သျှမ်းပြည်အရှေ့ပိုင်း တကြောဖြစ်သည့် ကျိုင်းတုံမြို့နယ် နှင့် တာချီလိတ်မြို့နယ်တို့တွင် မြေငလျင်လှုပ်ခတ်မှု ဖြစ်ပွားခဲ့ပြီး အဆောက်အအုံများ တချို့ ပျက်စီးခဲ့ရကြောင်း သတင်းသိရသည်။
ယမန်နေ့ ဇူလိုင်လ (၂၁)ရက်နေ့ ည(၁၁)နာရီ (၃၇)မိနစ်အချိန်က လှုပ်ခတ်သွားသည့် ရစ်ချ်စတာ စကေး (၆.၄)အဆင့်ရှိ ငလျင်လှုပ်ခတ်မှုကြောင့် ကျိုင်းတုံမြို့ အခြေခံပညာအထက်တန်းကျောင်းဝန်းအတွင်းရှိ ဝန်ထမ်း အိမ်ရာ နှင့် ကျိုင်းတုံမြို့နယ်အတွင်း အချို့နေရာများတွင် နေအိမ်ထိခိုက်မှုများလည်း ရှိသည်ဟု ဒေသခံများ ထံက သိရသည်။
“ကျိုင်းတုံမှာကျောင်းဝန်ထမ်းအိမ်ရာက နံရံပြိုကျတယ်၊ အုတ်တံတိုင်းတချို့ပျက်စီးရတယ်၊တခြားရပ်ကွက် က နေအိမ်အဆောက်အအုံတချို့မှာလည်းအက်ကွဲရတာရှိတယ်၊ အားပြင်းတဲ့ မြေငလျင်တောင်ပြောရမှာ” ဟု ကျိုင်းတုံမြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
အလားတူပင် မြေငလျင်ကြောင့် တာချီလိတ်မြို့နယ်ထဲရှိ ရွှေ နှင့် သတ္တုတူးဖော်နေကြသည့် တာလေမြို့နယ် ခွဲမှ တာလေကျေးရွာ အုပ်စု နားဟိုင်းလုံကျေးရွာဘက်မှာလည်း မြေငလျင်လှုပ်ခတ်သွားခဲ့ကြောင်းလည်း သတင်းသိရသည်။
“ဒီဘက်ဆိုရင် ငလျင်ကြောက ထိုင်းဘက် ဗဟိုပြုရင်လည်း ဒီဘက်ထိရောက်လေ့ရှိတယ်ပေါ့၊ မနေ့က ငလျင်လှုပ်သွားပေမဲ့ ထိခိုက်ပျက်စီးမှုမရှိဘူး၊ သတ္တုတွင်းဘက်တော့မသိဘူး၊ ဒီနေ့ သတ္တုဆိုင်ရာတာဝန်ရှိ သူတွေ လာကြည့်မယ်လို့တော့ သတင်းသိရတယ်” ဟု တာလေဒေသခံအမျိုးသားတစ်ဦးက ပြောသည်။
ထိုနည်းတူ မိုင်းဖြတ်မြို့တွင်နေထိုင်သည့် အမျိုးသားတစ်ဦးက ” ညအိပ်ချိန် ငလျင်လှုပ်တော့ ချက်ချင်းပဲ လမ်းမပေါ်ထွက်နေရတယ်။ အရင်က တခါကြုံဖူးတော့ ငလျင်ဆိုရင် ကြောက်နေရတယ်” ဟု သျှမ်းသံတော်ဆင့်ကိုပြောသည်။
ယင်းကဲ့သို့ ငလျင်လှုပ်ရှားမှုနှင့် ပတ်သက်ပြီး သျှမ်းပြည်အရှေ့ပိုင်းရှိ သတ္တုတွင်းနှင့် ရွှေတူးဖော်မှုများ ပြုလုပ်နေကြသည့် ဒေသများတွင် ငလျင်ကြောလမ်းကြောင်းပေါ်တိုက်ရိုက်ရှိပါက ထိခိုက်ပျက်စီးမှုများ ပိုမိုများပြားလာနိုင်ကြောင်း သျှမ်းသဘာဝ ပတ်ဝန်းကျင်အဖွဲ့မှ စိုင်းခေးဆိုင်က ပြောဆိုထားသည်။
“ဒီဘက်ကျတော့ သတ္တုတွေ ရွှေတွေ တူးနေကြတော့ မြေကြီးထဲကလွတ်နေတဲ့နေရာတွေကို ပြန်အစားထိုး ဖို့မရှိလို့ထိခိုက်မှုတွေ ပိုမိုရှိလာနိုင်တယ်၊ ကျနော်တို့ မြေကြီးက သစ်တော၊ သစ်ပင်တွေ ရှိသေးရင် ထိခိုက် ပျက်စီးမှု ပိုမများအောင် သူထိန်းပေးတယ်၊ ဒါပေမဲ့ အခု သတ္တုတွင်းကြောင့် သစ်တောသစ်ပင်တွေ မရှိ တော့ ဒီထက်အားကောင်းတဲ့ ငလျင်လှုပ်ရင် စိုးရိမ်ရတယ်” ဟု စိုင်းခေးဆိုင်က ပြောသည်။
ထို့အပြင် ငလျင်လှုပ်ရှားမှုကို နည်းပညာပိုင်းအရ ၁၀ မိနစ်သာ ကြိုသိခွင့်ရသည့်အတွက် ပြည်သူများအနေ ဖြင့်လည်း ငလျင်ဘေးအန္တရာယ်အတွက် အမြဲအသင့်ဖြစ်အောင် ကြိုတင်ပြင်ဆင်ထားသင့်ကြောင်းလည်း စိုင်းခေးဆိုင်က ပြောဆိုထားသည်။
ယင်းကဲ့သို့ ငလျင်လှုပ်ခတ်မှုများကြောင့် ကျိုင်းတုံ – တာချီလိတ်လမ်းပိုင်းတွင် တောင်ပြိုပြီး လမ်းပေါ်သို့ ကျောက်တုံး ကျောက်ခဲများကျကာ လမ်းပိတ်နေမှုဖြစ်ပေါ်နေကြောင်း သိရသည်။
မြန်မာ မိုးဇလဌာနကမူ ကျိုင်းတုံမြို့အနီး၌ ဇူလိုင်လ ၂၁ ရက်၊ ည ၁၁ နာရီ ၁၀ မိနစ်၊ ၈ စက္ကန့်အချိန်က ရစ်ချ်စတာစကေး ၅ ဒသမ ၃ အဆင့် ရှိ မြေငလျင်တစ်ခုနှင့် ၁၁ နာရီ ၃၇ မိနစ်၊ ၂၆ စက္ကန့်အချိန်က အင်အား ရစ်ချ်စတာစကေး ၆ ဒသမ ၁ အဆင့်ရှိ မြေငလျင်တစ်ခု လှုပ်ရှားသွားကြောင်း ထုတ်ပြန်ထားသည်။
လွန်ခဲ့သည့် ၂၀၁၁ခုနှစ်တွင်လည်း သျှမ်းပြည် အရှေ့ပိုင်း တာချီလိတ်မြို့နယ်အတွင်း ရစ်ချ်စတာ စကေး ၇ အဆင့်ထိ လှုပ်ခတ်ခဲ့ပြီး ပြည်သူသေဆုံးမှုရှိခဲ့သည့်အပြင် အပျက်အစီးအများအပြားရှိခဲ့သည်။
