သျှမ်းပြည်မြောက်ပိုင်း မိုးမိတ်မြို့နယ်တွင် အာဏာသိမ်း စစ်ကောင်စီတပ်ဖွဲ့နှင့် ကချင်လွတ်မြောက်ရေး တပ်မတော် (KIA) ပူးပေါင်းတပ်ဖွဲ့တို့ တိုက်ပွဲဖြစ်ပွားပြီး ကလေးတစ်ဦး သေဆုံးပြီး အရပ်သားတစ်ဦး ကျည်ထိမှန်ခဲ့ကြောင်း သတင်းသိရသည်။
ယမန်နေ့ ( ဇူလိုင် ၂၁ ) ရက် နံနက်ပိုင်း ၁၀ နာရီခွဲကျော် က စတင်ကာ မွန်းလွဲပိုင်းအချိန်အထိ မိုးမိတ်မြို့နယ်အတွင်းတွင် အင်အား ၈၀ ခန့်ရှိသည့် စစ်ကောင်စီ တပ်ဖွဲ့နှင့် KIA ပူးပေါင်းတပ်ဖွဲ့တို့က ပြင်းထန်စွာ တိုက်ပွဲဖြစ်ပွားခဲ့ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုတိုက်ပွဲကြောင့် မိုးမိတ်မြို့နယ် သရက်ချိုကျေးရွာအနီး အသက် ၁၂ နှစ်အရွယ်ရှိ ကလေးတစ်ဦး ကျည်ထိမှန်သေဆုံးပြီး အရပ်သားတစ်ဦး ကျည်ထိမှန်ခဲ့ကြောင်းသိရသည်။
“တိုက်ပွဲဖြစ်တာက နှစ်နာရီနီးပါးလောက်ကို ကြာတယ်၊ စစ်ကောင်စီတွေကခံစစ်ဘက်ဆိုတော့ သူတို့က ကျဆုံးမှု ပိုများမယ်၊ တိုက်စစ်ဖြစ်တဲ့ KIA နဲ့ PDF တွေလည်း သေမှာပဲ။ ကလေးတစ်ဦးလည်း ကျည်ထိသေတယ်။ အရပ်သားတစ်ဦးကတော့ ကျည်ထိ ဒဏ်ရာရတယ်” ဟု မိုးမိတ်မြို့နယ် ဒေသခံအမျိုးသားတစ်ဦးက ပြောသည်။
အဆိုပါတိုက်ပွဲတွင် စစ်ကောင်စီ တပ်မ ၉၉ လက်အောက်ခံ ခလရ ၂၇၆ နှင့် ၃၄၈ တို့မှ စစ်အင်အား ၈၀ ခန့်သည် လွယ်မောက်စေတီတောင် ဆိုင်းလျန် (သဲနီကျေးရွာ) မှ သရက်ချိုကျေးရွာဘက်သို့ စစ်ကြောင်းချီ တက်လာစဥ်တွင် KIA နှင့် PDF တို့နှင့်ထိတွေ့ပြီး တိုက်ပွဲဖြစ်ခဲ့ကြောင်း သိရသည်။
“ဆိုင်းလျန်ရွာဘက်မှာလည်း စစ်ရေးတင်းမာမှုတွေ ရှိနေတော့ သူတို့ (စကစ) က အဲ့ဘက်ကို စစ်အင်အားဖြည့်ဖို့ လာရင်းနဲ့ ဝိုင်းတိုက်ခံရတာထင်တယ်၊ ဆိုင်းလျန်ရွာမရောက်ခင်မှာပေါ့၊ မိုးမိတ်မြို့နယ်ထဲမှာ စစ်ကောင်စီ ပိတ်မိ ပြီး KIA နဲ့ စစ်ရေးတင်းမာနေတဲ့ နေရာတော်တော်များများရှိတယ်” ဟု အထက်ပါ အမျိုးသားက သျှမ်းသံတော်ဆင့်ကို ပြောသည်။
မိုးမိတ်မြို့နယ်အတွင်းမှ စစ်ကောင်စီတပ်ဖွဲ့တို့သည် KIA ပူးပေါင်းတပ်ဖွဲ့နှင့် စစ်ဆင်ရေး ရှိနေသည့် အပြင် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA တပ်ဖွဲ့နှင့်လည်း စစ်ရေးတင်းမာမှုများ ရှိနေသည်။
ပြီးခဲ့သည့် ဇူလိုင်လ ၁ ရက်နေ့တွင် SSPP/SSA နှင့် စစ်ကောင်စီတို့ တိုက်ပွဲဖြစ်ပွားခဲ့ပြီး စစ်ကောင်စီဘက်မှ အရာရှိ အပါအဝင် ၅ ဦးသေဆုံးခဲ့ကြောင်း သတင်းသိရသည်။
