သျှမ်းပြည်အရှေ့ပိုင်း တာချီလိတ်မြို့နယ် တာလေမြို့ နားဟိုင်းလုံကျေးရွာအတွင်း မိုးဆက်တိုက်ရွာသွန်းမှုကြောင့် နေအိမ်တစ်ချို့ထဲ သဲ၊ ရွှံ့ ဝင်ပြီး ပျက်စီးမှုရှိကြောင်း စုံစမ်းသိရှိရသည်။
ယမန်နေ့ (ဇူလိုင် ၁၉) ရက် ည ၉ နာရီဝန်းကျင်တွင် ရွှေတူးဖော်မှုများ လုပ်ဆောင်နေသည့် နားဟိုင်းလုံကျေးရွာတွင် မိုးရွာသွန်းမှုကြောင့် နေအိမ်ထဲ သဲ နှင့် ရွှံ့များနှင့်အတူ ရေဝင်လာကြောင်း နားဟိုင်းလုံ ဒေသခံ အမျိုးသားတစ်ဦး က သျှမ်းသံတော်ဆင့်ကို ပြောသည်။
“မနေ့ညက မိုးအရမ်းကြီးတာ။ မိုးကြီးပြီး ရေချောင်းက မြင့်တက်လာတယ်။ ကျေးရွာထဲကို ရေဝင်လာတာ။ ရေ ပဲဝင်လာတာမဟုတ်ဘူး။ သဲတွေကောပါတယ်။ ရွှံ့တွေ ကောပါတယ်။ တစ်ချို့အိမ်တွေက အိမ်တစ်ဝက်လောက်ထိ မြှုပ်သွားတယ်။ ပျက်စီးမှုတွေလည်းရှိတယ်” ဟု နားဟိုင်းလုံ ဒေသခံ အမျိုးသား ကဆိုသည်။
လက်ရှိတွင် ရေကျဆင်းသွားသော်လည်း နေအိမ်ထဲတွင် သဲ နှင့် ရွှံ့များ ကျန်ရှိနေကြောင်း၊ လမ်းလည်း ရွှံ့များ ထူထပ်နေကြောင်း သိရသည်။
“အခုတော့ ရေကျသွားပါပြီ။ ဒါပေမဲ့ လမ်းတွေမှာ၊ နေအိမ်တွေ တစ်ချို့ကတော့ သဲတွေ၊ ရွှံ့တွေ အထူထပ်ကြီး ကျန်နေသေးတယ်။ လူထိခိုက်ဒဏ်ရာရတာမျိုးတော့ မရှိဘူး။ အိမ်ထဲမှာ သဲတွေလည်းဝင်လို့ ပြန်ယူထုတ်ဖို့ ခက်ခဲတာပေါ့” ဟု ၎င်းက ပြောသည်။
နားဟိုင်းလုံကျေးရွာအနီး တဝိုက်တွင် ရွှေတူးဖော်မှုများရှိသည့်အပြင် သစ်တောဖြုန်းတီးမှုကြောင့် နှစ်စဉ် ရေကြီးမှုဖြစ်ပွားခဲ့ပြီး ယခုနှစ်သည် ယခင်နှစ်တွေထက် ရေပိုကြီး လာကြောင်းသိရသည်။
ထို ရေကြီးမှုနှင့် ပတ်သက်ပြီး ကျေးရွာဥက္ကဌ နှင့် သက်ဆိုင်ရာ ကုမ္ပဏီများက ပျက်စီးဆုံးရှုံးများ ကို လာကောက်သွားပြီး ကြောင်းသိရသည်။
“ ဒီနေ့ ဥက္ကဌတွေတော့ နာမည်စာရင်းတွေ လာကောက်သွားတာတော့ရှိတယ်။ ရွှေတူးဖော်တဲ့ ကုမ္ပဏီကလည်း လာကြည့်သွားတယ်။ ပျက်စီးမှုစာရင်းတော့ လာကောက်သွားပါတယ်။ လျော်ကြေးတော့ ပြန်ရမလားမသိဘူး။ အရင်နှစ်တွေကတော့ ရပါတယ်။ ရလည်း နည်းနည်းပဲရတာ” ဟု အသက် (၃၅)နှစ်အရွယ်ရှိ နားဟိုင်းလုံကျေးရွာ ဒေသခံ အမျိုးသားတစ်ဦးက ပြောသည်။
ထိုအပြင် အာဏာသိမ်းပြီးနောက်ပိုင်း နားဟိုင်းလုံကျေးရွာဘက်တွင် ရွှေတူးဖော်မှု ပိုများလာကြောင်း သိရသည်။ ယခင်နှစ်တွေထက်လည်း ရေပိုကြီးလာပြီး နေအိမ်ပျက်စီးမှု ပိုမိုများပြားလာကြောင်းသိရသည်။ ယခုနှစ် ရေကြီးမှုကြောင့် နေအိမ် (၃၀) သဲ ဝင်သွားကြောင်းသိရသည်။
“ လျော်ကြေးတော့ အရင်နှစ်တွေကပေးပါတယ်။ ပေးလည်း (၅) သိန်းလောက်ပေါ့။ တစ်ခါထဲမရဘူး။ ၂ – ၃ လ လောက်ကြာမှ ရတာပေါ့။ ပြီးတော့ ဒီနှစ်လည်း ရေပိုကြီးတယ်။ နေအိမ် (၃၀) လောက်လည်း ပျက်စီးတယ်။ အရင်နှစ်က နေအိမ် (၅) အိမ်လောက်ပဲ ပျက်စီးသွားတာ” ဟု ကျေးရွာဒေသခံ အမျိုးသားတစ်ဦးက ဆက်လက် ပြောသည်။
ယခင်က ၂၀၂၀ ခုနှစ်အထိ နားဟိုင်းလုံကျေးရွာတွင် ရွှေတူးဖော်သည့် ကုမ္ပဏီ (၉) ခုသာရှိပြီး ယခုနောက်ပိုင်း ပိုများလာသည်။ ထို့အပြင် နားဟိုင်းလုံကျေးရွာသည် ၂၀၁၈ ခုနှစ်မှစပြီး ရေနှစ်စဉ်ကြီးလာပြီး နေအိမ်များလည်း ပျက်စီးလာကြောင်း သိရသည်။
ထိုသို့ ရေကြီးမှုသည် တနှစ်ထက် တနှစ် ပိုဆိုးလာသဖြင့် ပြည်သူများလည်း တစ်နှစ်ထက်တစ်နှစ် ကျေးရွာတွင် နေထိုင်ရန်အတွက် ပိုခက်ခဲလာခဲ့ကြောင်း သိရသည်။
