သျှမ်းပြည်တောင်ပိုင်း မိုးနဲမြို့တွင် တစ်ရပ်ကွက်ကို (၅) ယောက်နှုန်းဖြင့် ပြည်သူ့စစ် ဖွဲ့စည်းပြီးကြောင်း ဒေသခံများထံ စုံစမ်းသိရှိရသည်။
အဆိုပါ ပြည်သူ့စစ်ကို ဖွဲ့စည်းရန် ဇူလိုင် (၁) ရက်က စစ်ကောင်စီလက်အောက်ခံ မြို့နယ်စီမံ အုပ်ချုပ်ရေးအဖွဲ့က လာရောက်ပြောဆိုခဲ့သည်။ ထိုနောက် ဇူလိုင်လ ဒုတိယပတ်မှာ ပြည်သူ့စစ်ကို ဒေသတွင်း လုံခြုံရေးဟု အမည်တပ်ကာ ပြည်သူ့စစ် ဖွဲ့စည်းခိုင်းကြောင်း ဒေသခံများက ပြောသည်။
“အခုတော့ မြို့တွေထဲမှာလည်း ပြည်သူ့စစ်ဖွဲ့စည်းပြီးသွားပြီး။ တစ်ရပ်ကွက်ကို ၅ ယောက်နှုန်းနဲ့ ဖွဲ့စည်းလိုက်တာ။ သူတို့ ထုတ်ပြန်ချက်တော့ မထုတ်ဘူး။ တစ်မြို့လုံးဆိုတော့ ၂၅ ယောက်ရှိပါတယ်” ဟု မိုးနဲမြို့ ဒေသခံ အမျိုးသားတစ်ဦးက ပြောသည်။
ထို ဖွဲ့စည်းထားသော ပြည်သူ့စစ်တပ်ဖွဲ့များကိုလည်း သိုင်းပညာသင်ပေးခြင်းမရှိကြောင်း ၊ လိုအပ်ပါက လက်နက်ချပေးမည်ဖြစ်ကြောင်း မြို့နယ်စီမံအုပ်ချုပ်ရေးအဖွဲ့က ပြည်သူများကို ပြောဆိုခဲ့သည်။
“သူတို့ သိုင်းသင်ပေးတာလည်း မရှိဘူး။ ဘာမှ လုပ်ပေးတာလည်း မရှိပါဘူး။ အဖွဲ့တော့ ဖွဲ့ပြီးသွားပါပြီ။ လိုအပ်ရင် လက်နက်ချပေးမယ်လို့ပြောတယ်။ လုံခြုံရေး အကြောင်းပြပြီးတော့ပဲ သူတို့ ပြည်သူ့စစ်ဖွဲ့လိုက်တာပါ” ဟု အထက်ပါ အမျိုးသားက ပြောသည်။
ထို ပြည်သူ့စစ်ဖွဲ့စည်းရာတွင် အသက် ကန့်သတ်ထားခြင်းမရှိသလို နီးစပ်သူများကိုသာခေါ်ယူနေကြောင်း သိရသည်။
အလားတူ မိုးနဲမြို့နယ်အတွင်း ကျေးရွာများတစ်ချို့တွင်လည်း တိုင်းရင်းသားလက်နက်ကိုင်က တပ်သား သစ်ကောက်ယူ နေလျက်ရှိကြောင်းသိရသည်။
Leave a Comments