သျှမ်းပြည်တောင်ပိုင်း ဖယ်ခုံမြို့နယ် လဟယ်ကျေးရွာအနီး လွယ်မကူးတောင်ပေါ်တွင် တပ်စွဲထားသည့် စစ်ကောင်စီတပ်ကို ဖယ်ခုံ PDF တပ်ရင်း ၂ နှင့် KNDF BO3 ပူးပေါင်းပြီး ဝင်ရောက်တိုက်ခိုက်ခဲ့ကြောင်း စုံစမ်းသိရှိရသည်။
ယမန်နေ့ (ဇူလိုင် ၂၁) နေ့လည် ၃ နာရီဝန်းကျင်တွင် စစ်ကောင်စီတပ်ဆွဲထားသည့် နေရာကို ဖယ်ခုံ PDF တပ်ရင်း ၂ နှင့် KNDF BO3 ဝင်ရောက်တိုက်ခိုက်ခဲ့သောကြောင့် စစ်ကောင်စီဘက်က (၉) ဦး ခန့် သေဆုံးကြောင်း သိရသည်။
“တိုက်ပွဲကတော့ ၁ နာရီကြာ လောက်ဖြစ်သွားတယ်။ အဲ့အချိန်အတွင်းမှာ စစ်ကောင်စီဘက်က (၉) ယောက်လောက်ထိခိုက်၊ သေဆုံးတာရှိတယ်။ ကျနော်တို့ကလည်း အချိန်ရရင်ရသလိုဝင်တိုက်ခဲ့တာပါ။ ကျနော်တို့ကပြောက်ကျားအနေနဲ့ ဝင်ရောက်တိုက်ခိုက်ခဲ့တာပါ” ဟု ဖယ်ခုံ PDF တပ်ရင်း ၂ တစ်ဦးက ပြောသည်။
ထိုနောက်ဖယ်ခုံမြို့ စကခ -၇ က လက်နက်ကြီးဖြင့် ပစ်ကူခဲ့သောကြောင့် တပ်ဆုတ်ခွဲခဲ့ကြောင်း ဖယ်ခုံ PDF တပ်ရင်း ၂ ကပြောသည်။
ထိုသို့ စစ်ကောင်စီ၏ လက်နက်ကြီးပစ်ခတ်မှုကြောင့် ဖယ်ခုံမြို့နယ် နားဟီးကျေးရွာ နှင့် ဗန်ခူးကျေးရွာထဲတွင် လက်နက်ကြီးကျရောက်မှုကြောင့် ပြည်သူများထပ်မံထွက်ပြေးတိမ်းရှောင်ရကြောင်းသိရသည်။
အဆိုပါ ကျေးရွာ ၂ ခုရှိ ဒေသခံများသည် ယခင်က စစ်ဘေးရှောင်ခဲ့ပြီး ပြန်လာခဲ့သည့် ပြည်သူများဖြစ်ကာ ယမန်နေ့မှ တစ်ဖန် ထပ်တိမ်းရှောင်ရကြောင်း သိရသည်။
“ စစ်ကောင်စီက လက်နက်ကြီးပစ်တယ်။ တောင်ကိုကျော်သွားပြီး နားဟီးကျေးရွာ နဲ့ ဗန်ခူးကျေးရွာထဲ ကျရောက်သွားတာ။ အဲ့ရွာထဲမှာ ပေါက်ကွဲသေးတယ်။ အဲ့ရွာကလူတွေက အစက စစ်ရှောင်ခဲ့တာပဲ။ တစ်ချို့ပြန်လာနေတာ။ မနေ့က လက်နက်ကြီးကြောင့် သူတို့ အခုက တစ်ခါထပ်ပြေးရတာ” ဟု အထက်ပါ ဖယ်ခုံ PDF တပ်ရင်း ၂ က ပြောသည်။
အလားတူ ယနေ့တွင်လည်း စစ်ရေးတင်းမာနေလျက်ရှိပြီး စစ်ကောင်စီတပ်လည်း လွယ်မကူးတောင်ပေါ် တပ်စွဲပြီးနေထိုင်နေသေးသည်။
ပြီးခဲ့သည့် ဇူလိုင် ၁၃ ရက်တွင်လည်း ဖယ်ခုံ PDF တပ်ရင်း ၂ မှ စစ်ကောင်စီတပ်စွဲထားသည့် ဆောင်နန်းခဲကျေးရွာ အရှေ့ဘက်ကို ဝင်ရောက်တိုက်ခိုက်ခဲ့ပြီး စစ်ကောင်စီဘက်မှ ၅ ဦးသေဆုံးကြောင်း သိရသည်။
Leave a Comments