Monday, July 22, 2024

စစ်ရေးတင်းမာနေသည့် မိုင်းရှူးဘက်သို့ စစ်ကောင်စီ တိုက်လေယာဥ် နှစ်စီးပျံသန်း

Must read

စစ်ရေးတင်းမာနေသည့် သျှမ်းပြည်တောင်ပိုင်း မိုင်းရှူးမြို့နယ်အတွင်းသို့ အာဏာသိမ်း စစ်ကောင်စီ တပ်ဖွဲ့ ၏ တိုက်လေယာဥ် နှစ်စီး ပျံသန်းခဲ့ကြောင်း သတင်းသိရသည်။

ယနေ့ ဇူလိုင် ၂၇ ရက် နေ့ခင်းပိုင်း ၁၂ နာရီဝန်းကျင် အချိန်တွင် သျှမ်းပြည်မြောက်ပိုင်း လားရှိုးမြို့ အခြေစိုက် အရှေ့မြောက်ပိုင်းတိုင်း စစ်ဌာနချုပ် ရမခ စစ်တိုင်းရုံးမှ တိုက်လေယာဥ်နှစ်စီးသည် မိုင်းရှူးဘက်သို့ ဦးတည် ပျံသန်းသွားခဲ့ကြောင်း ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

စစ်ကောင်စီတိုက်လေယာဥ်

“ခါတိုင်းမြင်နေကျ ပုစဥ်းကောင် (ဟယ်ရီကော်ပတာ) မဟုတ်ဘဲနဲ့ ဒီနေ့က တိုက်လေယာဥ်နှစ်စီး တပ်တွင်းကနေ ထွက်လာတာတွေ့ရတယ်၊ တပ်ထဲက အရာရှိတစ်ဦးကို မေးကြည့်တော့ မိုင်းရှူးဘက် စစ်အင်အားဖြည့်တင်းဖို့ သွားရတာတဲ့” ဟု လားရှိုးမြို့ဒေသခံအမျိုးသားတစ်ဦးက ပြောသည်။

လက်ရှိ အခြေအနေနှင့် ပတ်သက်ပြီး ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တပ်ဖွဲ့ လှုပ်ရှားရာ မိုင်းရှူးမြို့နယ်အတွင်းတွင် စစ်ကောင်စီလေယာဥ်များသည် နေ့စဥ် ပျံသန်းလျက်ရှိပြီး ယနေ့တွင် တိုက်လေယာဥ်ပါ မြင်တွေ့ရကြောင်း ဒေသခံ အမျိုးသားတစ်ဦးက ပြောသည်။

“ပြီးခဲ့တဲ့ အပတ်ကတည်းက စစ်ကောင်စီလေယာဥ်တွေ မိုင်းရှူးမြို့ထဲ ဝဲနေတာတွေ့ရပါတယ်၊ အစက ညသန်းခေါင်ချိန်မှာမှ SSPP/SSA တပ်ဘက်ကို ကင်းလှည့်သလိုပတ်တာ၊ ဒီရက်ပိုင်းတော့ နေ့ခင်းပိုင်းလည်း လေယာဥ်နဲ့ လှည့်တာတွေ့ရတယ်၊ ဒီနေ့တော့ တိုက်လေယာဥ်နှစ်စီး မိုင်းရှူးမြို့ထဲ ဝဲလာတာတွေ့ရတယ်၊ ကျန်တဲ့နေရာတော့ မတွေ့ရဘူး” ဟု မိုင်းရှူးမြို့နယ်မှ အမည်မဖော်လိုသူ အမျိုးသမီးတစ်ဦးက ပြောသည်။

ထို့ပြင် စစ်ကောင်စီဘက်မှ စစ်အင်အားပြ လေယာဥ်ပျံဝဲမှုများ နှင့် ပတ်သက်ပြီး ဒေသခံပြည်သူများ အနေဖြင့် အပြင်ထွက်သွားလာရန် စိုးရိမ်ထိတ်လန့်နေကြောင်း ဒေသခံများက ပြောသည်။

စစ်ကောင်စီတိုက်လေယာဥ်

“ကျမတို့က ဟင်းစားထွက်ဝယ်ဖို့တောင် မဝံ့မရဲဖြစ်နေပြီ၊ အပြင်ထွက်လိုက်လို့ လေယာဥ်သံကြားတာနဲ့ ပြေးပုန်း ရမဲ့နေရာရှာရမလို ဖြစ်နေတာ စိတ်က ကြောက်တယ်လေ၊ ပြီးတော့ စစ်ရေးတင်းမာနေတာလည်း ကြာနေတော့ တိုက်ပွဲဖြစ်ဖို့ရာနှုန်းက များတယ်လေ” ဟု အထက်ပါ အမျိုးသမီးက ပြောသည်။

မိုင်းရှူးဒေသခံများအနေဖြင့် တိုက်ပွဲဖြစ်လာမည်ကို စိုးရိမ်သဖြင့် လက်ရှိမှာ ရှောင်တိမ်းရန် အတွက် ကြိုတင်ပြင်ဆင် နေကြောင်း သိရသည်။

ဇူလိုင် ၂၅ ရက်တွင်လည်း မိုင်းရှူးမြို့နယ်အတွင်းသို့ အာဏာသိမ်းစစ်ကောင်စီ လက်အောက်ခံ တိုင်းမှူး ကိုယ်တိုင် စစ်ကြောင်းများကို ဦးစီးနေကြောင်း သိရသည်။

စစ်ရေးတင်းမာနေသည့် မိုင်းရှူးမြို့နယ်အတွင်းတွင် စစ်ကောင်စီဘက်မှ စစ်အင်အားဖြည့်တင်းမှု အဆက်မပြတ် ပြုလုပ်နေသည့်အပြင် ပြီးခဲ့သည့် ဇန်နဝါရီ ၂၉ ရက်မှာလည်း စစ်ကောင်စီတပ်မှ မိုင်းရှူးဒေသခံ သျှမ်းအမျိုးသား လူငယ်တစ်ဦးကို ကားဖြင့် တိုက်ကာ သေဆုံးသွားခဲ့ရပြီး လက်ရှိ အချိန်ထိ မည်သည့် တာဝန်ယူမှု တာဝန်ခံမှုမှ မရှိသေးပါ။

အာဏာသိမ်း စစ်ကောင်စီတို့သည် မိုင်းရှူးမြို့နယ်အတွင်း လှုပ်ရှားနေသည့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့၏ တပ်စခန်းနေရာ ၃ ခုကို ဆုတ်ခွာခိုင်းရာမှ ယနေ့အထိ စစ်ရေး တင်းမာမှုများ ဖြစ်ပေါ်နေခြင်းဖြစ်သည်။

Leave a Comments

- Advertisement -spot_img

Latest article