သျှမ်းပြည်တောင်ပိုင်း တောင်ကြီးမြို့တွင် စစ်ကောင်စီက ယခုရက်ပိုင်းအတွင်း စစ်ဆေးရေးတင်းကြပ် နေသော်လည်း ခိုးယူလုယက်မှုများ ယခင်ထက်ပိုများပြားလာကြောင်း စုံစမ်းသိရသည်။
စစ်ကောင်စီက ကိုဖြိုးဇေယျာသော် နှင့် ကိုဂျင်မီကို သေဒဏ်ပေးပြီးနောက်ပိုင်း တောင်ကြီးမြို့တွင် PDF ကိုအားပေးမှုရှိ၊ မရှိကြောင်း သွားလာသူများကို ဖုန်းစစ်ဆေးမှုရှိလာကြောင်း သိရသည်။
“၂၅ ရက်နောက်ပိုင်းက ပိုစစ်ဆေးလာတယ်။ PDF တွေကိုထောက်ပံ့မှုရှိ၊ မရှိစစ်တယ်။ ဂိမ်းတွေ App တွေ ကွန်ပျူတာတွေနဲ့ စစ်ဆေးတာတွေ လုပ်နေတယ်။ အခုက Click လုပ်နေတာဆိုတော့ သူတို့အဲ့တာတွေလည်း စစ်နေတယ်။ မသင်္ကာတဲ့သူတွေကိုစစ်နေတာထင်တယ်” ဟု တောင်ကြီးမြို့ ဒေသခံ အမျိုးသမီးတစ်ဦးက ပြောသည်။
အလားတူ စစ်ကောင်စီက တောင်ကြီးမြို့အနှံ့တွင် စစ်ဆေးရေးတွေပြုလုပ်နေပြီး ခိုးလုယက်မှုလည်း များလာကြောင်းသိရသည်။
ထိုသို့ စစ်ဆေးမှုပြုလုပ်ရာတွင်လည်း ယခင်ထက်ပိုပြီး တင်းကြပ်စစ်ဆေးလာကြောင်း အသက် ၃၀ ကျော်အရွယ်ရှိ အမျိုးသမီးက ပြောသည်။
“ ခရီးသွားလာသူတွေကိုလည်း စစ်ဆေးတယ်။ ပြီးတော့ အခုနောက်ပိုင်းက မြို့ထဲတွေမှာလည်း စစ်တယ်။ မှတ်ပုံတင်တွေ၊ ယာဉ်မောင်းတွေတောင်းကြည့်တာပေါ့။ ပြီးတော့ ဖုန်းတွေလည်းပြန်စစ်လာတယ်။ သူတို့စစ်နေတာတောင် တောင်ကြီးမှာ ခိုးယူဖောက်လုတာလည်းများနေသေးတယ်။ ဟိုနေ့ကပဲ ကျောင်းကြီးစုမှာ ဆိုင်တစ်ခုဖောက်ခံရတယ်လို့ပြောတယ်။ သူတို့စစ်ဆေးရေးကတင်းကြပ်နေတာ။ ဒေသတွင်းလုံခြုံရေးက မရှိဘူး” ဟု ၎င်းက ပြောသည်။
စစ်တပ်က အာဏာသိမ်းပြီးနောက်ပိုင်း ပြည်သူများအတွက် လုံခြုံရေးအတွက်မရှိပဲ ၎င်းတို့ အတွက်သာ လုံခြုံဖို့အတွက် စစ်ဆေးရေးများသာ ပြုလုပ်နေကြောင်း တောင်ကြီးမြို့နယ်အတွင်း နိုင်ငံရေးလှုပ်ရှားသူတစ်ဦးက ဆိုသည်။
“ သူတို့က သူတို့လုံခြုံရေးအတွက် သူတို့စစ်ဆေးနေတာ။ ပြည်သူ့လုံခြုံရေးအတွက် စစ်ဆေးမှုတွေ ပြုလုပ်နေတာမဟုတ်ဘူး။ သူတို့အတွက် အန္တရာယ်ကျရောက်လာမှာဆိုးလို့ သူတို့က စစ်ဆေးမှု ပြုလုပ်တာဖြစ်တယ်” ဟု တောင်ကြီးမြို့နယ်အတွင်း နိုင်ငံရေးလှုပ်ရှားခဲ့သူတစ်ဦးက ပြောသည်။
စစ်တပ်က အာဏာသိမ်းပြီးနောက်ပိုင်း ပြည်သူများအနေဖြင့် မိမိလုံခြုံရေးအတွက် ကိုယ့်ကိုယ်တာဝန်ယူ နေရကြောင်း သိရသည်။
Leave a Comments