သျှမ်းပြည်မြောက်ပိုင်း ကျောက်မဲမြို့နယ်အတွင်းမှ ဒေသခံ အယောက် ၂၀ ကျော်ကို တအာင်း (ပလောင်) အမျိုးသားလွတ်မြောက်ရေး တပ်မတော် TNLA တပ်ဖွဲ့မှ လာရောက်ဖမ်းဆီးခြင်း ခေါ်ဆောင်သွားကြောင်း သတင်းသိရသည်။
ပြီးခဲ့သည့် ဇူလိုင်လ ၂၉ ရက် ည ၁၁ နာရီဝန်းကျင်တွင် ကျောက်မဲမြို့နယ် အုမ်းငန်းကျေးရွာအုပ်စု ပန်စံ ကျေးရွာအတွင်းသို့ အင်အား ၃၀ ခန့်ရှိသည့် TNLA စစ်သားများ ဝင်ရောက်လာပြီး ဒေသခံများကို လာရောက် ဖမ်းဆီးခေါ်ဆောင်သွားကြောင်း တအောင်းအမျိုးသား ပညာရေးကော်မတီ (TNEC) မှ သျှမ်းသံတော်ဆင့်ကို အတည်ပြု ပြောဆိုသည်။
“ဒေသခံ အယောက် ၂၀ ကျော်ကို စစ်သားသစ်အတွက် စာရင်းပါတဲ့သူတွေကို လာဖမ်းတယ်လို့ပြောပါတယ်၊ သတင်းတွေမှာပါတဲ့အတိုင်း TNEC ဆရာမပါ အဖမ်းခံရတယ်ဆိုတော့ မဟုတ်ဘူး၊ သူ့အမျိုးသားကို ဖမ်းသွားတာလို့ ကျမတို့ သတင်း သိရပါတယ်” ဟု TNEC မှ ဒု-ဥက္ကဌ က သျှမ်းသံတော်ဆင့်ကို ပြောသည်။
TNLA တပ်သားများသည် ဒေသခံများကို ဝင်ရောက်ဖမ်းဆီးချိန်တွင် နေအိမ်တံခါးများကို ကန်ဖွင့်ကာ အတင်းဝင်ရောက်ဖမ်းဆီးခဲ့ခြင်းဖြစ်ပြီး TNEC ကျောင်းဆရာမ၏ အမျိုးသားဖြစ်သူကို လာဖမ်းစဥ်တွင် ဗီဒီယိုရိုက်သည့်အတွက် ဆရာမကိုပါ ရိုက်နှက် ဖမ်းဆီးခေါ်ဆောင်သွားကြောင်း ဒေသခံများက ပြောသည်။
“TNLA တွေက တပ်သားသစ် အတွက်လူကောက်တာတဲ့၊ ဒါပေမဲ့ ဆရာမ အမျိုးသားက စစ်သားလုပ်ရမဲ့ စာရင်းထဲမှာ မပါတော့ သူ့အမျိုးသားကို ဘာလို့ လာဖမ်းလဲဆိုတာကို မေးရင်းဗီဒီယိုပါရိုက်တာ၊ အခုက ကွန်စလန်းမှာ အဖမ်းခံထားရတယ်လို့ သတင်းရပါတယ်”ဟု အမည်မဖော်လိုသူ အုမ်းငန်းကျေးရွာခံ အမျိုးသားတစ်ဦးက ပြောသည်။
ယင်းကိစ္စဖြစ်စဥ်နှင့် ပတ်သက်ပြီး အလှည့်ကျသည့် ဒေသခံများကိုသာ ဖမ်းဆီးခေါ်ဆောင်ခြင်း သာဖြစ် ကြောင်း၊ အမျိုးသမီး နှင့် TNEC ဆရာမကို ဖမ်းဆီးခြင်းအကြောင်းကို မသိရှိရကြောင်း TNLA ၏ ပြောရေးဆိုခွင့် ရှိသူ ဗိုလ်မှူး တားအိုက်ကျော်က သျှမ်းသံတော်ဆင့်ကို ပြောသည်။
“ကျနော်တို့ လှုပ်ရှားနယ်မြေထဲမှာ အသက် ၁၈ နှစ်ပြည့် သားယောင်္ကျားလေးနှစ်ယောက်ရှိတဲ့ ပလောင် လူမျိုးတွေကိုပဲ ကောက်တာပါ၊ အုမ်းငန်းရွာမှာ ဖြစ်သွားတဲ့ကိစ္စက စစ်သားကောက်ဖို့ အလှည့်ကျတဲ့ ဒေသခံနဲ့ ခွင့်ရက်လွန်ပြီး ပြန်မလာတဲ့ တပ်သားတွေကို ပြန်ခေါ်တာလို့သိရပါတယ်၊ အမျိုးသမီးနဲ့ TNEC ကိစ္စကိုတော့ ကျနော်မသိရဘူး” ဟု ဗိုလ်မှူး တားအိုက်ကျော်က ပြောသည်။
ထို့အတူပင် ယခုနှစ် ဖေဖော်ဝါရီမှ ဇူလိုင်လအထိ ကျောက်မဲမြို့နယ်၊ လွယ်ကုံကျေးရွာအတွင်း TNLA တပ်သားသစ် စုဆောင်းမှုများကြောင့် ဒေသခံများသည် ထိုင်းနိုင်ငံဘက်ခြမ်းထိ ထွက်ပြေးနေရကြောင်းလည်း သတင်းသိရသည်။
Leave a Comments