သျှမ်းပြည်မြောက်ပိုင်း မိုးမိတ်မြို့နယ်မှ တိုင်းရင်းသားလက်နက်ကိုင်တပ်ဖွဲ့တို့၏ မူးယစ်ဆေးဝါးအကြောင်းပြ ဖမ်းဆီးမှုတွင် ပစ်ခတ်သေဆုံးမှုများ ရှိနေကြောင်း သတင်းသိရသည်။
ပြီးခဲ့သည့် ဇူလိုင်လ ၂၇ ရက်တွင် မိုးမိတ်မြို့နယ် မိုးဘုံကျေးရွာ (ဝမ်ဘုံကန်ရွာ) နှင့် ဝမ်အုံကျေးရွာရှိ ရွာသား ၄ ဦးကို မူးယစ်အကြောင်းပြကာ တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) တပ်ဖွဲ့မှ လာရောက်ဖမ်းဆီး သွားကြောင်း သတင်းသိရသည်။
အဆိုပါ ဖြစ်စဥ်ဖြစ်ပွားပြီးနောက် တစ်နေ့တည်းမှာပင် ဝမ်ဖိုင်ကျေးရွာအတွင်း မူးယစ်ရောင်းဝယ်နေသည့် အမျိုးသား တစ်ဦးအပါအဝင် ဒေသခံရွာသား ၄ ဦးကို ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) က ဝင်ရောက်ဖမ်းဆီးရာ ပစ်ခတ်မှုဖြစ်ပွားခဲ့ကြောင်း ဒေသခံအမျိုးသားတစ်ဦးက သျှမ်းသံတော်ဆင့် ကို ပြောသည်။
“ဇူလိုင် ၂၇ ရက်နေ့ မနက်ပိုင်းမှာ ဝမ်ဘုံကန်ဘက်ကို TNLA တပ်သားတွေက မူးယစ်အကြောင်းပြပြီး ရွာသား ၄ ဦးကို လာဖမ်းသွားတယ်၊ မွန်းလွဲပိုင်းရောက်တော့ ဝမ်ဖိုင်က ရွာသား ၄ ယောက်ကို SSPP/SSA ကဝင်ဖမ်းတယ်၊ အဲ့ဝမ်ဖိုင်မှာ ဝင်ဖမ်းတဲ့ မူးယစ်ဆေးရောင်းတဲ့အမျိုးသားက သူ့မှာသေနတ်နဲ့ SSPP/SSA ကို ခံပစ်လို့ အချင်းချင်း ပစ်ခတ်မှုဖြစ်ပြီး သူက သေသွားရတယ်” ဟု အမည်မဖော်လိုသူ မိုးမိတ်မြို့ခံ အသက် ၄၀ ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။
ထို့အပြင် ဇူလိုင်လ ၂၈ ရက်နေ့တွင်လည်း မိုးဘုံကျေးရွာ (ဝမ်ဘုံကန်) နှင့် ဝမ်အုံတို့မှ နောက်ထပ် ဒေသခံရွာသား ၆ ယောက်ကို TNLA တပ်သားများက ထပ်မံဖမ်းဆီးသွားကြောင်း ဒေသခံများက သျှမ်းသံတော်ဆင့်ကို ပြောသည်။
“မူးယစ်ဖမ်းလို့ ပစ်ခတ်မှု ဖြစ်ပြီးနောက်တစ်နေ့မှာ TNLA က နောက်ထပ်ရွာသား ၆ ယောက်ကို မူးယစ်ဆေး အကြောင်းပြချက်နဲ့ ထပ်လာဖမ်းသွားတယ်၊ TNLA တွေ ပြန်သွားတဲ့ ခဏအကြာမှာတော့ ရွာပတ်ဝန်းကျင်ကို SSPP/SSA တပ်သားတချို့ ရောက်လာတာတွေ့ရတယ်” ဟု အထက်ပါ အမျိုးသားက သျှမ်းသံတော်ဆင့်ကို ပြောသည်။
ယင်းကဲ့သို့ မူးယစ်ဆေးအကြောင်းပြ ဖမ်းဆီးမှုများမှတစ်ဆင့် တိုင်းရင်းသား လက်နက်ကိုင် တပ်ဖွဲ့နှစ်ဖွဲ့ကြား စစ်ရေးတင်းမာမှု နှင့် လူမျိုးရေး ပဋိပက္ခဖြစ်လာမည်ကိုလည်း ဒေသခံပြည်သူများက စိုးရိမ်နေကြသည်။
မိုးမိတ်မြို့နယ်အတွင်း ပြီးခဲ့သည့် ဇူလိုင်လ ၁ ရက်ကတည်းက ယနေ့အချိန်ထိ အာဏာသိမ်း စစ်ကောင်စီ တပ်ဖွဲ့နှင့် တိုင်းရင်းသားလက်နက်ကိုင် ပူးပေါင်းတပ်ဖွဲ့တို့၏ ထိတွေ့တိုက်ပွဲများနေ့စဥ်နီးပါး ရှိသည့်အတွက် ဒေသခံတချို့က စစ်ဘေးဒဏ်မှ ထွက်ပြေးတိမ်းရှောင်နေရကြောင်းသိရသည်။
