စစ်ကောင်စီ မှ သျှမ်းပြည် တိုးတက်ရေးပါတီ သျှမ်းပြည်တပ်မတော် (SSPP/SSA)ကို မနက်ဖြန် (ဇူလိုင် ၂၁) ရက် နောက်ဆုံးထားပြီး တပ်စခန်းဆုတ်ခိုင်းသည့် အပေါ် ဒေသခံများက တိုက်ပွဲဖြစ်ပွားမည်ကို စိုးရိမ် ထိတ်လန့်နေကြောင်း သတင်းသိရသည်။

မိုင်းရှူးမြို့နယ်အတွင်းရှိ SSPP ၏ တပ်စခန်းနေရာသုံးခုကို ဇူလိုင် ၂၁ ရက်နောက်ဆုံးထား တပ်ဆုတ်ရန် စစ်ကောင်စီက ပြောဆိုထားပြီး လက်ရှိအချိန်ထိ စစ်ရေးတင်းမာမှုရှိနေသည့်အတွက် တိုက်ပွဲပြင်းထန်စွာ ဖြစ်ပွားမည်ကို စိုးရိမ်ကြောင်း အသက် (၃၀)အရွယ်ရှိ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“လက်ရှိအနေအထားအရဆိုရင် ပစ်ကြတိုက်ကြမှာကအမှန်ပဲ၊ ကျမတို့လို ရောင်းဝယ်ရေး လုပ်နေတဲ့သူတွေ ဆိုလည်း ရှိတဲ့ဖောက်သည်တွေ ဆုံးရှုံးမှာ၊ တိုက်ပွဲဖြစ်ရင်တော့ အရာအားလုံးကခက်ခဲကြမှာပဲ၊ ဒါကြောင့် တိုက်ပွဲဖြစ်မှာကို စိုးရိမ်တယ်” ဟု မိုင်းရှူးမြို့နယ်မှ အသက် ၃၀အရွယ်ရှိ အမျိုးသမီးက ပြောသည်။

ပြီးခဲ့သည့် ဇူလိုင်လ ၁၇ ရက်နေ့တွင်လည်း မိုင်းရူးမြို့နယ်မှ အရပ်သားပြည်သူ သုံးဦးကို စစ်ကောင်စီတပ်ဖွဲ့ ပစ်သတ်ခဲ့သည့်အတွက် ဒေသခံပြည်သူများ စိုးရိမ်စိတ် ပိုမိုကြီးမားနေခြင်းဖြစ်ကြောင်းလည်း သိရသည်။

ယင်းကဲ့သို့ စစ်ရေးတင်းမာမှုများအပေါ် ပြည်သူများ စိုးရိမ်မှု မြင့်တက်နေခြင်းနှင့် ပက်သက်ပြီး SSPP/SSA တပ်ဖွဲ့အနေဖြင့် စစ်ဆင်ရေးအတွက် ပြင်ဆင်မှုများရှိနေသော်လည်း ပြည်သူများ ထိခိုက်နစ်နာမှု မရှိစေရေး အတွက် ကြိုးစားနေကြောင်း ဒေသအတွင်း လှုပ်ရှားနေသည့် အရာရှိတစ်ဦးက သျှမ်းသံတော်ဆင့်ကို ပြောသည်။

“ကျနော်တို့ဘက်ကလည်း ဘယ်လိုဆက်ဖြစ်လာမလဲဆိုတာ မသိရသေးအတွက် စစ်ဆင်ရေးပြင်ဆင်ထား ရပါတယ်၊ သူတို့ဘက်က စပြီးကျူးလွန်လာတာနဲ့ တိုက်ပွဲ စမှာဖြစ်တယ်၊ ပြီးတော့ တိုက်ပွဲဖြစ်ပြီဆိုတာနဲ့ သေနတ်သံက တစ်နေရာတည်းထွက်မှာမဟုတ်ဘူး၊ ဒါပေမဲ့ ပြည်သူ လူထု ထိခိုက်နစ်နာမှု မရှိအောင် ကြိုးစား မှာပါ၊ ” ဟု မြေပြင်အတွင်း လှုပ်ရှားသည့် SSPP/SSA အရာရှိ က ပြောသည်။

လက်ရှိ စစ်ကောင်စီ မှ SSPP တပ်စခန်း ၃ခု တပ်ဆုတ်ခိုင်းသည့်နေရာသည် SSPP အတွက် အရေးပါသည့်နေရာ ဖြစ်ပြီး၊ စစ်ကောင်စီဘက်မှ မည်သည့်အကြောင်းကြောင့် SSPP ကို တပ်ဆုတ်ခိုင်းသည်ကို လည်း အသေးစိတ်မသိရှိသေးပေ။

မိုင်းရှူးမြို့နယ် အတွင်းလွန်ခဲ့သည့် ၂၀၁၅ခုနစ်တွင်လည်း စစ်ကောင်စီနှင့် SSPP တို့ တိုက်ပွဲ ပြင်းထန်မှု ဖြစ်ပွားခဲ့ပြီး စစ်ရှောင် ထောင်ချီရှိခဲ့သည့် ဒေသ တစ်ခုလည်းဖြစ်သည်။

မည်သို့ပင်ဆိုစေကာမူ ဒေသခံပြည်သူများတချို့က မြို့ပေါ်သို့ ကြိုတင်စစ်ဘေးတိမ်းရှောင်မှုများ ပြုလုပ်နေသလို ဒေသအတွင်းကျန်ရှိနေသည့်ရွာသားများတချို့လည်း စိုးရိမ်စိတ်များဖြင့် အခြေအနေများစောင့်ကြည့်နေကြောင်း သတင်းသိရသည်။

ထို့အပြင် သျှမ်းတောင် မိုင်းကိုင် နှင့် ပင်လုံ အနီးတဝှိက်တွင်လည်း သေနတ်သံများ စတင်ကြားလာသည့်အတွက် ပြည်သူများ စိုးရိမ်ထိတ်လန့်မှုဖြင့် စစ်ဘေးကြိုတင်ရှောင်နေရကြောင်းသိရသည်.

ပြီးခဲ့သည့် ဇူလိုင်လ ၁၄ ရက် မိုင်းနောင်မြို့တွင် စစ်ကောင်စီခေါင်းဆောင် ဒုတိယ ဗိုလ်ချုပ်ကြီး ရာပြည့် နှင့် SSPP/SSA ဒုတိယ ဥက္ကဌ -၂ ဗိုလ်ချုပ်ခွန်ဆိုင်တို့ ဆွေးနွေးခဲ့စဥ်တွင် SSPP တပ်စခန်းနေရာများကို ၇ ရက် အတွင်း တပ်ဆုတ်ရန်ပြောပြီးမနက်ဖြန်သည် နောက်ဆုံးရက်ဖြစ်သည်။