ပြောင်းစျေးနှုန်းများ ကျဆင်းလာသည့်အတွက် သျှမ်းပြည်မြောက်ပိုင်း သီပေါမြို့နယ်ရှိ ပြောင်းစိုက်တောင်သူများ အရှုံးပေါ်ပြီး အခက်အခဲကြုံတွေ့နေရကြောင်း စုံစမ်းသိရသည်။

ယခုရက်ပိုင်း ကမ္ဘာ့ပြောင်းစျေးနှုန်းကျဆင်းလာသည့်အပြင် စစ်အာဏာရှင်၏ တင်ပို့မှုလုပ်ထုံးလုပ်နည်း မူဝါဒ ပြောင်းလဲလာမှုကြောင့် ကြိုတင်ငွေလွှဲစနစ် တင်ပို့ရခြင်း နှင့် ဒေါ်လာငွေလဲလှယ်မှု စျေးနှုန်းကွာဟချက်ကြောင့် ပြောင်း တင်ပို့မှုများကို ကုန်သည်များက ရပ်နားထားရကြောင်း သိရသည်။

တချို့သော ပြောင်းကုန်သည်များမှာမူ ပို့ကုန်လိုင်စင်နှင့် အခွန်ဆောင်ရာတွင် လုပ်ဆောင်ရမည့် လုပ်ထုံးလုပ်နည်းများ ကြန့်ကြာနေခြင်းကြောင့် ပြောင်းတင်ပို့မှု မပြုလုပ်နိုင်ကြကြောင်း ပြောင်းကုန်သည်များထံ သိရသည်။

“ပြောင်းစျေးနှုန်းကလည်း ကျလာတယ်။ နောက်ပြီး ပြည်ပတင်ပို့မှုကလည်း ခက်လာတယ်။ ကုန်တွေ အခုထိ လှောင်ထားရတယ်။ မရောင်းရတာတွေရှိတယ်” ဟု ပြောင်းကုန်သည် အမျိုးသားတစ်ဦးက သျှမ်းသံတော်ဆင့် ကိုပြောသည်။

ထို့ပြင် ပြောင်းပွဲရုံများတွင် ပြောင်းများပြည့်နေခြင်းကြောင့် ပြောင်းစိုက်ပျိုးတောင်သူများလည်း ထပ်မံရောင်းရန် ခက်ခဲနေကြောင်း သီပေါမြို့ ပြောင်းစိုက်ပျိုးသူ ဒေသခံတစ်ဦးက ပြောသည်။

“ အခုခြံထဲမှာ ခူးရမယ့်ပြောင်းတွေလည်း ရှိနေတယ်။ မြန်မာပြည်က ပွဲရုံမှာလည်း ပြောင်းတွေအများကြီး ရှိနေတယ်၊ ရောင်းလို့လည်း မထွက်ဘူး။ ကျန်နေတဲ့ပြောင်းတွေက အများကြီး အခုပြောင်း အသစ်နဲ့ ထပ်နေတယ်၊ သီပေါမှာပြောင်း ဝယ် မယ့်သူက မရှိသလောက်တော့ ခက်ခဲတယ်။ ပြောင်းဈေးကမရှိဘူး စားဝတ်နေရေးအတွက် ကုန်ပစ္စည်းတွေက တအားဈေးတက်နေတယ်“ ဟု ၎င်းပြောင်းစိုက်ပျိုးသူ တစ်ဦးက ပြောသည်။

ယခင်က ပြောင်းဈေးနှုန်း တစ်ပိဿမှာ (၁,၀၀၀) ကျပ်ကျော်ရှိရာမှ ယခုကာလ တစ်ပိဿလျှင် (၆၀၀) ကျပ်ထိ ကျဆင်းနေကြောင်းလည်း ၎င်းကထပ်လောင်းပြောသည်။

အဆိုပါ မြဝတီနယ်စပ်တွင် ပြောင်းများတင်ပို့သော ကုန်သည်များက စစ်ကောင်စီ သတ်မှတ်ထားသော အခွန်ဆောင်မှု (၁,၈၅၀) ကျပ်ဖြင့် ပေးဆောင်ရသည့်အပြင် ပြောင်းတစ်တန်ကို အမေရိကန် ဒေါ်လာ (၃၀၀) ပေးဆောင်နေရကြောင်း နယ်စပ်ကုန်သည် အမျိုးသားတစ်ဦးက ပြောသည်။

“သူတို့သတ်မှတ်ထားတာက (၁,၈၅၀) ကျပ် နဲ့ သတ်မှတ်ထားပေမယ့် အပြင်မှာက တစ်ဒေါ်လာ (၂,၅၀၀)ကျော်တယ် ၊ အပြင်ကနေဝယ်ရတယ်။ အခွင်ဆောင်ရတာက (၁,၈၅၀) ကျပ်နဲ့တခါပေးရတယ်၊ ပြီးတော့ ပြောင်းတစ်တန်ကို အမေရိကန် ဒေါ်လာ (၃၀၀) ကျော်ထပ်ပေးရတယ်။ တချို့ပေးပြီးတဲ့သူတွေလည်း သူတို့က လက်မှတ်မထုတ်ပေးဘူး“ ဟု ၎င်းက ပြောသည်။

အဆိုပါ ဒေါ်လာကို ပြောင်းသုံးရန်အတွက် စစ်ကောင်စီ လက်အောက်ခံ မြန်မာ့ကုန်သွယ်ရေး ဦးစီးဌာနက ဇွန် (၂၀) ရက်မှာ ထုတ်ပြန်ခဲ့ပြီး တောင်ကြီးမြို့ ရှိ နိုင်ငံခြားကုန်ပစ္စည်းများ လက်လီ၊ လက်ကားရောင်းသည့် ကုမ္ပဏီများသည် အရောင်းအဝယ်ရှုံးသဖြင့် ကုမ္ပဏီကို ဇူလိုင် ၂၁ ရက်မှ စပြီး အရောင်း ခေတ္တပိတ်ဆိုင်းထားရကြောင်း သိရသည်။