သျှမ်းပြည်တောင်ပိုင်း လဲချားမြို့နယ် အမှတ် (၇) ရပ်ကွက်အတွင်း ကျွဲကျောင်းသားတစ်ဦးကို တစ်ရပ်ကွက်နေ လူငယ်များက ဝိုင်းဝန်းရိုက်နှက်ခဲ့ကြောင်း သတင်းသိရသည်။

ပြီးခဲ့သည့် ဇူလိုင် ၁၅ ရက်တွင် လဲချားမြို့ရှိ ဂေါက်ကွင်းဘက် ကျွဲကျောင်းလွှတ်သွားသည့်အသက် ၁၃ နှစ်အရွယ် စိုင်းမတ်ကို အသက် ၁၇ – ၁၈ နှစ်ဝန်းကျင်ရှိ တစ်ရပ်ကွက်တည်းနေ ဖြိုးဝေယံ နှင့် သူငယ်ချင်း အုပ်စုက ဝိုင်းဝန်းရိုက်နှက်ခဲ့ကြောင်း ဖြစ်စဥ်များကို သိရှိသည့် ဒေသခံအမျိုးသားလူငယ်တစ်ဦးက သျှမ်းသံတော်ဆင့်ကို ပြောသည်။

“သူကရွာကနေ ဒီကို ကျွဲကျောင်း အငှားလာလုပ်တဲ့သူပါ။ ရောက်တာတော့ကြာပြီ၊ ဗမာစကားမတတ်ဘူး၊ အဲ့နေ့ ကျွဲကျောင်းလွှတ်တော့ ဖြိုးဝေယံတို့အုပ်စုက အကြောင်းမဲ့လာပြီးရန်ရှာတာ၊ ရိုက်နှက်တာကို ခံရတယ်၊ မျက်နှာတစ်ခုလုံး ဖောယောင်ပြီး ကျောကုန်းနဲ့ ရင်ဘတ်မှာ ဒဏ်ရာရထားတယ်” ဟု ၎င်းအမျိုးသားက ပြောသည်။

စိုင်းမတ်ကို ရိုက်နှက်သည့် ဖြိုးဝေယံ နှင့် သူငယ်ချင်းများ အုပ်စုသည် ကျွဲကျောင်းသား စိုင်းမတ်ကို ရိုက်နှက်သည့် ရုပ်သံလူမှုကွန်ရက် စာမျက်နှာတွင် ထွက်ပေါ်လာသည်။

ထို့အပြင် ရိုက်နှက်ခံရသည့်အကြောင်းကို လူကြီးများထံ တိုင်ကြားပါက ဓါးဖြင့်ထိုးသတ်ခံရမည် ဟုလည်း ခြိမ်းခြောက်ခံရသည့်အတွက် ဖြစ်စဥ်ဖြစ်ပွားသည့်နေ့တွင် လူကြီးများကို မပြောပြရဲပဲ ဇူလိုင်လ ၁၈ ရက်နေ့ မနက်ပိုင်း အိမ်ရှင်သူဌေး မှ ဒဏ်ရာများကို မြင်မိပြီး မေးမြန်းရာမှ အကြောင်းစုံသိကာ အုပ်ချုပ်ရေးမှူးနှင့် သက်ဆိုင်သည့် လူကြီးများထံ တိုင်ကြားမှု ပြုလုပ်ခဲ့သည်။

“လူကြီးတွေကို တိုင်ရင် ဓါးနဲ့ထိုးသတ်မယ်လို့ ခြိမ်းခြောက်ခံရလို့ မပြောရဲပဲနေတာတဲ့၊ သူ့ သူဌေးက ဒဏ်ရာ မြင်ပြီးမေးတော့မှ အကြောင်းရင်းသိရတာ၊ သိသိချင်း ရပ်ကွက်လူကြီးနဲ့သက်ဆိုင်သူတွေကို သွားတိုင်တာ၊ အခုတော့ ကျူးလွန်သူ မိဘဘက်က ၄ သိန်း လျော်ကြေးပေးမယ်တဲ့” ဟု အသက် ၄၀ အရွယ်ရှိ ဒေသခံ အမျိုးသားက ပြောပြသည်။

လက်ရှိတွင် စိုင်းမတ်သည် မျက်နှာဖောယောင်ဒဏ်ရာများ၊ ရင်ဘတ် နှင့် ကျောအောင့်ဒဏ်ရာများခံစားနေရကာ ရန်ကုန်သျှမ်းလူငယ်များအသင်း နှင့် လဲချားလူငယ်များမှ သွားရောက်အားပေးစကားပြောပြီး ထောက်ပံ့ ငွေကြေးတချို့လည်း ပေးအပ်ခဲ့ကြောင်း သတင်းသိရသည်။

ယင်းဖြစ်စဥ်နှင့် ပတ်သက်ပြီး မတရားကျူးလွန်ခံရသူ စိုင်းမတ်အတွက် တရားမျှတမှုရရှိစေရေးနှင့် နောက်နောင်ကာလများတွင် ယခုလို လူမျိုးရေး အနိုင်ကျင့်ပြုမူဆောင်ရွက်မှုများ မရှိစေရန် မျှော်လင့်ကြောင်း သွားရောက်ကူညီခဲ့သူ လဲချားလူငယ်တစ်ဦးက ပြောဆိုထားသည်။