သျှမ်းပြည်မြောက်ပိုင်း မိုးမိတ်မြို့နယ်အတွင်းတွင် ထပ်တိုးရောက်ရှိလာသည့် ပြည်သူ့ကာကွယ်ရေးတပ်ဖွဲ့ (PDF) တပ်ဖွဲ့ နှင့် အာဏာသိမ်း စစ်ကောင်စီတပ်ဖွဲ့တို့သည် တစ်နာရီ နီးပါးကြာအောင် တိုက်ပွဲဖြစ်ပွားခဲ့ကြောင်း သတင်းသိရသည်။

ယမန်နေ့ (သြဂုတ် ၃) ရက် မွန်းလွဲပိုင်း ၁ နာရီကျော် မှ ၂ နာရီကျော် အထိ မိုးမိတ်မြို့အဝင်နားရှိ ညောင်ပင်ဆောက်ကျေးရွာအနီးတွင် တိုက်ပွဲဖြစ်ပွားခဲ့ခြင်းဖြစ်ကြောင်း အမည်မဖော်လိုသူ အသက် ၄၀ ဝန်းကျင်ရှိ ဒေသခံ အမျိုးသားတစ်ဦး က သျှမ်းသံတော်ဆင့်ကို ပြောသည်။

“သပိတ်ကျင်း ဘက်ကနေ တက်လာတဲ့ PDF တပ်ဖွဲ့တစ်ခုက မိုးကုတ်ကို အရင်ရောက်တယ်၊ မိုးကုတ်ကနေ မိုးမိတ်မြို့ထဲကို ရောက်လာပြီး မြို့အဝင်နားရှိတဲ့ စကစ က တပ်ရင်းအမှတ် (၃၄၈) နဲ့ ထိတွေ့တိုက်ပွဲဖြစ်ခဲ့တာ၊ PDF အင်အားက ၂၀၀ ကျော် လောက်ရှိတယ်” ဟု ၎င်းဒေသခံက ပြောသည်။

အဆိုပါ စစ်ကောင်စီ နှင့် တိုက်ပွဲဖြစ်ပွားသည့် PDF တပ်ဖွဲ့သည် မန္တလေးတိုင်းဒေသကြီး သပိတ်ကျင်းမြို့နယ်မှ တစ်ဆင့် မိုးကုတ်မြို့နယ် ထိုမှတစ်ဆင့် မိုးမိတ်မြို့နယ်အတွင်းသို့ ရောက်ရှိလာကြောင်းလည်း ဒေသခံများထံမှ သတင်းသိရသည်။

မိုးမိတ်မြို့နယ်အတွင်းတွင် လက်နက်ကိုင်တပ်ဖွဲ့ ထပ်တိုးလာခြင်းနှင့် ပတ်သက်ပြီး မြေပြန့်ဒေသ (သပိတ်ကျင်း) တွင် စစ်ကောင်စီတို့၏ ဖိနှိပ်နှိမ်နင်းမှု ပြင်းထန်လာသည့် အတွက် PDF တပ်ဖွဲ့များ အနေကြပ်ကာ သျှမ်းပြည်အတွင်း ရောက်လာခြင်း ဖြစ်နိုင်ကြောင်းလည်း အမည်မဖော်လိုသူ ဒေသခံတစ်ဦးက ပြောဆိုသုံးသပ်ထားသည်။

“ဖြစ်နိုင်တာက သူတို့နယ်ထဲမှာ စစ်ကောင်စီက ဖိနှိပ်မှု တင်းကြပ်လာပြီး လှုပ်ရှားရခက်လို့ ဒီဘက်ကို ရှောင်လာ သလားလို့ ထင်မိပါတယ်၊ ဘယ်လိုပဲဖြစ်ဖြစ် ကျနော်တို့ မိုးမိတ်မြို့နယ်အတွင်း လက်နက်ကိုင် တပ်ဖွဲ့နောက်တစ်ခု ထပ်တိုးလာတာတော့ စိုးရိမ်စရာကောင်းပါတယ်” ဟု ၎င်းက ပြောသည်။

လက်ရှိ မိုးမိတ်မြို့နယ်အတွင်းတွင် စစ်ကောင်စီတပ်ဖွဲ့ တပ်မ ၉၉ လက်အောက်ခံ တပ်ရင်းအမှတ် ၂၂၃၊ ၂၇၆၊ ၃၄၈ အပြင် တအာင်း(ပလောင်) အမျိုးသားတပ်မတော် TNLA၊ ကချင်လွတ်မြောက်ရေး တပ်မတော် (KIA) ၊ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တပ်ဖွဲ့တို့နှင့် ပြည်သူ့ကာကွယ်ရေးတပ်ဖွဲ့ (PDF) တို့လည်း သွားလာ လှုပ်ရှားနေကြောင်း သတင်းသိရသည်။

စစ်ကောင်စီ မှ နိုင်ငံတော် အာဏာသိမ်းပြီးနောက်ပိုင်းတွင် PDF တပ်ဖွဲ့များ အပြင် သျှမ်းပြည်အတွင်းမှ တိုင်းရင်းသားလက်နက်ကိုင်တပ်ဖွဲ့တို့နှင့်လည်း မကြာခဏ တိုက်ပွဲဖြစ်ပွားလေ့ရှိကြောင်း သိရသည်။