သျှမ်းပြည်တောင်ပိုင်း ပင်လောင်းမြို့နယ် လွယ်ကျိုင့်ကျေးရွာတွင် စစ်ရှောင်များ (၆၀၀) ကျော် စားနပ်ရိက္ခာနှင့် ဆေးဝါးများ အခက်ခဲများရှိနေကြောင်း သတင်းသိရသည်။
လွယ်ကျိုင့်ကျေးရွာသည် ပင်လောင်းမြို့နှင့် (၂၅) မိုင်ဝေးကွာပြီး ၎င်းကျေးရွာတွင် စစ်ဘေးရှောင် (၆၀၀) ကျော် ရှိသည်။
ထိုထဲမှ အမျိုးသမီး (၆၀) ရာခိုင်နှုန်း ၊ ကလေးငယ်များ (၃၀) ရာခိုင်နှုန်း နှင့် ကိုယ်ဝန်ဆောင် အမျိုးသမီး (၅) ဦးကျော် ရှိနေကြောင်း သိရသည်။
အဆိုပါ စစ်ရှောင်များသည် ယခုကာလ မိုးရာသီအချိန်တွင် စားနပ်ရိက္ခာများ၊ ဆေးဝါးများ နှင့် မိုးကာများ လုံလုံလောက်လောက် မရှိသဖြင့်လက်ရှိကာလမှာ ကျန်းမာရေးအတွက် အခက်အခဲများ ရင်ဆိုင် ကြုံတွေ့နေရ ကြောင်း လွယ်ကျိုင့်စစ်ဘေးရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ကျနော်တို့ စစ်ရှောင် အခက်ခဲတွေတော့ တော်တော်များတယ်ဗျ။ သန့်ရှင်းရေး အပိုင်းမှာကော ၊စားသောက်ကုန် ပိုင်းမှာကော ၊ ကျန်းမာရေး အပိုင်းမှာကော တော်တော်အခက်ခဲရှိတယ်။ မိုးကာတွေလည်း လိုအပ်နေတယ်။ ဆေးရုံဆေးခန်းလည်း လက်လှမ်းမမှီဘူး။ အခုမိုးရာသီချိန်မှာ ရာသီတုပ်ကွေးကြိုတင် ကာကွယ်ဖို့ စုဆောင်းဖို့ကော၊ အဓိကတော့ စားနပ်ရိက္ခာနဲ့ဆေးဝါးလိုအပ်နေတယ် ” ဟု ၎င်းစစ်ရှောင် တစ်ဦးကပြောသည်။
လက်ရှိ ကာလမှာ စစ်ရှောင်များအတွက် ကျန်းမာရေး ဆိုင်ရာ ဆေးဝါးများအရေးပေါ်လိုအပ်နေကြောင်း သိရသည်။
ထို့အပြင် လွယ်ကျိုင့်စစ်ရှောင်စခန်းတွင် ကလေးများအတွက် ကိုယ်ထူကိုယ်ထ စာသင်ကျောင်းများ ဖွင့်လှစ်ရန် စာရေးကိရိယာများ နှင့် ထိုင်ခုံများ လိုအပ်နေကြောင်း စစ်ရှောင်ကူညီသူများက ပြောသည်။
“ ကျနော်တို့ ကလေးတွေအတွက် စားရေးကိရိယာ ဘောပင် ၊ နေရာထိုင်ခင်း ခုံ ၊ စားပွဲတွေ တော့အခက်ခဲတွေ ရှိတယ်။ ဒီရက်ပိုင်း အလှူရှင်တွေလည်း နည်းနည်းကျဲလာတယ်။ကျနော်တို့ကတော့ ဒီက ကလေးတွေအတွက် ပညာရေးတွေ မဆုံးရှုံး စေချင်ဘူး “ဟု သွားရောက်ကူညီပေးသူ တစ်ဦးက ပြောသည်။
ဖယ်ခုံမြို့ စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ (PDF) တပ်များ မကြာခဏ တိုက်ပွဲဖြစ်ပွားပြီးနောက် ၎င်းအနီးနားရှိ ကျေးရွာဒေသခံများ လွယ်ကျိုင့်ကျေးရွာသို့ စစ်ရှောင်လာခဲ့ကြသည်။
