သျှမ်းပြည်တောင်ပိုင်း ပင်လောင်းမြို့တွင် စစ်ရှောင်များအတွက် ဆေးဝယ်ယူရန် ခက်ခဲနေကြောင်း စုံစမ်းသိရသည်။
ပင်လောင်းမြို့အတွင်း ရောက်ရှိနေသည့် စစ်ရှောင်များသည် ဖယ်ခုံမြို့နယ်၊ မိုးဗြဲမြို့နယ် နှင့် ကရင်နီ ဖက်တို့မှ စစ်ရှောင်ကြသူများဖြစ်ကြပြီး စစ်ရှောင် (၃၀၀) ကျော်သည် စားနပ်ရိက္ခာများ အပါအဝင် အမျိုးသမီးအဝတ် နှင့် ဆေးဝါးများ ဝယ်ယူရန်ခက်ခဲ နေကြောင်း သိရသည်။
ပင်လောင်းမြို့အတွင်းရှိ ဆေးဆိုင်များကို စစ်ကောင်စီက စစ်ဘေးရှောင်သူများအတွက် အရေးပေါ် ဆေးဝါးမရောင်းပေးရန် ဆေးဆိုင်ပိုင်ရှင်များကို ခြိမ်းခြောက်ထားကြောင်း သိရသည်။
ထို့ကြောင့် ဆေးဝါးဝယ်ယူ၍ မရသောကြောင့် စစ်ရှောင်များ ယခုကာလဖြစ်ပွားသော ရာသီတုပ်ကွေးများ အတွက် စိုးရိမ်နေရသည်ဟု ပင်လောင်းမြို့ စစ်ရှောင်ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ ကရင်နီ နဲ့ စကစ တို့တိုက်ပွဲ ဖြစ်ကတည်းက သူတို့ဆေးဆိုင်က ဆိုင်ရှင်တွေကို ခြိမ်းခြောက်ထားတာ၊ အရေးပေါ်ဆေး ပက်တီး၊ အရက်ပြန်တို့ လာဝယ်ရန် မရောင်းခိုင်းဘူး၊ လာဝယ်ရင်လည်း သူတို့ကို အကြောင်းကြား ရတယ်။ ဆေးဝါးတွေ အများကြီးသွားဝယ်လို့ မရဘူး။ နည်းနည်းလေး ဝယ်ရင်တော့ရတယ်၊ အခု ရာသီတုပ်ကွေး ဖြစ်လာချိန်မှာ စစ်ဘေးရှောင်တွေ အတွက်စိုးရိမ်နေရတယ်“ ဟု စစ်ရှောင် ကူညီနေသည့် အမျိုးသားက ဆိုသည်။
အဆိုပါ ပင်လောင်းမြို့တွင် ဆေးဆိုင်များ (၆) ဆိုင်ခန့် ရှိနေသော်လည်း ဆေးဝါးဝယ်ယူရန် ခက်ခဲကြောင်း ၎င်းက ဆက်ပြောသည်။
ထို့အပြင် စစ်ရှောင်သူများအတွက် စားနပ်ရိက္ခာများ အပါအဝင် အဝတ်အထည်များ နှင့် ဆေးဝါးများကို သယ်ယူရန် အောင်ပန်းမှ ပင်လောင်းလမ်းခွဲ ရှိသော ဂိတ်တွင် စစ်ကောင်စီ၏ စစ်ဆေးမှု တင်းကြပ်နေပြီး၊ ဆေးဝါးများကိုလည်း တင်သွင်းခွင့်မပေးတော့ကြောင်း သိရသည်။
“စစ်ကောင်စီစောင့်တဲ့ ဂိတ်တွေမှာ စစ်ရှောင်အတွက် စားနပ်ရိက္ခာ ၊ ဆေးဝါးတွေ လည်းမပေး သယ်ဘူး ၊အဝတ်အထည် ဆိုလည်း ကျနော် အများကြီးသယ်လို့မရတော့ဘူး၊ သူတို့ စစ်ဆေးတာ ကြမ်းတယ်။ သူတို့စစ်လို့ တွေ့ရင်လည်း ပြန်မလွှတ်တော့ဘူး။ ဘာပဲဝယ်ဝယ် ထောက်ခံစာပါမှ ရတယ်။ ကိုဗစ် ကာကွယ်ဆေး (၂) ချောင်းထိုးပြီး စာရွက်စာတမ်း၊ မှတ်ပုံတင်တွေလည်း ပြရတယ်“ ဟု အထက်ပါ စစ်ရှောင်ကူညီသူက ပြောပြသည်။
ထိုသို့ ပင်လောင်းမြို့ စစ်ရှောင်များအတွက် ဆေးဝါးများ ပြတ်လပ်လာလျှင် ရွာကော်မတီများက ရှာကြံပေးရသည်ဟု သိရသည်။
စစ်ကောင်စီ တပ်ဖွဲ့များသည် ပြည်သူ့ကာကွယ်ရေး ဖြစ်သော (PDF) တပ်ဖွဲ့များမှ ဆေးဝါးများနှင့် စားနပ်ရိက္ခာများကို မပံ့ပိုးစေရန်အတွက် ဂိတ်များကို စစ်ဆေးမှုတင်းကြပ်စွာ လုပ်ဆောင်ခြင်း ဖြစ်ကြောင်း ဒေသခံများ ပြောချက်အရသိရသည်။
Leave a Comments