သျှမ်းပြည်မြောက်ပိုင်း မူဆယ်မြို့ပေါ် အခြေစိုက်လှုပ်ရှားနေသည့် ငွေလိမ်ဂိုဏ်း အဖွဲ့ဝင်တချို့ကို ဖမ်ဆီးမိခဲ့ကြောင်း သတင်းသိရသည်။

မင်္ဂလာ မူဆယ်အနီးရှိ ကိုးထပ်တိုက်တွင် အွန်လိုင်းဂိမ်းဟု အကြောင်းပြ ဖွင့်လှစ်သည့် အွန်လိုင်းမှ တစ်ဆင့် ငွေလိမ်နေသော ဂိုဏ်းကို ဖမ်းဆီးရမိခြင်းဖြစ်ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ထို လူလိမ်ဂိုဏ်းကို ဇူလိုင် ၃၁ ရက် ည ၁၁ နာရီဝန်းကျင်တွင် သွားရောက်ဖမ်းဆီးခဲ့ကြောင်း သိရသည်။

“သူတို့လုပ်ငန်းပုံသဏ္ဌန်က အွန်လိုင်းဂိမ်းလိုမျိုးပေါ့၊ ဒါပေမဲ့ တရုတ်ပြည်ဘက်ကို အွန်လိုင်းကနေ ငွေလိမ်တဲ့ လုပ်ငန်း အဖွဲ့အစည်းဖြစ်တယ်ဆိုတာကို သူတို့အဖွဲ့သားတစ်ယောက်က မူဆယ်ဂရုမှာလာတင်ထားတယ်၊ အဲ့ကြောင့် စစ်ကောင်စီနဲ့ တရုတ်ရဲတွေပေါင်းပြီး လာဖမ်းတာ၊ တချို့ကိုဖမ်းမိသွားတယ်” ဟု ဖြစ်စဥ်များကို သိရှိသူ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထို့အပြင် အဆိုပါ ကိုးထပ်တိုက်မှ အဖွဲ့အစည်းသည် တရုတ်စီးပွားရေးလုပ်ငန်းရှင် နှင့် စစ်ကောင်စီမှ အငြိမ်းစား အရာရှိတစ်ဦးတို့ ပူးပေါင်းဖွင့်လှစ်ထားခြင်းဖြစ်ပြီး တရုတ်ဘက်မှ အလိုရှိနေသည့် ဂိုဏ်းဖြစ်ကြောင်းလည်း ၎င်းအမျိုးသားက ဆက်လက်ပြောသည်။

အဆိုပါ အွန်လိုင်း လူလိမ်ဂိုဏ်းရှိသည့် ကိုးထပ်တိုက်မှ စီးပွားရေးလုပ်ငန်းရှင်များ သွားရောက်ဖမ်းဆီးချိန်တွင် ထွက်ပြေး တိမ်းရှောင်မှုများလည်းရှိပြီး၊ တိုက်တစ်ခုလုံးရှိ ဝန်ထမ်းများ အချင်းချင်း သတိပေးကာ ထွက်ပြေးလွတ်မြောက် သူများလည်း ရှိနေကြောင်း အဆိုပါ အဖွဲ့အစည်းနှင့် ဆက်စပ်သူတစ်ဦးက ပြောသည်။

“စစ်သားတွေရဲတွေ မရောက်လာခင် ၁၁ နာရီလောက်မှာ သူဌေးတွေက ထွက်ပြေးတာတွေ့လို့ ဝန်ထမ်းတွေ ရုန်းရင်းဆန်ခတ်ဖြစ်ပြီး တချို့က ထွက်ပြေးသွားတယ်၊ အဲ့ကြောင့် ရဲတွေရောက်လာတဲ့အချိန် တချို့ပဲ ဖမ်းမိသွားတာ၊ ဒါပေမဲ့ စစ်ဆေးမှုပြီးရင် လာမယ့် ၁၅ ရက်နေ့ကျရင် ဒီလုပ်ငန်းပြန်ဖွင့်မယ်လည်း သတင်းသိရတယ်” ဟု ၎င်းအမျိုးသားက ဆက်လက်ပြောသည်။

လက်ရှိတွင် ဖမ်းမိထားသူများကို မည်သည့်နေရာတွင် ခေါ်ဆောင်ထားသည်ကို မသိရှိရသေးကြောင်းလည်း ဒေသခံများက ပြောသည်။

မူဆယ်မြို့သည် မြန်မာ_တရုတ်နယ်စပ် ကုန်သွယ်ရေးမြို့ဖြစ်သည့်အတွက် လူမျိုးပေါင်းစုံဝင်ထွက်သွားလာသည့် အပြင် ဒုစရိုက်လုပ်ငန်း နှင့် တရားမဝင်လုပ်ငန်းများလည်း ပေါများသည့် မြို့ဖြစ်သည်။

ထို့အပြင် စစ်ကောင်စီတပ်ဖွဲ့၊ ပြည်သူ့စစ်တပ်ဖွဲ့ နှင့် တိုင်းရင်းသား လက်နက်ကိုင်တပ်ဖွဲ့များစွာ ရှိသည့်မြို့ ဖြစ်သည့်အတွက် ပစ်ခတ်မှုများလည်း မကြာခဏဖြစ်ပွားသည့် မြို့လည်း ဖြစ်သည်။