ဆီဆိုင်မြို့နယ် ကျောင်းဆက်မတက်တဲ့သူများ PNO နှင့် ပညာရေးဝန်ထမ်းများက ဒဏ်ငွေဆောင်ခိုင်း

0

သျှမ်းပြည်တောင်ပိုင်း ဆီဆိုင်မြို့နယ် ပါလောပါကယ်ကျေးရွာအုပ်စုတွင် ကျောင်းဆက်မတက်ဘဲ အလုပ်သွားလုပ်သည့် ကျောင်းသားများထံ ပအိုဝ်းပြည်သူ့စစ် (PNO) တပ်ဖွဲ့ နှင့် ပညာရေးဝန်ထမ်းများက ပိုက်ဆံအတင်း အဓမ္မကောက်ခံနေကြောင်း စုံစမ်းသိရသည်။

ပြီးခဲ့သည့် ဇွန်လပိုင်းတွင် ဆီဆိုင်မြို့နယ် ပါလောပါကယ်ကျေးရွာအုပ်စုမှ ကျောင်းဆက်မတက်ဘဲ အလုပ်သွားလုပ်သည့် ကျောင်းသား၊သူ တချို့၏ မိဘများထံ (PNO) ပြည်သူ့စစ် တပ်ဖွဲ့နှင့် ကျောင်းဆရာများက ညှိနှိုင်းပြီး မြန်မာကျပ်ငွေ (၁) သိန်းအထက် ဒဏ်ငွေဆောင်ခိုင်းပြီးကြောင်း ဆီဆိုင်မြို့မှ ကျောင်းသားမိဘတစ်ဦးက သျှမ်းသံတော်ဆင့်ကို ပြောသည်။

ဆီဆိုင်မြို့

“ မူဆယ်မြို့၊ လာရှိုးမြို့ နဲ့ ထိုင်းနိုင်ငံမှာ အလုပ်သွားလုပ်တဲ့ လူငယ်တွေ၊ ကျောင်းဆရာမတွေက (PNO) ပြည်သူ့စစ် နဲ့ ညှိပြီး ဖိအားပေး ကျောင်းတက်ခိုင်းတယ်။ မတက်ရင် ဒဏ်ငွေအနည်းဆုံး (၁) သိန်းကနေ (၁၀ သိန်း အထိ ဆောင်ခိုင်းတယ်။အခုမိဘတွေက တစ်ယောက် (၁) သိန်းကျပ်ပေးရတာ (၂) ယောက်ရှိပြီ။ တခြားသူတွေကို ကောက်ဖို့ဖိအားပေးခံရ တာလည်းရှိတယ် “ ဟု ၎င်း အမျိုးသားတစ်ဦးက ပြောသည်။

ဆီဆိုင်မြို့နယ် ပါလောပါကယ်ကျေးရွာအုပ်စုရှိ တချို့ကျေးရွာက ကျောင်းသား၊ သူများသည် စားဝတ်နေရး ခက်ခဲမှုကြောင့် ကျောင်းမတက်နိုင်ခြင်းဖြစ်ကြောင်း သိရသည်။

“ ပိုက်ဆံကောက်ရင် ဘယ်သူမှတော့ မပေးချင်ဘူးလေ ၊ စားဝတ်နေရေးအတွက် ရှိသေးတယ် ၊ တချို့တွေသူဆို ပိုက်ဆံမရှိဘူး။ စားဝတ်နေရေးအတွက် သား၊ သမီးတွေက နိုင်ငံခြားကို အလုပ်သွားလုပ်ကြတယ်။ တခြားမြို့ကို သွားလုပ်ကြတယ်၊ အခုသူတို့ လုပ်နေတဲ့ပုံစံက စားဝတ်နေရေးအတွက် ဖြေရှင်းဖို့အတွက် ပိတ်ပင်နေတယ်“ ဟု ၎င်း အထက်ပုဂ္ဂိုလ်တစ်ဦးက ထပ်လောင်းပြောသည်။

စစ်ကောင်စီ လက်အောက်ခံ ပအိုဝ်းအမျိုးသားအဖွဲ့ချုပ် (PNO/PNA) သည် ဆီဆိုင်မြို့နယ်၊ ပင်လောင်းမြို့နယ် နှင့် ဟိုပုံးမြို့နယ်အထိ တစ်အိမ်ကို ငွေ ၃ သောင်းကျပ် နှင့် ဆန် (၁) ပြည်ကို ကောက်ယူခဲ့ပြီး အသက် (၁၈) နှစ်မှ (၃၅) နှစ်အရွယ်လူငယ်များကို စစ်သင်တန်းပေးခဲ့ကြောင်းသိရသည်။

Leave a Comments