သျှမ်းပြည်မြောက်ပိုင်း မူဆယ်မြို့တွင် ယမန့်နေ့ ဇူလိုင် ၂၄ ရက် နံနက် ၃ နာရီအချိန်တွင် ကိုးကန့်တပ်ဖွဲ့မှ အခွန်မဆောင်သည့် ဆင်းဟော့ဟိုတယ် လောင်းကစားရုံကို လာရောက်ပစ်ခတ်ခဲ့ကြောင်း သတင်းသိရသည်။

မူဆယ်မြို့ စွမ်စော်ရပ်ကွက် စွမ်စော် (၇) လမ်းရှိ ဆင်းဟော့ဟိုတယ် လောင်းကစားရုံတွင် ပြည်သူ့စစ်မှ တာဝန်ယူထားပြီး အခွန်မဆောင်သည့် လောင်းကစားရုံဖြစ်သောကြောင့် ကိုးကန့် လက်နက်ကိုင်တပ်ဖွဲ့မှ လက်နက်ငယ်၊ လက်နက်ကြီးများဖြင့် လာရောက်ပစ်ခတ်ပြီး ပြည်သူ့စစ် နှင့် ကိုးကန့်လက်နက်ကိုင်တပ်ဖွဲ့များ အပြန်အလှန် ပစ်ခတ်မှုများ ဖြစ်ပွားခဲ့သည်။

“ အခွန်မဆောင်ထားတဲ့ လောင်းကစားရုံကို လာပစ်တာ။ အရင်နှစ် ဆောင်းတွင်းတုန်းကလည်း တစ်ကြိမ်လာပစ်သေးတယ်။ ကိုးကန့်က အခွန်လာကောက်တာ မပေးရင် သူတို့က လက်နက်ကြီးနဲ့ လာပစ်တယ်၊ အာပီဂျီ နဲ့ လာပစ်တယ်။ ပြည်သူ့စစ်တွေလည်း ပြန်ပြီးပစ်ကြတယ်“ ဟု မူဆယ်မြို့တွင်နေထိုင်သည့် အသက် ၄၀ အရွယ်ရှိ အမျိုးသားတစ်ဦးက သျှမ်းသံတော်ဆင့် က ပြောသည်။

ထိုသို့ ပြည်သူ့စစ် နှင့် လက်နက်ကိုင်တပ်ဖွဲ့များ အပြန်အလှန် ပစ်ခတ်မှုကြောင့် ကားပေါ်သို့ လက်နက်ကျည်ကျပြီး ထိုကားထဲမှ ဟိုတယ် ဝန်ထမ်းယာဉ်မောင်းသူ အမျိုးသားတစ်ဦး လက်နက်ကြီး စထိပြီး ဒဏ်ရာရရှိကြောင်း မူဆယ်ကူညီရေးအဖွဲ့တစ်ဖွဲ့မှ သိရသည်။

“ဒဏ်ရာရတဲ့သူလည်းရှိတယ်။ ကျည်ကျလို့ ဒဏ်ရာရပြီး ဆေးရုံပို့ရတာလည်း ရှိတယ်။ ဒဏ်ရာရ အမျိုးသမီးတွေတော့ မသိရဘူးဗျ။ ကားပေါ်ကျည်ကျလို့ ဒဏ်ရာရတဲ့ အမျိုးသားတော့သိတယ်။ အသက်တွေ နာမည်တွေတော့ မသိရဘူး။ ကျနော်တို့တော့ ဆေးရုံကိုပို့လိုက်ပြီ။ အသက်တော့ မစိုးရိမ်ရဘူးဗျ။ အဲ့အမျိုးသား နက်လက်ကြီး ကျည်စကြောင့် ကျောကုန်းတွေ ခြေထောက်တွေ ဒဏ်ရာအများကြီး ရထားတယ် “ ဟု သိရသည်။

အဆိုပါ မူဆယ်မြို့တွင် လက်နက်ကိုင်တပ်ဖွဲ့များ အင်အားများလာပြီး မကြာခဏ ပစ်ခတ်မှုများ ၊ လုယက်မှုများ ဖြစ်လာသောကြောင့် မူဆယ်မြို့တွင် ရှိသောပြည်သူများလည်း ညဘက်တွင် အရေးမကြီးပါက အပြင်မထွက်ကြရန် နှင့် သတိထားပြီး နေထိုင်ကြရန် မူဆယ်မြို့ ဒေသခံ အမျိုးသားတစ်ဦးက တိုက်တွန်းပြောဆိုလိုက်သည်။

“မူဆယ်မြို့က ပြည်သူတွေ လာပြီး အလုပ်လုပ်တဲ့သူ ဆွေမျိုး၊ မိတ်ဆွေတွေ ၊ စီးပွားရေး လုပ်တဲ့သူတွေ လုံခြုံမှုမရှိတော့ဘူး၊ လက်နက်ကိုင်တဲ့သူတွေလည်း များလာတယ်။ သတိထားပြီး နေဖို့တော့လိုတယ်။ အရေးမကြီးပဲ အပြင်မထွက်နဲ့ပေါ့နော်။ လုယက်မှုတွေ လူသတ်မှုတွေလည်း များလာတော့ မိတ်ဆွေတို့လည်း အထူးဂရုစိုက်ပြီး သတိထားကြပါ “ ဟု ၎င်းအမျိုးသားတစ်ဦးက တိုက်တွန်းထားသည်။

မူဆယ်မြို့နယ်သည် တရုတ် – မြန်မာ နယ်စပ် မြို့တစ်မြို့ဖြစ်ပြီး စစ်ကောင်စီ တိုင်းရင်းသား လက်နက်ကိုင် ပေါင်းစုံ ပြည်သူ့စစ်များစွာ လှုပ်ရှားရာ နယ်မြေဖြစ်သည်။