရင် သူတို့တွေက ဘယ်အဖွဲ့စည်းနဲ့မှ မပတ်သက်ဘူး။ အခုချိန်ထိ သူတို့ကို ဘယ်နား ဖမ်းခေါ်သွားလဲ တော့မသိဘူး။ အဆက်အသွယ်လည်း မရသေးဘူး၊ ကျနော်တို့လဲ စုံစမ်းနေဆဲပါ” လို့ စိုင်းဆု က ဆက်ပြောပါတယ်။

ကျေးလက် ဒေသခံ ၁၃ ဉီး ဖမ်းဆီးခံထားရတဲ့ကိစ္စနဲ့ ပတ်သက်ပြီး SSPP ပြောရေးဆိုခွင့်ရှိသူ ဗိုလ်မှူးစိုင်းဘုန်းဟန် က တခြားအဖွဲ့က သွေးထိုးလှုံ့ဆော်လို့ အဲလိုသတင်းပေါ်လာတာ လို့ ပြောပါတယ်။

“ကျနော်တို့က အပြစ်မဲ့ပြည်သူတွေကို ဖမ်းတဲ့ ပေါ်လစီမရှိဘူးဗျ။ ဟုတ်မဟုတ်ဆိုတာ ပြန်စစ်ဆေးရမှာဖြစ်ပါတယ်။ ဒါမဲ့ ကျနော်တို့ မူအားဖြင့်ကတော့ အပြစ်မဲ့ပြည်သူကို ဖမ်းမယ်ဆိုတာ မဟုတ်ဘူး။ အဖွဲ့စည်းရဲ့ သွေးထိုးလှုံဆော်မှုကြောင့်လားဆိုပြီး ကျနော်တို့ ပြန်စစ်ဆေးမှာ ဖြစ်ပါတယ်” လို့ ဗိုလ်မှူးစိုင်းဘုန်းဟန် က သျှမ်းသံတော်ဆင့် ကိုပြောပါတယ်။

လွိုင်လင်မြို့နယ်မှာ အရင်က RCSS လှုပ်ရှားတဲ့ဒေသ ဖြစ်ပေမယ့် လက်ရှိမှာတော့ SSPP က ဝင်ရောက်လှုပ်ရှားနေပါတယ်။ ဒါ့အပြင် ပအိုဝ်း ပြည်သူ့စစ်တပ်ဖွဲ့ နဲ့ အာဏာသိမ်း စစ်ကောင်စီ တပ်တို့လဲ ဝင်ရောက်သွားလာလှုပ်ရှားတဲ့ ဒေသဖြစ်ပါတယ်။